Rintréye
Diè ! come li maujone est paujère
Quand nosse pitit y-ome n'est nén là!
Ni côps d'chuflèt, ni côps d'mârtia
Po z-espêtchî qu'on n'féye prandjère.
I n'fauréve nén qu' ça dure tofère,
C'est pîre qu'èn’asile di moyas,
Et ma fwè, dj'inme co cint côps mia
Ore li disdû di m'tante-afaire.
Vol'ci qu'i rintère justumint
Et avou li, l'daladje riprind.
Choûtez 'l qui fait roter s'platène.
Et rouf... vol'là d'dja su mes gngnos
A satchî m'moustache èt m'narène.
Ele vique ci côp-ci nosse maujo !