Planète
Chaque djoû, li timps fait s’ paurt, su l’ vôye di vosse planète.
À pates, al coûsse, à tch’fau, vos vos vôrîz cocheûre,
Sayî do ratraper one astaurdjîye d’one eûre,
Ça sèreût minme li diâle qui s’ lancereût di s’ bawète,
Po vos fé trèbuker, vos baker dèl tchèrète.
Vos v’ vôrîz arindjî, à Diu, briber pardon,
Vos rispaumer come noû po vosse dêrin royon :
Vos n’ sarîz rin tchandjî si vosse rote fait bèrwète !
Fioz l’ bin come vos pouroz, li mau si vos l’ voloz,
Dins l’ misére jusqu’au cô, èfoufyî come on sot,
Qui ça fuche on djuron, one babiole, one rawète,
Dispeûy vosse prumî djoû, quand v’s-èstiz al fachète,
Jusqu’à vosse dêrène bauye satchîye di voste alin.ne,
Tot èsteût scrît, sins manque, dins l’ grand pèzwè aus pwin.nes.