— 24 —
Èt vola d'on plin côp, so l' campagne qui s' loukîve
come faite d'ine seule grande pèce, qui lès tchamps s' pârtihèt,
tot l' kitèyant a vérts bokèts.
Ossu, qwand l'ome vinrè po vèy çou qu'è-st-av'nou
dè grain qu'il a sèmé, lès promèsses dè prétins
lî f'ront roûvî lès hisses qui l'iviér lî a d'né.
VI
Li florihåye
Èt qwand l' tchaud solo dè meûs d'djun
monta l' prumî côp drî lès tiérs,
so 1' campagne qui r'dohîve d'ameûr
i trova l' djonne grain qui drèssîve
tote ine àrmêye d'aw'hiantès pontes,
dizeû lès bleûvès cåyes èt lès rotchès tonîres.
Èt, sins tàrdjî, come c'èst 1' moumint
qui tot crèh sot, qui tot brotche foû,
lès fleûrs aspitèt so lès pôtes,
clintchèyes inte zèles come po s' båhî.
Li tins d' florihåye, c'èst l' såhon d' l'amour,
qu'èst maîsse divins tot, disqu'a d'vins lès fleûrs,
div'nowes come dès nids la qu' li p'tit tinre ho
va trover s' djîse prêt' po crèhe èt maw'ri.
On doûs vint sofèle èt, si lon qu'on veûse,
li campagne si ståre èt rôle sès vérts flots,
qui, tot fî parèy ås cis dèl grande mér,
crèhèt, pwis morèt, sins jamåy fali.
Ine poûssîre, si fène qu'on nèl sét vèyî,
s'èlîve èt s' kissème a chaque flot qui passe,
èt la, d'zos l' solo, èl pàhûlisté
dèl tére qui frudjèye, — lès grains sont mariés.
