di li S’colle Industrielle, logeie d’avance à n’ laide essègne, à l’ Halle des Drapîs.
Li rowe Saint z’Elôïe, li seûle qu'y abwerdaie dè costé dè l’ Châsseie des Prés, est asteure bin di s’tappe[1] et ses pan’lets sont pus lâges qui tote si pavaie ni fourihe divins l’ timps.
L’Université, qui s’ sitâre tot costé, ni vout nin fer ci qwârtî pus bastâ qu’in’ aute ; drî l’Hospice des vîx hommes, è l’ rowe dè Pitteurs, elle fait fer deux batumints di tote baité et qwand les studiants y âront pris gîse, is amonront mutwet l’ commerce avou l’ disdu è cist’ endrwet wâk[2] et si pâhûle qu’il avise qu’on z’y dwème todis.
Po çou qu’ c’est des prés Saint-D’nih’, qu’on pinséve n’y fer qu’ des briques, puis ls’ aband’ner comme ine trîhe, is d’vinront, à z’elles tot seû, on qwârti bin à planeûr, qwand l’ plèce dè Congrès sèret faite et qui des bellès rowes y aboutih’ront ; qui l’ Hospitâ d’ Bavîre, cist’ ûtil, mais trop anoïeux hâbiair[3] po s’ trover è pleinte veie, bag’ret so quéque hauteur, i n’ mâque nin dè l’ plèce âtoû d’ Lîge ; et qui l’ Cazair des S’colîs, ci trô ax fîves, sèret d’molou à rase di terre. Li restant si fret di p’tit à p’tit à l’ wâde dè vîx bon Diu.
