Les geins drouvrint dés ouyes, l’auche comme des pôrtes dé grégne,
In Lion vint du coup, leu dit : « O biesses è geins !
« L’barbouyeu, vô fout tertous d’dain !
« In vô moustrant ça su s’n’enségne :
« Eiét d’vire ça nia d’quoè iesse anoyieu !
« D’sét qué c’n’est né du pid qui s’mouche !
« Nia del raisô qu’no s’rint au d’zeû,
« Si nô plint nô chiervi dé n’brouche.
F’iét vo portrai vous même d’vo tiesse ou bin d’vo pia,
Pont dimbarras ! sûre qui s’ra toudi bia !
L’l’iét vous jugi pa l’z’autes, pou vo donné du linche,
P’tette qué deux toés diront du maû !
Vo s’rét m’wai eiét plain d’défauts !
Mai l’liét lés dire : in joû, vos aurét vo n’ervinche !
LÉ R’NAU EIÉT LÉS RÉSINS.
J’ai intindu conté qu’in R’nau,
Dain in jardin estét r’cheû pa in trau !
I r’woète pa tout costét, les poéres et lés biloques,
Ça n’li chennèt né bon, pou rescuré sés broques !
I li fallét n’saquoé d’méyeu !
I voét n’crappe dé résins, pindue, rout’che comme enne grinche !
— « Nô y iestons, disti, à l’vrai taye à caclinche !
Lé v’la bin anoyeu !
I n’p’lét né d’allé l’printe,
Et né moéyin dé l’fai desquinte !
