T’ agrinze nin, valet, t’ agrinze nin.
Tu bon vî tins nu rvinrè nin.
L’ tins des longuès chîjes ås côpons
Ku Bon-pa contot s’ les nûtons.
T’ agrinze nin, bwêcèle, t’ agrinze nin
L’ pôve lêd vî tins n’ ruvinrè nin
Lu tins des blamêyes ou feû d’ bwès
K’ t’ avos sougne doul Mariye Crotchet.
Tu bon vî tins, il est bin vôye:
Les ptitès tayes a volant d’ sôye;
Les porcessions, les rogåcions,
Lu gasse pou les cofirmåcions.
Çu k’ est bin vôye nu rvinrè måy.
C’ est nin come les såvadjès åyes,
Les tchacresses et les awoustrèces,
Les cwâkrês èt les rinnes côrrèces.
Çu ki n’ ruvinrè måy est hoûte;
Tul fåt rouvyî, fåt passer hoûte;
Gn è grand dandjî, il est grand tins,
Nosse bon djonne tins, fåt crouchî ddins.
Nosse bê djonne tins, fåt crouchî ddins;
Fåt gouler dvins a grossès dints.
Tins des longuès chîjes ou dancing,
Des diss-djokès et dou mixing.
Clapant djonne tins, fåt gwardjî ddins;
Fåt crouchî dvins a plinnès dints.
Des mutuwèles pou les clinikes,
Et dou scanadje otomatike.
Lu bê djonne tins, t’ î gangnes tu pwin;
Fåt pougnî dvins a plinnès mwins.
Cabin k’ tu sros co ou pwintadje,
Tu mougnes dou bûre èt dou froumadje
Fåt k’ tu l’ aspougnes, fåt k’ tu l’ abresses;
Djouwer avu les copiutrèces;
Prinde des imådjes al sucan’rèce;
Vey les fåtes al rucoridjrèce.
Si tu l’ abresses tout åddulong,
T’ î pus co cåzer a walon
Dou blantchichmint des nwârès çansses,
Des efants k’ on lzî fwêt violance.
Sicrît li 15 di decimbe 1996.