« Dit-st i l’ Bedot, bén dj’ prind co l' tete !
— « Si ç’ n’ est nén ti, c’ est t’ frére putete.
— « Bén dj’ end a pont, — C’ est onk d’ vo binde si c’ est nén li[1] ?
« Vos m’ mastinez tertos ! vos tchéns et vo bierdjî,
« Nole pårt asteure dj’ èn pou pus m’ mete a hute[2],
« Pa tot costé dj’ so al porshûte !
« Vos avoz minme consyî, on tchesseu d’ vos vijhéns,
« D’ èm fote on mwais côp dins les rins !
« On mel a dit, i fåt bén k’ dji m’ ervindje !
— I vos l’ apougne pal pea do dos,
Fout l’ camp avou lu dins les bos,
Et la, i l’ dispiece et i l’ mindje.
C’t a s’ fote el tiesse å meur ! on voet ça tos les djoûs,
Onk est pus foirt k’ èn ôte, fåt ki mosse rade ses sidjes[3],
I spotche les pîs des djins, i fwait tos les cint côps,
On n’ oize rén dire beacôp !
I cache dispite ! on mot, rade i rtrousse ès tchimijhe !
Èn ôte feraye tofer, eyet si dvént adroet,
Al late, al lûte, baston, ou pistolet,
A ’ne djin paizibe, i n’ cachrè k’ plåye et bosse,
So vo pa et vo mame, ptete vo sour, come on losse !
C’ est on duwel !! radmint
Il evoye ses temoens,
Po daler sol terén !
I fåt spozer vo pea, po on duwel ki cache !
Si vos n’ vloz nén daler, on dit k’ vos stoz on lache !
On apele ça d’ l’ oneur !! si vos mostrez vos brokes !
Insulté, vos dalez, vos atrapez vo nioke
Stindou, touwé pa ’ne poke,
Vos l’ leyîz padrî, po on vårén :
Ene feme eyet ds efants, sins sotént, avou rén !!
’ne dispite tchait inte deus djins, on dvreut rade mete les béns.