Cwand on djåze di poitchreye, å djoû d’ enute, c’ est po des ståves di 4000 troyes, come li ci k’ ene soce flaminde aveut l’ idêye di vni astaler a Papene (Transene) dine les anêyes 2000.
Cwate meye troye et leus coshets. Nosse mwaisse sicrijheu, dins on papî parexhou dins « L’ Avni do Lussimbork », carcula ki ça fjheut on pwès vicant d’ a pô près l’ mitan des djins ki dmorént sol grand Libin.
Cwarante ans dvant çoula, vocial kimint k’ on aclevéve les pourceas, a Libin minme.
(accint coinrece)
Dji m’ rapele ene troye d’ a fwait les coshets et elle end a fwait ONK. Elle a cmincî del nute. On-z aveut bén veu al nute k’ elle aléve coshler. Ele tchafyive do strin. Ele fijheut s’ ni, ma fwè. Elle a poûssî l’ prumî åtoû d’ meynute. Adon, dji di al feme : « va coûtchî ! Dji dmeurrè, mi, dji waitrè çk’ ele va fé. » Et dj’ a dmoré tote li nute sol bårire. Paski : ele ni s’ delivréve nén ni rén. « Bén, di dj’ dins mi-minme, elle è va co fé, taiss ! » Ele s’ a netyî a 6, 7 eures å matén. Nd aveut avou ONK.
Mins par conte, on ndè yeu ene ki ndè fwait on côp cwate. Mins alôrse, trop gros, ele n’ els a seu fé. I l’ a falou likider, hin. Cwè çk’ on-z åreut fwait avou ça ! Adon, on n’ fijheut pont d’ cezaryinne; ça n’ valeut nén les poennes, don. Todi nén pol valeur del biesse. Ça fwait k’ dji l’ a vindou a on ptit martchand k’ inméve bén tos ces cayets la. Et lu, i l’ a rvindou a onk ki fjheut do botchî, hin, onk di Transene. Cwè çk’ il ont fwait avou ça, la ? Ti n’ åreus seu saler ça, hin : del tchå estchåfêye, hin. Bén il åront fwait del cråxhreye. Dolmint k’ i likidént, zels, et rtrover po boere on ptit pô.
On nd a yeu ene, c’ esteut l’ prumî côp. Elle end a fwait doze. Mins, on n’ esteut nén avår la : on esteut evoye al dicåce a Ambli, dandjreus; – dji n’ sai nén, mi. C’ est l’ londmwin k’ dj’ els a veu : tos crevés. Ele les aveut touwé et rtouwé et spotchî e passant dsu.
Mins cisse-lale, par conte, on côp, ele end a fwait dijh-ût. Saze beas, mins vormint des beas coshets. Alôrse, deus ptits, mins des ptits cayets d’ rén, saiss; vraiymint rén. « On va taper ça evoye, hin, cwè çki t’ freus ! ». Mins l’ vijhene, ki vneut todi al måjhon tos les djoûs, abén, on lyi dit « åy, mins i gn a deus ptits, hin; on va les souker, hin, cwè çk’ on freut avou ça ! » « dinez m’ les ! Dji les ténrè, mi; ça irè. » Elle a ralé avou; ele les a metou dins on ptit vagonet k’ on mete li pwin, la, hin; sol cofe del sitouve al måjhon; ele lezî dnéve des ptits bibrons et tot ça. Et ele les a schapé. Ele les a elvé disca 60 kilos. Mins vraiymint, ene feme k’ inméve tot ça, hin. Ele si rlevéve del nute.
Abén dj’ avans veyou totes sôres di cas come ça, hin
- Et pu i faleut côper les dints.
- Abén åy ! Faleut côper les dints cwand il estént la. A fwait k’ i sôrtixhént, hin, on les meteut dins ene banse, et cwand c’ esteut fwait, ebén on les rpurdeut, on lzî côpéve les dints et pu on les meteut å pés, mafwè, hin. Et pu, ça aléve. S’ on n’ côpéve nén les dints, ebén, i piként les tetes del troye; ele si rlevéve; ele riskéve di les spotchî.
- Ele ni les nourixheut nén s’ on n’ fijheut nén ça.
Et come adon, on n’ conoxheut nén les caisses å coshlaedje. On aveut on ståve; on fjheut ene lodje; et po n’ nén k’ li troye si coûtche conte li meur, et risker d’ è spotchî onk, ebén on clawéve ene tringue – on rondin d’ bwès – a cwénze cintimetes di tere. Come ça, ele si coûtchive e mitan, et les ptits k’ estént avår la, ebén, i s’ schåyént. Et pu i rivnént.
Et il avént leu tete, hin, tchaeconk, hin. Fåt nén croere k’ i nd alént d’ ene a l’ ôte, hin. Alôrse, cwand gn aveut dtrop, come li cene k’ end a fwait dijh-ût, on nd a wårdé saze. Ele n’ aveut k’ doze tetes u catoize – dji n’ è sai rén, mi. On a fwait deus lots, hin; on-z è meteut teter shijh, set d’ on costé, et pu l’ côp d’ après, c’ esteut les ôtes, hin.
On tchipotéve toltins come ça. Mins å cminçmint, adon, on aveut todi bén l’ tins. Do moumint k’ ça payive on pô, c’ esteut tot, cwè.
- Et pu on les vindeut a ké pwès, dedja, ki l’ martchand les vneut cweri ?
- Ebén, a dijh-ût vint kilos, la. Et mi, dj’ els aléve cobén vinde dins les viyaedjes insi, la. Dj’ aveu ene viye Deus-tchvås; on meteut l’ niyêye di coshets padrî, et pu on aléve fé l’ toû, la.
- Et po nouri les troyes, et tot ça ?
- Abén, c’ esteut l’ minimom, hin; ene betråle, et des trukes et tot ça. Et do oidje, mafwè. Et on ptit pô d’ farene di comiece.
Come les ptits coshets, po ndaler pus vite, cwand il estént tot ptits, on lzî fjheut do laecea rconstituwé – do pigmel k’ on djheut ça – et cwand il estént pus gros, des ôtes farenes
Responda da Alfred Wanlin et Julie Leboutte ås Scoles di Bive (scoles pa les scolîs), li 30 d' octôbe