Mame ! Vo m’ cial tote honteuse divant vos…
Asteure ki dji so grande, ki dj’ so cåzu ene feme[1],
Dji m’ sint télmint djinnêye ; dji m’ vôreu mete a djnos
Po vs dire ki dji comprind-st aprume
Tot çou k’ vos avez stou por mi…
Dji n’ vos aveu djamåy compris !
Vos estoz-st a mes ouys li pus grande feme do monde,
Et vos estoz l’ pus ptite ! Dji n’ sai s’ vos comprindoz
Pocwè k’ i fât k’ dji vs deye totes les femes ki vs s estoz…
Vos les rprezintez totes : les cisses ki sofrixhèt,
Les cisses ki contèt des istweres,
Les cisses ki tchantèt, ki priyèt,
Ki comprindèt tos les misteres,
k’ advinèt nos sofrances et ki les rconsolèt !
Vos estoz co cisse-lale ki soryive a ses ponnes
Mins ki ploréve di djoye, di bouneur et d’ firté
Pask’ ele mi veyeut crexhe, et k’ a foice di m’ inmer,
Ses ouys esblawis lyi fjhént l’ åmonne
Di lyi dire k’ i n’ aveut nole pus bele ki s’ « hatcha » !
Awè, enocinne mame, vos estoz ces femes la ;
Totes ces femes la, eshonne, ossi sotes ene ki l’ ôte,
Ossi sotes di nozôtes…
Mins, po comprinde si mame, sawè l’ trezôr k’ elle est,
I fåt-st aveur sofri, aveur tûzé bén lon…
Si rapinser les poennes ki leus efants lzî fjhèt
Et totes les fåtes k’ ele rafûlèt,
Et totes les låmes k’ ele rissouwèt cwand c’ est k’ on pleure
Li cour tot disbåtchî !
Come vos savoz les mots
K’ i nos fåt dire adon, macrales ki vos estoz…
Come vos nos savoz vey voltî !
Et come nos doirmans bén, l’ åme påjhûle, e vos bresses…
Et cwand nos fjhans ene måcule, ki ns avans pierdou l’ tiesse,
Vos priyîz come ene andje po ki l’ Bon Diu pardone
Et k’ I mete so vosse conte li fåte di voste efant !
Pôvès mames ki vs s estoz !… Grandès mames !…
Pititès mames da nosse !… Mames di totes les doleurs !…
Si nos vs rovians kécfeye cwand nos estans-st ureus
Å prumî djoû d’ måleur, a l’ tote prumire sofrance,
C’ est « mame ! » ki nos breyans ; nosse mame ki nos rclamans !
Et, mågré les blancs tchveas,
Mågré tot, c’ est todi l’ sovnance
Di nosse mame ki nos dmeure
Disca nosse dierinne eure…
Nosse prumî mot, nosse dierin mot,
Li ci ki cmince et finixh tot,
Ci serè todi vosse doûs no…
Mame !
Priyire po les mames
Ciste ouve ci egzistêye eto divins ds ôtès ortografeyes : Feller timprou.Priyire po les mames
rortografiaedje da Lucien Mahin, e rfondou walon
Priyire po les mames
- ↑ Si c’ est ene kimere ki declame : « Asteure ki dji sos mere, dji so vraiymint ene feme.