« Spotchî come ene figote, på gros mårtea d’ Couyet !
« Ké moyén d’ e vudî dins on parey dalaedje ?
I creye rade après l’ moirt, po esse disbarassî[1] !
Mins cwand i l’ a yeu veu, il a stî bén saizi !
— « Vos m’ apelez, dit-st ele, cwè vloz co a vo-n ådje ?
— « C’ esteut po m’ diner ’ne mwin po m’ ertcherdjî d’ èm bos,
Dit-st i, e hossant come ene fouye[2],
Et e l’ waitant dins l’ trô d’ ses ouys !
« Vos n’ tådjroz todi pus a m’ saetchî l’ pea do dos.
Si målureus k’ on fouxhe, on vout todi daler,
Mågré k’ tertos so tere, nos n’ estans k’ des mårtirs !
Eyet come el proviebe on-z a bén råjhon d’ dire :
Putoit peter k’ crever.
Oyi, les djins ont peu d’ mori,
Mins i n’ è sont k’ pus biesses !
Pask’ après tot c’ n’ est k’ s’ edoirmi,
Po todi !
Est çk’ on-z a peu d’ aler coûtchî ?
Mins c’ est çk’ on leu stitche dins leu tiesse !
Les contes, les babioles do curé :
« Gåre a vozôtes! vos stoz dånés !
« Schoircîs, rostis, broûlés !
Purgatwere! et flames di l’ infier !
Des diales a coines ! rivnants, sôrcieres[3] !
Vî, on voet k’ on est egueuzé !
Mins il è dmeure todi ’ne sacwè !
Bén çk’ on-z a peu d’ vini å monde ?
C’t ostant naturel di pårti,
Et ttossu åjhey ki d’ vini !
