Pådje:Léon Bernus - Les faufes dè J. Lafontaine in patoès d’Chaleroèt, 1872.djvu/29

Cisse pådje ci a stî acertinêye pa deus contribouweus.
LIVRE I.
23

« Disti l’Bédot, bin j’prin co l’tette !
— « Si c’n’est né ti, c’est t’frére putette.
— « Bin jé n’d’ai pont, — C’est iun d’vo binde si c’est né li ?
« Vo m’mastinet tertous ! vos chins ét vo biergi,
« Nulle paure asteure jé n’pou pû m’mette à hiutte,
« Pa tout costét j’sû à l’pourchutte !
« Vos avét même consii, in chesseû d’vô voésins,
« Dé m’foute in m’wai coup dain les rains !
« On mé l’la dit, i faut bin q’jé mervinche !
— I vo l’l’apougne pa l’pia du dos,
Fout l’camp avét li dain lés bots,
Et là, i l’despiesse et i l’minche.

REFLEXIONS.

C’t’a s’foutte ell’ tiesse au mûr ! on voet ça tous les joûs,
Iun est pu foire qu’in aute, faut qui mousse rade ses sîches,
I s’poche les pids dés geins, i fai tous les cint coups,
On n’oûse rin dire biacoup !
I cache dispute ! in mot, rade i r’trousse ess’chimiche !
In aute ferraye tout ferre, eiét si d’vint adoét,
A l’latte, à l’lutte, baston, ou pistolet,
A n’gein paisibe, i n’cachera q’plaie et bosse,
Su vo pa et vo mame, p’tette vo sœur, comme in losse !
C’est s’t’in duèle !! radmoin
Il évoye sés témoins,
Pou d’allé su l’terrin !
I faut s’poser vo pia, pou in duèle qui cache !
Si vo n’v’lét né d’aller, on dit q’vo s’tét in lache !
On appelle ça d’l’honneûre !! si vo moustrèt vôs broques !
Insultét, vo d’allét, vo z’attrapét vo nioque
Stindu, tuét pa n’poque,
Vo l’liét padri, pou in vaurin :
Enne feume eiét d’zeffants, sain soutint, avet rin !!
N’disputte chai inte deux geins, on d’vret rade mette les bins.