i nos faléve tini påjhûles; nos n’ oizîs shofler, sins cwè nos årîz rçût les contrucôps: ces sinnes la fjhît sonner l’ cour ås vijhéns ki vnît schoûter ås ouxhs.
6° Infén, nos avîs dvins nozôtes ene djonne sote di nexhance, ki s’ mere avoyive po s’ è dhaler. Sovint i lyi prindéve do fouke, ele potchive tot avå l’ plaece tot tchantant on baragwin ki personne ni comprindéve; et tot corant, ele leyive toumer dzor leye çou k’ elle aveut d’ trop e coir...... Dji vs lai la djudjî kén efet çoula dvéve fé ! Vos årîz dvou nos vey tertos apicî nos narenes, tot breyant: pufkene ! Kéne flaireur !...... On pondeu k’ åreut stî temoen end åreut motoit fwait on plaijhant tåvlea (16).
On m’ prinda foû d’ cisse crotêye sicole la po m’ fé intrer dvins ene pus hôte. Cisse cial estant plaeceye a l’ intrêye del veye, elle esteut pus considerêye. Ele passéve po l’ pus hupêye di ç’ tins la; on-z î aprindéve assez bén, li Mwaisse aveut ene bele mwin, et les Calvette, les Amiable, les Grenon n’ estît nén co cnoxhous (17). Il esteut foirt acalandé po fé des letes, des cwitances, des suplikes, et çoula gråtismint, tcharitåvmint. Par måleur i faléve sicrire so ses djnos, pusk’ on-z esteut-st ashious so des ptits tchinisses di bancs, k’ estît tot bas, et les djnos vos rmontît djusk’ å stoumak.
Après m’ aveur egzaminé, i m’ meta å live-micîf, et çoula m’ ecoraedja fameuzmint.
Tchaeke sicolî, tour a tour, cwitéve si plaece po aler rcoirder adlé lu; i vs schoûtéve ou i n’ vos schoûtéve nén, ca d’ tins in tins i s’ edoirméve; et i n’ si fåt nén merviyî d’ çoula, c’ est ene si rude et si anoyeuse bezogne ki d’ aprinde a lére a ene årmêye d’ efants !
Télfeye ossu, cwand on lijhéve trop biesmint, i vs foutéve ene tårtêye. Po des djurmints, po des baretes, i dnéve cåzu les minmès pûnicions k’ e l’ ôte sicole; mins çou k’ esteut pé, i vs fjhéve ridjonde les betchetes di vos doets po feri dsu avou l’ tiesse d’ on scriftôr di keuve d’ on pî lon: Ô ! çoula fjhéve on må d’ araedjî ! Di pus, li ci ki s’ åreut-st avizé do rsaetchî s’ mwin, atrapéve des bouxhe-al-gueuye, i vs el hapéve po ene pougnêye di tchveas, et l’ kischoyéve télmint ki l’ pôve efant end esteut tot bablou.
