I promèti, lè masév’ tchin,
Ki tot à fai sèreu po rin.
K’on r’nakreu so l’ tchâpèn’ è l’ ross’,
K’on n’ magn’reu pu k’ dè souk’ al’ loss’,
K’on mètreu dju to lè-z impô,
K’on sèreu kwit’ di s’cassé l’cô,
Ki ci n’ sèreu k’ djôw’ è liyèss’,
Ki to lè djou sèri dè fyèss’ ;
Mais, dispôw k’i no-z on(t) r’novlé,
On-z è di(x) fèy pu affamé.
Divan çoula dj’aveu dell’ bîr’,
Dè pan, dè lâr è dè crompîr’,
Dji vikéf’ assé (h)ônètmin
A pwèrté dè sètch so mè rin ;
Dj’aléf’ to lè djou al tavyenn’
Beur in’ kwât’ avou noss’ Djihenn’ ;
Mai, dispôw k’i no-z on(t) r’bathi,
A pôn’ a-dj’ dè pan à magni.
Mi fem’ a vindou tott’ sè kott’,
Ell’ n’a pu k’deu ou treu klikott’ ;
Mi justâkor è-st â Lombâr,
E dji prévêu k’on pô pu târ,
I m’ fârè alé so l’ viyèdj’
Bribé, fé dè honteu messédj’
Po ramèhné kék’ brikè d’pan
Po noûri m’ fem’ è mè-z èfan
