C’ est on payis eyou dj’ a dmoré 9 ans di 1971 disk’ al fén d’ 1980. Metou å coron d’ n’ onk l’ ôte, dj’ a dmoré e l’ Afrike dipus d’ 23 anêyes di 365 djoûs, di 1953 a 1984.
Dji n’ vos dvizrè nén do disdut k’ i gn a asteure. Dji n’ a pus waire di contaks avou les djins d’ avår la. Courtinnmint, dji dirè ki les moenneus des payis afrikins å djoû d’ ådjourdu, ci n’ est nén todi les pus meritants, ni les pus maléns.
Mins cåzans di çou k’ dji cnoxhe bén, après awè viké dijh anêyes di ç’ costé la (èn an « so campagne » å Rwanda di 1953 disk’ e 1954 eyet nouv ans å Bouroundi di 1971 disk’ e 1980.
I fåt sawè k’ el Bouroundi eyet l’ Rwanda, s’ vijhén, c’ est des « copies conformes » : onk rishonne a l’ ôte, tafwait come des djermales. Les djins do Rwanda sont tot pareys a les cis k’ dj’ a cnoxhou å Bouroundi : Houtu (85 %), Toutsi (14 %) eyet Twa (des ptits omes) (1 %). Les problinmes sont les minmes eto. Po comincî, li ci d’ ene mådjorité disconte ene moennorité. A ene diferince près : c’ est k’ å Rwanda, les Houtou ont rviersé les Toutsi dispoy 1959 disk’ e 1994, l’ anêye do « djenocide ». (ça a stî li « peupe-sipata » el pus moudréle ki l’ Afrike åye conoxhou e XXinme sieke : 1.000.000 d’ moirts do moes d’ avri å moes d’ djun).
Termetant k’ å Bouroundi, les Toutsi ont stî les mwaisses disk’ aviè 2000.
Li democraceye, c’ est onk des problinmes do payis, mins end a ds ôtes. Bråmint sont raloyîs a l’ « esplôzaedje demografike » : 1.900.000 djins e 1952, 7.500.000 e 2000. Si dji conte bén, ça fwait cwate côps ostant. Do côp, tolmonde vout ndaler a scole pusk’ i gn a pupont d’ tchamps assez po fé poûssî tot çk’ i fåt po mindjî. On a fwait des escoles a make… po fé des « tchômeus » al fén do conte.
Ey asteure, i gn a l’ sida ! Avou totes ses consecwinces. Rapoirt a ça, on est scran d’ è cåzer, paski pattavå e-n Afrike, c’ est l’ minme.
I gn a pont d’ ermédes, mågré les pretchaedjes des djins bén pinsants. Infén, disk’ å moumint k’ les omes did par la ès såront ertini, ou s’ espaitchî d’ foirci les comeres. Eyet, ça n’ est nén co po dmwin. Dji n’ vos va nén fé on dessén !
Eyet ç’ n’ est nén totes les biestreyes k’ on nos pout låtchî ladsu ki vénront candji ene pitite sacwè ! Minme les avis des « dji-sai-tot » des S.N.R. [Soces nén Recwårlantes, O.N.G.] ki pretchnut todi po leus tchapeles e bribant dlé nos. I sont la avou leus cwate-cwate climatijheyes. Sins ç’ plaijhi la, i n’ s’ irént nén eskinter po fé l’ bouneur des djins d’ par la. Mins les djins, zeles, ni sont nén todi d’ acoird di shuve les voyes k’ on lzî propôze po n’ nén haper l’ maladeye.
Po comincî, la pus d’ meye ans, tot l’ payis steut covrou pa ene foirt espesse foistreye. Les prumîs omes k’ î dmorént, c’ ît des ptits omes, les Twa, ki viként del tchesse eyet do codaedje des fruts et des raecenes. Pask’ i n’ avént nén l’ idêye ni les ostis po dirôder eyet coûtiver.
Adon-pwis, cwand l’ dezert do Sara s’ a stindou e tchessant les « Bantous coûtiveus » k’ î stént, il ont dvou ndaler vir ôte pårt po trover des plaeces po fé des tchamps. I nd a k’ ont-st arivé insi so les tienes do Rwanda et s’ mete a dirôder tot leu pus foirt sins s’ ocuper des Twa k’ ont stî må pris ey i nd a waire k’ ont sorviké.
Après les Bantous – roci lomés Houtou – des djins d’ Etiopeye ont stî oblidjîs d’ baguer avou leus vatches, tchessîs yeusses eto pa l’ avance do dezert. Eyet, i gn a aviè meye ans did ci, sacwants d’ ces djins la, e passant pa l’ Ouganda, s’ ont aresté el long d’ l’ Acaguera (eyou k’ c’ est asteure el Park di l’ Acaguera). Gn a des ôtes k’ ont co stî ene miete pus lon, divant d’ arester a l’ Ouwess di l’ Ouroundi, el payis vijhén. Ces djins la, c’ est les Toutsi, des bierdjîs-vatchîs.
Les Houtou ont tant et si bén dirôdé k’ i gn a ostant dire pupont d’ bwès do tot. A leu-n arivêye, les Toutsi n’ ont pont fwait d’ brut ey il ont dmoré l’ long d’ l’ Acaguera disk’ å Bouguessera, eyou i gn a pont d’ bounès teres po coûtiver. Do côp, ça n’ djinnéve nén les Houtou. Mais les Toutsi ont radmint veu k’ les Houtou n’ s’ etindént nén eshonne : i gn aveut on moncea d’ pitits rweyåmes ki s’ djalozént onk l’ ôte eyet todi e trén di s’ bate. Ene miete come el leu ki s’ aveut abiyî avou ene pea d’ berbis, les Toutsi avént adopté l’ lingaedje (kiniarwanda) eyet l’ vicaedje des Houtou. I n’ ont pont yeu d’ må po s’ arindjî e dvinant ptit-z a ptit les mwaisses po k’ i gn euxhe pupont d’ djalots.
On cåzéve dedja d’ democraceye après l’ guere dè catoize. Mins djusse e l’ Urope ey e l’ Amerike. Après l’ guere di 40, ça a divnou l’ môde tocosté. Po fé plaijhi a l’ ONU, les Bedjes ont dvou mete fén å sistinme feyodå des
On cåzéve dedja d’ democraceye après l’ guere di catoize. Mins djusse e l’ Urope ey e l’ Amerike. Après l’ guere di 40, ça a divnou l’ môde tocosté. Po fé plaijhi a l’ ONU, les Bedjes ont dvou mete fén å sistinme feyodå do Rwanda-Ouroundi, Territoires sous Tutelle, et-z î ahiver l’ « democraceye ».
E moes d’ nôvimbe 1953, dj’ esteu administreu teritoriå assistant a Astrida (asteure on dit : Boutaré). Poûssî pa l’ ONU (li mambor do Rwanda-Ouroundi), el Minisse des Coloneyes a Brussele a dné l’ ôre di fé po l’ prumî côp des eleccions po lomer des conseyîs po les dzo-tchîfreyes.
Dj’ a stî tcherdjî d’ les organijhî e sacwantès plaeces do Mvéjourou (sud-ess do Teritwere d’ Astrida). Vos årîz dvou vir ça : dji dveu dner ene foye di papî ey on croyon a « tchaeke ome adule et binasné » por lu scrire dijh nos d’ djins k’ il åreut tchoezi por yeusses divni conseyîs el plaece des Toutsi ki l’ estént disk’ a ç’ moumint la.
Advinez on pô çk’ on a lî so ces bultins la : les nos des minmes djins ki stént conseyîs dpu todi ! « C’ est des profiteus… on l’ sait bén… ça n’ sieve a rén d’ è mete des ôtes e leu plaece, ki front ttafwait l’ minme. » Vola çki les djins ont dit totshûte après ! Ç’ a stî on rataedje di prumire leccion.
Adon, on a rmetou ça e 1956 (dji n’ esteu pus la, pask’ e 1954, dj’ aveu dmandé po candjî d’ siervice). E 1956, les Toutsi ont co yeu 50 åcint des plaeces.
Ey on a rataké e moes d’ djulete 1959 po lomer å sufraedje direk les dzo-tchîfs ki, disk’ a ç’ djoû la, stént todi des Toutsi tchoezis eyet lomés på Mwami, li rwè do payis.
Po ça, i faleut fé des lisses di candidats. El politike a l’ uropeyinne s’ astaléve ey on a veu sôrti les pårtis eyet les bagåres etur yeusses. Insi, on-z a tchôkî e payis nos margoulaedjes politikes dizo l’ såme d’ askepyî ene democraceye.
Vo n’ la-t i nén k’ el mwami Moutara tchait moirt å moes d’ djulete après awè stî å medcén bedje ki lyi dveut fé ene pikeure.
Ey el brut court ki c’ est on côp des Bedjes ki lyi ont dné l’ bouyon d’ onze eures, sene ki l’ Beldjike abandnéve les Toutsi.
Eyet l’ djoû del Tossint e 1959 : bardaf ! Ç’ a stî come on pogrom. El tchesse ås Toutsi a cmincî. I gn a bråmint ki s’ ont stî gårer dins les payis vijhéns, e l’ Ouganda, par egzimpe.
C’ est leus fis ki dmandront a rvini e 1970. Al vude. I rvénront e 1990, abiyîs a sôdårs mins i seront batous pås Françès. I rabizront podbon e 1994. Eyet l’ reyaccion serè l’ djenocide rwandès.
E 1961, deus ans après, eleccions po les tchambes ! Eyet c’ est l’ côp d’ estat d’ Djitarama : les Houtou k’ ont wangnî erviersêynut l’ institution rweyåle po proclamer l’ Republike.
Grigwere Kayibanda, on moenneu moderé, on Houtou do sud do Rwanda, est lomé prumî Prezidint del Republike. Li Beldjike, k’ est co l’ pouxhance administrante disk’ å moes d’ djulete 1962, date di l’ indepindance, ni dit rén et leyî fé.
Radmint, dins l’ camp des ancyins dôminés (les Houtou), i gn a sacwants k’ ont vlou djouwer totshûte ås dôminants e-n imitant leus ancyins mwaisses. Et fé co pire ki yeusses so les cis d’ leu prôpe raece. Les prumîs beneficires, ça serè les djins do sud.
Mins l’ batch si va rtourner e 1973. Habiarimana, el bea-fi d’ Kayibanda, va prinde el plaece di s’ bea-pere eyet l’ fé codåner a moirt divant del rigråcyî. Å toû des Houtou do nôr di s’ siervi. Pol moens, les cis ki sont bén avou les hôts mwaisses.
Waitîz padlé nos come on djowe avou l’ democraceye. Pask’ al fén do conte, les Afrikins n’ fwaiynut rén d’ ôte ki çk’ on fwait dlé nos. Eyet i n’ ont nén yeu dandjî d’ aler a scole po l’ aprinde.
Dins on payis eyou les djins n’ savént nén d’ cwè i rtournéve, il ont totshûte creu k’ ç’ ît l’ droet po les pus pôves d’ acciper les afwaires des pus ritches ki yeusses. Tant pé po les pôves ki n’ ont nén stî maléns assez po dvini radmint ritches.
C’ est come dins l’ parabole : « Les cis ki sont-st al copete seront rabaxhîs al valêye del schåle eyet les cis ki sont so l’ boudjon do bas seront rlevés disk’ å dzeu. » Infén, nén tertos pask’ i gn a pont d’ plaece assez po tertos.
Mins e 1990 : ribardaf ! Les fis des Toutsi ki s’ avént såvé e l’ Ouganda e 1959 sont todi pus må veus pa les Ougandès. Come Habiarimana n’ les vout nén vir ervini, i vont moenner ene operåcion militaire e 1990 po foncî l’ ouxh. Mins vla k’ les Francès volnut å scours di l’ årmêye Rwandesse ki n’ våt nén ripete, eyet c’ est l’ coraedje-evoye.
Les payis d’ l’ Organizåcion d’ l’ Unité Afrikinne vont waitî d’ arindjî les bidons po permete ås Toutsi d’ Ouganda d’ ervini dins leu payis. Eyet ossu – mins ça srè l’ pus deur a-z adiercî d’ « adjinçner li pårtixhaedje do povwer ».
Ça, c’ ît èn oxhea ki s’ meteut d’ triviè dins l’ goyî des moenneus Houtou do Rwanda et d’ leus cortizants. Habiarimana riskéve gros e-n acceptant. I djeut « way » ådjourdu. I frinnéve li londmwin.
Termetant, on s’ organijheut po bårer l’ voye a ces Toutsi la. Ey on s’ ahessive ! Di Goma (å Zaïre) ey d’ Boudjoumboura (å Bouroundi), ça a stî ene convoye d’ avions des moes durant po-z amoenner des tones eyet des tones di matchetes, d’ åres et d’ amonucions po l’ årmêye rwandaise (eyet les milicîs) !
An 1994, escrans d’ ratinde, vla k’ les Toutsi d’ Ouganda rvegnnut avou des tropes bén etrinnêyes. L’ armêye rwandaise ni pout pus conter totshûte so les Francès. Po wangnî do tins, Habiarimana s’ eva a Aroucha (e l’ Tanzaneye) po convinke l’ OUA di s’ boune fwè. Mins s’-n avion est abatou å moumint k’ i rintere a Kigali.
Ç’ a stî l’ signå do macsådaedje. Eyet l’ botchreye aléve durer troes moes. On miyon d’ moirts estindous so les voyes, dins les escoles et les eglijhes. Dijh paracomandos bedjes macsådés å camp militaire di Kigali, dizo les iys do djenerå canadyin d’ l’ ONU ki passéve par la dins s’ vweteure. Dji vos fwai cado des detays.
Eyet l’ pus deur asteure po les sorvicants, c’ est d’ esse come rovyîs, termetant k’ les botchîs sont rlåtchîs et fwaiynut les firs divant leus victimes.
Avoz ddja veyou on tchén ki breyeut après awè stronné ene poye ? Ces djins la n’ ont pont d’ ergret. On lzî aveut stitchî dins l’ cabu ki les Toutsi, c’ ît come des biesses di for. Dj’ a l’ idêye k’ il ont todi ça dins l’ tiesse !