Ç'fout l'an passé dè timps dès frudeûrs
Qui l' mame di m' feume qu'aveût l'air si deûre,
D'èsse prîse è lavasse, sitièrniha
Tant, qu' èle ènn'eûrit l'infuènza.
Dju n'prinda nin lès pônnes
Dèl plinde, di m'ènnè fé pônne
Babouyant d'vintrinn'mint
Qui li diale ni moréve nin !
Mins l' diale parèy′ qu'in′ ôte
Qwand c'èst ki l'båbå l'ravôte
Fêt s'pakèt pwis nn'è va…
C'èst çou qui m'pôve bèle-mére fat.
Et dépôy′ adon, c'èst
Lèye qu'a m'pinsêye èt mès r'grèts.
Ah ! s'dj'aveû co, si dj'aveû co m' bèle-mére
Mi qu'è nn'î fat tant
Veyî di s' vikant
Dji n'lî freûs pus, djamåy′ pus, nole misére
Nèni ca dji veû
Çou qu'dj'aveû qwand dj'l'aveû !
Si d'vant m'feume, dj'a l'måleûr dè dîre :
“ Ele èsteût drole, à fèye sès manîres
“Ni m'alît nin trop′, èle mi rèspond :
— “Tot l'minme on veût qu'èle vinéve à pont!
“ Portant quand l'pôve vîle åme
“ Vikéve, èle n'aveût qu'dè blåme
“ Vos l'tourmètîz tofér
“ Cial vos lî fîz ´ne vèye d'infér !
“ Vos n'mi djåsîz di m'mame
“ Qui tot m'èl noumant : tarame !
“ Et ça m'console on pô
“ Là qui s'mwért vis done on côp ! ”
Dji n'såreû lî d'ner twért
Et dji n' såreû brêre trop fwért :[1]
Si dj'l'aveûs co
Si dj'l'aveûs co
Livre d'or Charles Steenebruggen,
Si dj'l'aveûs co
- ↑ Li dierinne fråze n' est nén dins l' live.