C’ esteut tins do prumî disrecloymint. Nos avans stî rçûs pa Clôde Marnefe po-z eredjistrer si ratournaedje del fåve Ezope « Li bijhe et l' solea ». Mins ossu po fé on rapoirtaedje sol dramatike di Såvadjénne
Li videyo ki shût kimince pa on gros plan sol tchén da Clôde, k' åreut bén vlou djouwer les vudetes, lu eto. Dji vos rmete cial les paroles do rapoirtaedje, sins rén rcôper:
Prezintaedje
Filmeu (Fm.) : Waite li gros tchén k' est la. Ci n' est nén lu k' on va fotografyî. Ni filmer ‒ il est evoye, dayeur ‒; c' est ces deus djins ci : Djåke et Clôde. A on mete céncwante, naturelmint, pask' on est todi dins l' recloymint ‒ infén... li disrecloymint del minêye. Et dji laixhe cåzer Djåke ki va dmander et Clôde va responde.
Istwere del dramatike
Djåke Desmet (Dj.D.) - Ebén, Clôde, dji vôreu bén k' vos racontrîz l' istwere do ceke « Concordia ». Cwand est çki c' est ki ça a demaré, çt istwere la ? La dpus d' céncwante ans ?
Claude Marneffe (C.M.) - Oyi, bén seur. Gn årè bénrade cint-z ans. Li tot debut, c' est l' ancyin mwaisse di scole di Såvadjénne, e dijh-nouv cint et vint, k' a-st aprins a ses eleves a cåzer ene miete li walon. Et, e lzî fjhant… surmint… – dji n' sai nén paski dji n' esteu nén la, bén seur – on lzî apurdeut di dire on sketch ou l' ôte… Infén… il ont-st apris a cåzer walon.
Et li prumire reyunion del soce « Concordia », ç' a stî e dijh-nouv cint vint-ût. Adon, dispu ces moumints la – dispu 1928 – li soce a djouwé tchaeke anêye. Dins puzieurès såles di Såvadjénne, paski on n' aveut nén co l' såle des ouves come asteure; li såle låvå, pu dzeu. Epwis, il ont djouwé dins les scoles, ossu. Ey adon, il ont cwanlminme vinou vaici al måjhon des ouves, après 1958, l' anêye k' elle a stî rifwaite.
Dj.D. - Et vos djouwîz cobén d' pîces ?
C.M. - Asteure, nos djouwans deus pîces par anêye… dispu sacwants anêyes. Divant, dji n' pinse nén k' il è djouwént deus. Mi dji djowe dispu dijh-nouv cint septante-ey-onk, on djowe deus pîces par an.
Dj.D. - Dispoy 71 ?
C.M. - A pô près.
Dj.D. - Ça fwait…
C.M. - Ça fwait ddja dabôrd céncwante ans.
Trover des pîces
Dj.D. - Oyi, 50 ans, a deus pîces par anêye… ey on è trouve co ?
C.M. - Asteure, gn a des noveles, avou des noveas sudjets, edon ! (riyaedjes) Avou ça, on ndè pout trover.
Fm. - Metans kî, come novea oteur ?
C.M. - Abén, dji va dire, les pus cnoxhous asteure, c' est Cristian Derike, Djåke Desmete… et co sacwants ôtes, hin. Cristian Carlî… ki scrijhèt des pîces. Ou des noveas come ça, ça candje on ptit côp, hin.
Avou les efants
Dj.D. - Et po les efants ?
C.M. - Bén po les efants, ça fwait a pô près shijh, set ans – 6 ans – ki nos avans rcomincî. Fåt dire ki, dins les anêyes nonante, l' ancyinne… li feye da Hinri Guidon, Djozêye – ki s' ocupe di les mete a scole, et dins les garderies (creches, wådreyes ås påpåds), et ki djowe avou nozôtes – aveut ddja metou so pî ene pitite soce po les efants, come ça. Et i djouwént, par anêye, on ptit sketch u l' ôte come nos fjhans co asteure.
Et e… gn a cénk, shijh ans, dj' a stî on pô e scole, a li dmande des institutrices, po cåzer ene miete li walon et po fé cnoxhe nosse soce. Et gn aveut sacwants efants k' estént interessés. Et on a comincî come ça, a cénk shijh. Et asteure, dins les djonnes, bén, i gn a saze. Ns estans co a 16.
Evidanmint, gn a ddja deus ou troes ki sont passés dins les grands, dins les vîs. Et dji pinse ki l' anêye ki vént, end årè co onk ou deus d' pus. I cominçnut a divni ene miete pus vîs ossu; il ont catoize, cwénze ans. Ça va esse li moumint po les fé passer. Mins gn a co todi sacwants ôtes ki sont padrî, et ki vont continouwer, don.
Et télmint k' on aveut des efants, on a decidé di les fé djouwer deus côps par anêye ossu. Å debut, on n' les fjheut djouwer k' on côp, pask' i n' estént k' cénk, shijh, set – ça dipind. Asteure si on vout fé djouwer tolmonde, on djowe e moes d' nôvimbe ey e moes d' måss, ene pitite pîce, cwè.
Li respondeu si lome oficirmint Claude Marneffe, li dmandeu, Jacques Desmet; responda filmé li 16 di djun 2020.