Henri,
E bin, cousin Françwès, dji tchaî dau ciél à l’ têre
Dji crîyerais bin mirauke do vèy one téle afaîre.
D’on pôve pitit maçon qui s-astîz tot-à l’eûre
Vos v’là div’nu su l’ côp on grand prédicateûr.
Et dji vos consîye fwârt do vos fè récolèt′.
Li truwale èt l’ mwartî, ça n’ vos va nin one miète.
Po-z-èsse révèrind pére, vos-avîz l’ vocâcion,
Si v’s-avîz l’ tièsse pèléye, vos f’rîz d’djà dès missions.
Por mi, dji va r’trouvè bin vite mès camarâdes.
Ma fwè, i n’è môrrè, di-st-on, qu’ lès pus malades.
Su l’ misére di m’ maujon prétchoz, fioz do disdut.
Dj’ vos dîraî qu’ mès-èfants ont v’nu au monde tot nus,
Qu’is sont acostumès come leû pére èt leû mére
Do s’ contintè d’ leû sôrt, do vikè dins l’ misére.
D’alieûrs comint f’rait-on ôtemint dins nosse mèstî ?
Est-ç’ cinquante sous par djoû qui pôrint m’aritchi ?
Dji n’ vès wêre di maçons qui rôlait à caroche
Et, sins l’ cwade di pindu qui v’s-avoz è vosse potche,
Vos n’aurîz nin bâti, vos n’ s’rîz nin si malin
Qui d’achetè tos lès-ans on p’tit bokèt d’ tèrin.
Françwès,
C’est ç’ qui vos trompe, Henri, là-d’dins, gn-a pont d’ malices.
Voci comint dj’ m’ î prind po fè dès bènèfices
Tos lès djoûs do l’ samwin.ne, dji travaye sins brognè
Et ci n’èst qui l’ dîmègne qui dj’ va au cabaret.
Mi feume didins s’ maujon s’ocupe tote li djoûrnéye
Sins couru cancanè aus quate cwins do l’ culéye.
Èle si mèle di s’ bèsogne èt nin do l’ cèle dès djins
Sès p’tits meûbes sont r’lûjants tot come dès plats di stin,
Èle n’èst nin one comére à fè dès rinchinchètes,
À ukè dès vèjènes po mougni dès galètes.
Èle si continte come mi di sope èt d’ canadas
Èt ci n’èst qui l’ dîmègne qui l’ tchau parait su l’ plat.
Ci djoû-là come vos-ôtes dji vas djouwè m’ pârtîye.
Quand dj’a bwèvu quéques pintes, dji vins r’trouvè Marîye.
Po-z-alè pormwin.nè, nos purdans nos-èfants
Qui, gaîy come dès pinsons, courait t’t-avau lès tchamps.
Pa dès côps nos bwèrans on pot en pormwin.nâde ;
Après ça, nos riv’nans èt nos mougnans l’ salade.
Dol chîje, on djoûwe aus cautes inte amis, inte parints,
Ou bin on nos-apwate li rwè d’ coeûr dau vèjin.
On s’amûse à p’tits fraîs, on s’ divêrtit come quate
Sins s’ dire on mwaîs propôs, sins s’ disputè, sins s’ bate ;
Po plu s’ lèvè lendemwin, on va coûtchi d’ bone eûre.
On s’ rawîye au matin sins tièsse loûte, sins mau d’ coeûr,
Èt l’on s’ mèt aujîyemint à rac’minci s’t-ovradje.
Vos vèyoz qu’ dins tot ça, gn-a pont d’ assôrçuladje.
Èt bin, volà m’ sistème, èt pa ç’ seûl moyin-là,
Dj’a mi maujon da mi, dj’a one vatche èt on via,
Dji possède dja sins r’protche trwès ou quate bokèts d’ têre.
Enfin, dji faîs oneûr à mès p’titès-afaîres.
Maîs l’ cia qui s’ mèt à bwâre è-st-on pôve malèreûs
Qui d’vêrè timpe ou taurd ou voleûr ou bribeû.
Gn-a brâmint à Vilvôrde, s’i v’lint dire leû-z-istwâre,
Qui n’ sont arivès là qui pa l’ moyin do bwâre.
Is-astint fènèyants. Lès sous ni siyint pus…
Is-ont div’nu voleûrs… On lès-a rascodu.
C’è-st aujîy à pinsè. Quand gn-a tos lès djoûs piète,
On fait dès traus dins l’ lune èt po payi sès dètes,
I faut vinde tot ç’ qu’on-z-a. Quand on-z-èst bin blanki
Èt qui, d’dins lès botiques on n’ trouve pus pont d’ crédit,
Si l’on rote su l’ vî pîd, si l’on n’a nin coradje
Do quitè l’ cabarèt èt do r’prinde si-t-ovradje,
I faut volè lès djins ou bin z-alè d’mandè
Ca gn-a pont d’ôte moyin do plu sawè vikè.
Mais, c’èst su l’ cwârps di l’ome qui l’ pèkèt faît l’ ravadje.
Po vos prouvè cléremint qu’ c’è-st-on mèchant breûvadje
Dji dôraî on-èximpe sins-alè lon di-d-ci.
Vos conuchoz Djôsèf qu’astait on bon ovrî.
Dispus qu’il è-st-îvrogne, il èst div’nu bômèl,
Li qu’astait tot scorè èt grêy come one tchandèle.
C’è-st-one cruche di bwèsson. I dit qu’ n’a jamaîs fwim
(Éyu ç’ qui l’ brèsseû va, l’ bolèdjî n’î va nin ;
Ou bin l’ via qui tète bin, come dins li spot, n’ mougne wêre ;
I faut crwâre qui c’èst vrai, pusqu’on l’ dit d’ tote maniére.)
Il a l’ mwin tote tron.nante : quand i vint do s’ lèvè
I faut qu’i bwève li gote po s’aspêtchi d’ tran.nè,
Il a l’ visadje bot’nè èt lès-ouy è covis’
Il a sovint mau l’ coeûr à fwace qu’il è-st-êwis′
I n’a pus pont d’ mémwêre, il a pièrdu l’ jujemint.
Quand i vut s’èspliquè, gn-a nolu què l’ comprind,
I lî faut on quârt d’eûre po r’trouvè quate paroles ;
Li qu’astait si subtil, c’èst come one caracole.
Il èst come tot stoûrdi quand il èst d’vant lès djins
Avou s’ bouche tote au laudje èt dès-ouy d’inocint.
En pus, di timps-in-timps, il a dès droles d’idéyes:
I vèt dès p’titès bièsses couru t’t-avau l’ pavéye.
Tantôt c’èst dès soris, tantôt c’èst dès lapins.
I tape avu s’ baston po l’zî câssè lès rins.
On rît corne dès bossus do l’ vèy insi à l’ tchèsse
Quand on vèt qu’i gn-a rin, èt qu’i crwèt qu’ gn-a dès bièsses.
…Tot d’on côp, v’là qu’i choûte. Il atind dins lès-aîrs
Dès mouchons, dès musiques qui lî djouwait dès-aîrs,
Ou bin i pinse qu’on-ome èst ki cause à s’n-orèye
I s’ toûne tot coûrt dissu… Èt gn-a pont d’ome à vèy ;
Maîs, one minute après, l’ome rivint cor on côp
Lî dîre : « T’ès-st-on voleûr ! Ti mèrites d’èsse o trau,
« Ti m’ sîrès à l’ prîjon. Dji t’ va mète lès manotes. »
Èt vola m’ pôve Djôsèf qui tran.ne dins sès culotes.
On djoû, dins sès vîsions, i s’avait min.me pindu
Télemint qu’ pa lès jendârmes il avait stî strindu ;
Quand on-z-a côpè l’ cwade, i n’ v’lait nin co comprinde
Qui ç’ n’astait là qu’on rève èt qu’ nolu nè l’ v’lait prinde.
Enfin, gn-a pont d’ bièstrîyes qu’i n’ si mète à l’èsprit.
I n’a pupont d’ somèy, i n’ si saît pus coûtchi.
Ci qu’èst pîs, c’èst qu’ sovint, i tchaît sins conuchance
Èt qui d’on mau caduc, ça prind tote li r’san.nance :
Si visadje èst tot bleû, si bouche va su l’ costè,
I chime come on mwaîs tchin, tos sès niêrs travayait,
Pus i s’ mèt à ronflè corne one bièsse assoméye
Èt d’mère sins conuchance sovint tote li djoûrnéye.
Li médecin qu’ l’a vèyu didins cès momints-là
A dit qu’ s’i continuwe à s’arindji come ça,
Il èst sûr d’î lèyi divant wêre lès osètes.
Tant va l’ casserole au feu qu’on djoû i faut qu’èle pète.
Vos vèyoz bin, Henri : v’là ç’ qui vos pind au nèz
Si vos v’ mètoz come li à vos rimpli d’ pèkèt.
On n’a qui ç’ qu’on mèrite, vos compurdoz sins pwin.ne
Qu’en sèmant dès tchèrdons vos n’auroz pont d’awin.ne,
Èt dji vos consîye fwârt do candji d’ sintimint
Quand vosse cwârps èst co bon ; pus taurd, i n’ s’rè pus timps.
Henri,
Françwès, dji saîs come vos qui li race dès sôléyes
Pa lès djins qu’ pinsait bin n’èst nin fwârt èstiméye,
Qui l’ pèkèt faît do twârt, qui ça rind fénèyant
Qui l’ cia qu’è bwèt brâmint èst brutal èt mèchant,
Qu’i s’ distrût l’ cwârps èt l’âme èt qu’on-ome raîsonâbe
Qui faît on tél mèstî n’èst nin fwârt pârdonâbe.
Quand dji n’aî nin bwèvu, dji comprind fwârt bin ça,
Maîs on côp qu’ dj’a sayi di ç’ sâcrè breûvadje-là
Dji su asôrçulè, dji n’ pinse pus à l’ovradje
Au diâle tote li boutique ! feume, èfants èt manadje !
Totes mès pwin.nes sont èvôye, dji sins tant do plaîji
Qu’i m’ san.ne qui dj’ su intrè en plin dins l’ paradis.
Vos sintoz bin adon qui po fè durè m’ djôye
I faut qui l’ pèkèt sîye, èt dji n’ sais èsse èvôye.
C’è-st-insi qui dji bwès quéquefîye pus qu’i n’ faurait
Èt qui dj’ sus bin pètote quand dj’ sôt’ do cabarèt.
Maîs audjoûrdu, Françwès, ci n’èst qu’ po bwâre one gote :
Dji n’ vus nin, soyoz sûr, mi co mète en ribote.
« C’è-st-on sèrmint d’îvrogne ! » qui vos v’ dijoz tot bas.
Bin ! vinoz avu mi. Si dji manque, vos s’roz là
Po m’ fè sôrti divant qui l’oubion n’ passe li plèce :
Si dji n’ sôrt’ nin pa l’uch, tapoz-m’ foû pa finièsse !
Françwès,
Dji n’îrai nin, Henri, ca tél hante-t-on d’vint-on
Dj’aî peû do fè come vos, do prinde gout à l’ bwèsson.
D’alieûrs, si dj’ vos siyais, vos rîrîz : c’èst tot simpe
Dji n’ s’rais nin bon prétcheû si dj’ mostrais l’ mwaîj-èximpe.