tos lès måyes, qui r'cwèrdèt leûs pus doûcès tchansons
pol frumèle, qui cotèye et qwîrt à niète sès-oûs.
C'est l'prétimps. Tot ravike ; èt l'pauve grain, qui l'djalêye
aveût tant rascråwé, si r'lîve, come on malåde
qui k'mince a s' rihaper d'ine tènisse maladèye.
Mins l' mateûr lî fait fåte : ossu l'Ci qu'est la-d'zeûr
a d'dja compris s' misére èt, come s'i fahe on sène,
la, dè costê d' bon vint, lès nûlêyes acorèt
èt l' plêve tome, douce èt tchaude, inte deûs-aîres di solo.
L'êwe èt l' feû s'acoplèt po rinde dèl fwèce al tére :
li séve monte, li grain crèh, vèrdih èt s'aboh'nêye.
Èt vola d'on plin côp, sol campagne qui s' loukîve
come faîte d'ine seûle grande pèce, qui lès tchamps s' pârtihèt,
tot l' kitèyant a vérts bokèts.
Ossu, qwand l'ome vinrè po vèy çou qu'è-st-av'nou
dè grain qu'il a semé, lès promèsses dè prétimps
lî front roûvî lès hisses qui l'iviér lî a d'nê.
VI. Li florihåye
Et, qwand l' tchaud solo dè meûs d' djun
monta l' prumî côp drî lès tiers,
sol campagne qui r'dohîve d'ameûr
i trova l' djonne grain qui drèssîve
tote ine årmêye d'aw'hiantès pontes
dizeû lès bleûvès cåyes èt lès rodjès tonîres.
Èt, sins târdjî, come c'èst l' moumint
qui tot crèh sot, qui tot brotche foû,
lès fleûrs aspitèt so lès pôtes,
clintchèyes inte zèles come po s' bâhî.
Li timps d' florihåye, c'èst l' såhon d' l'amoûr,
qu'èst maîsse divins tot, disqu'å d'vins lès fleûrs,
div'nowes come dès nids la qu' li p'tit tinre ho
va trover s' djîse prète po crèhe èt maw'ri.
On doûs vint sofèle èt, si lon qu'on veûse,
li campagne si ståre èt rôle sès vérts flots,
qui, tot fî parèys ås cis dèl grande mér,
crèhèt, pwis morèt, sins jamåy fali.