Ell’chin s’aclappe à s’gaye, et l’Biergi prin s’n’houlette,
Li stiche ell’fier dain s’vinte, brige ell’manche sû s’nanette,
Quoé que q’ça est s’tarrivét intrèt Mons ét l’Pintecotte,
D’sét q’c’est s’tenne rutte lesson, pou lès sots et lés sottes,
Pou lés geins qui fiont l’fier, pasqu’il ont in habit,
Qui passe nu pou n’saquoé ét pou avoé d’l’esprit !
Stiche nu leû néz dain tout ét d’iesse adoét ont l’aire,
Tout l’sécret d’leû n’esprit : c’est d’fai l’môrt et dé s’tére !
Tint qui n’chouffelle nu mot, i passe nu pou malins,
Mai si d’rouve nu leu trappe, c’est s’t’arvoère lés voésins.
LES GUERNOUYES QUI VOUL’NU IN ROÉ.
Lés Guernôuyes trop biesses ess’lassint,
D’bin viqui dain leû République,
In bréyant au bon Diœu r’clamînt :
I leû z’evoye in Roé ! comme lés autes, même boutique :
C’estét n’grosse soke dé bot,
Dain l’rii qui chai d’asto !
Trop simpes, comme on za peû, d’iun dit : grand personnâche,
Elles s’évont s’ermuchi dain leû trau d’aérache !
Elles n’ousint né woéti d tout prét,
L’grosse soke qu’elles perdint pou leû Roé !
Rin qu’a l’woéti elle d’ont d’ja l’vesse ;
A l’fin nia ieune qui vude dé s’trau,
Lés autes chuve nu…… Mai qué tableau !
Comme i n’bouge né, elles sautelle nu su s’tiesse !
