Vo m' rila co padrî l’ finiesse,
Sins djoke et mourmachant dins m’ tiesse
Dji m’ ervoe co estant efant :
Les djins èm trovént ddja soyant.
El tins passa padvant mes iys;
El moncea d’ eures s’ a dispiyî,
Avou ses ptitès maladeyes,
Ses traeyins, bisbrouyes et tchireyes.
Cwè fé roci padrî l’ finiesse ?
Toute el djournêye, dji rwaite dins m’ tiesse.
Eyet c’ est in moncea d’ sovnances
Ki m' deynut ki dj’ n' a pont yeu d’ tchance;
Ki s’ disrôlèt come on tchaplet
Leyant pinser k’ c’ esteut l’ mwais chwès;
Tchaeke côp k’ i gn aveut ene decizion
Dj’ el purdeu sins waire di passion.
Gn a ptete pont d’ bårea a l’ finiesse
Mins i gn a pont nerén dins m’ tiesse,
Paski les idêyes erpasnut
Et les imådjes ès comelnut
Sins ki dj’ n' arive, å grand djamåy[1]
A tenawete les rashonner.
Et pocwè nén les rmete d’ aleure
Po m’ sinti binåjhe dins mes meurs.
Mins dj’ erwaite todi pa l’ finiesse
Tot xhinant sins djoke divins m’ tiesse.
A tot moumint, dj’ so må dins m’ pea;
Sofri, divins mes vîs oxheas.
Yeusses sont todi presses a sketer
E ratindant d’ esse eterés.
Dandjreus k’ i s’ vont plaire mon les viers
Pask’ i veynut voltî el noer.
C’ est come mi avou mes idêyes.
Èm veye a todi stî fayêye.
Cwand dji tape èn ouy pa l’ finiesse,
Les djins saetchnut ene drole di tiesse
Pask’ asteure, mi, dji n’ fwai pus rén :
Dji m’ rakinkeye ratindant l’ fén.
Padrî l’ finiesse (powinme)
Ciste ouve ci egzistêye eto divins ds ôtès ortografeyes : Feller-Goffart.Padrî l’ finiesse
Li Rantoele lº 103,
Padrî l’ finiesse
- ↑ Mwaisse modêye: « jamés » ki rime avou « rachèner ».