In med’cin pou vo pia : c’est s’tin m’wai camarade,
Pa s’qué si vo l’choutèt, vo stèt toudî malade,
C’est s’taugile à comprinte : c’est s’gangne poin, c’est s’mesti,
Faut bin payi s’cârriolle, s’cocher pa d’vant padrî !
Quand on z’est bin jondu, enne bonne ercette à chure :
L’iét barboté l’med’cin, et l’iét bouté l’nature.
In med’cin n’fai né d’mau, quand on d’a bin dangi,
Mai les toès quarts du tins, i n’sai vo soulagi,
I pou bin vo r’gûerri, dîn mau d’vinte ou d’enne crampe,
Mai i n’saurét rin fai, quand nia pu d’huile dain l’lampe.
L’POUYE QUI POND DES OUS D’ORE.
In coquî avèt n’pouye, qui li fiet în oû d’ôre,
Dain in quertin,
Tous les joûs au matin,
I ruminet : q’dain s’géve, elle wordèt in trésôre !
Es s’n’idèe là, dain s’tiesse si bin s’estit’che,
Q’pa in bîa jou, pou d’vèni pu rade rit’che,
I l’lia coupet s’gozette ! il estét bin din s’tôrt !
I sin voulét à mort !
In l’drouvrant îl a vu : qui s’fourrét l’doét dain louye,
Ess’géve estét comme ell’sienne d’enne aute pouye.
Les geins qui voule nu iesse trop gloû,
Au pu souvint n’ont rin du tout !
