A on novê scolî, on lî mètéve dabôrd divins lès mins li creûhète, ki c’mincîve po l’ creû d’ pâr-Dièw, afisse k’i s’ sègnahe divant dè lére; èt po èsse pus-abèye, nos d’hîs simplumint, tot mètant on deût so l’ front: pér....... soit-il; pwis on loméve vint'-sèt' lètes l’eune après l’ôte. Lès deûs prumîres, c’èsteût l’ grand A èt li ptit a. On lès prononcéve come è francès, såf treûs: li v si louméve vu (po nin dîre vé; li w si léhéve doblu, èt po l’ z on d’héve zétâ. Après l’ zétâ c’èsteût l’ etc, ki r’prézintéve li conjonccion francèsse et : l’alfabèt' finihéve par li mot est, k’on spèlihéve é-s-t aiss. On d’manéve po l’ mons in' an la dsu !
Çou ki sûvéve l’A-B-C, c’èsteût l’ Notru-pére, l’ Åvé-Maria, li Crois-en-Dieu lè pére, lès c’mandmints d’ Dièw èt d’ l’Èglîze, pwi lès sillabes ba, bè, bî, bô, bu; ca, cè, cî, etc, imprimêyes so on foyou a pårt.
Ossi vite ki l’ poupåd parvinéve al prumîre rôye dè notru-pére, i rècoréve a dadaye è s’ mohone po anoncî l’ bone novèle; si mére, tote binåhe, n’aveût rin d’ pus håsté ki d’aler dîre a sès wèzènes: mi fi k’è-st-a n-o-note !! Èle lî d’néve deûs-êdants po dès cèlîhes, c’èsteût-st-ine fièsse è manèdje, on magnîve dès pêlêyes di boûkètes.
On pô pus tård, si l’èfant aveût polou lére ou seûlmint spèli a dmèye bin li prumîre pådje tote ètîre, novèle djôye, novèle fièsse; li mame aléve co tchawer tos costés: mi fi k’a toûrné l’ foyou !! Ci djoû la, on féve co 'ne gasgogoye po l’ mazète.
Après l’ creûhète, vinéve li keûr d’amoûr, pitit lîve di noûv ou dî pådjes, tot rimpli d’ l’amoûr di Diu; i cont’néve dès påters, dès-akes di fwè, di contricion, èt dès-ôtes.
Li lîve di comugnon acsègnive çou ki faléve fé divant èt après li c’fèssion, divant èt après l’ comugnon.
Li p’tit et l’ grand catrucème èstît-a pô près çou k’i sont co ouy, ôrmis sacwantès kèstions on pô trop-z-ènocinnes po on sièke di loumîre come li nosse. On-z-a bin fêt di lès sètchî foû; èlle ont stû rèplècèyes pa dès-ôtes pus-a pwèrtêye dèl djonnèsse d’asteûre, k’èst bin pus sincieûse èt pus malène ki nos n’ l’èstîs !
On trovéve divins l’ lîve Djèzus-Cri li nêssance, li vèye, li passion èt l’ mwért di Nosse-Signeûr.
