Les dèrènès caresses qui l'solia nos avôye
Duv'nut yesse, mi chène-t-i, comme les baujes d'ène mayon
Quand' li djonne homme qu'elle inme, presse à n'n'aler au lon
El rèclot dins ses brès au momint d'dîre ârvôye.
Elle si vout fé r'grèter et ses deux lèpes di sôye
Si féyenut co pus doûces au momint d'l'abandon.
Li solia li ossi, aux djoûs d'ârriére-saison,
S'arindje po qu'on l'rigrète quand i sèrè èvôye.
Il achève di sucrer les frûts dins les pachis
Et s'caresse fait roudji les tomates dins l'corti,
Li pwès d'Rome, vî djaloux, èn'n'attrape li djanisse.
Li purnale èt l'cwagnoûle, dins l'aye riglatich'nut
Et li scorîye s'ènonde po monter s'blanc câlice
Pus haut qui l'dahlia, qu'elle pinse awè batu.
C'est l'momint po l'cinsî d'ataquer ses rauyadjes
I faut des canadas, po l'salade aux crètons
Qui fait, dins nosse payis, glèter tos les mintons,
Ossi bén dins l'pus ritche qui dins l'pus pauve mwinnadje.
Les èfants sont-st-al fiesse. Do timps do ramassadje,
Is pwatront dins l'fornia qu'les parints alum'ront
Les tirans ramoncelés à fait qu'is sètchiront,
Timps qu'on n' les wét'rè nén, is pougneront dins les satches
Les pus gros canadas, por zèls les mète pèter.
Qui dj'plins l'èfant del ville qui n'a jamais sautlé
A djonds pîds dzeû l'fornia, ni couru dins l'fumère,
Ni brûlé ses p'tits dwèts en r'satchant l'canada
Qu'on mindje po fé quatre-heûres, dins l'boune odeûr di terre,
En s'dauborant les lèpes avou l'bûre di s'tchiantia !
Vos a-dje dit qui m' Parén avait in grand pachi ?
Et qu'dj'avais des cousènes qui riv'nénnt en vacances ?
- Non, dji n'vous nén douviè l'vî ridan à sov'nances …
Dalieûrs, ci romance là, on l'a tchanté mia qu' mi.
Quand les fouyes ont l'couleûr di vîs fiers ènûris,
Mi mârine aprèstéye ses vagons dins l'cûjène :
On va sètchi des gayes, des orèyes di bèguènes,
Et des prunes plein les clôyes alignîyes dins l'forni.
Sus l'plantchî, totes les gammes di couleûr sont machîyes;
Li roudje èt l'vète des pomes, li nwâr des prunes sètchîyes,
Et l'ôr des pwâres di coing qui pârfumenut l'maujo.
Quî est-ce qui n' glèt'réve nén et sinte si linwe qui file
Après l'taute au conrén, les gozètes, les mitchots,
Qui gârniront les tauves aux-z-è fièsses di famile.
Tote ène Vîye (CW1940)/VI
6
Tote ène Vîye, Les Cahiers Wallons lº 32,
Sètembe