Quand nos sintrans nos spales div'nu pâr trop naujîyes
D'awè pwârté les crwès qu'on rescontère dins l'vîye,
Quand n's-ârans ascauchî tos deûs l'soû dèl vîyèsse,
Qui les-ans, les chagréns, âront blanki nos tiesses
Qui nos térans bachîyes quand nos nos pormwinnerans,
Come po mia wétî l' têre èwou qu' nos nos r'pwas'rans,
Quand nos brès sèront flauws èt nos pîds bén pèsants,
Nos cœûrs dimèrés djonnes s'inmeront come a véngt ans.
Nos nos r'trouverans nos deûs dins ène maujo d'seûléye,
Et nos n' quiterans pus wére nosse fauteuy dé l'aistréye…
Les pwinnes âront flani vosse bia ros'lant visadje…
Dji vos wè tricotant des tchaussons, des cwârsadjes,
Qui v'vôrîz mète vos-minme aus-èfants d' nos-èfants…
Aus djoûs d' fiesse, plaise-t-a Diè, èchène nos nos r'trouv'rans,
Et à les r'vôy tortos, nos nos radjonnirans:
Nos lèpes ridîront co les minmes mots qu'a véngt ans.
Nos vikerans dins l' passé, pacequi nosse pôve mémwêre,
Ni s'sov'nant pus d'ayîr, nos-ètrinnerè tofêre
A d'viser do vî timps, li cén d' nosse bèle djonnesse,
Li cén èou qu' l'avenîr estait rimpli d' promesses…
Quand i frè bon assez, nos n's-achîdrans d'sus l' banc.
Si l' timps vént a frèchi, ma fwè, nos nos r'sèrerans,
Dji d'mandrè tènawète: « N'avôz nén frèd, Moman? »
En r'montant vosse mouchwè dèl minme djesse qu'a véngt ans.
Mi tiesse, po s'aspouyî, s'cléncerè su vosse sipale,
Mi bouche, sins l' fé èsprès, rif'téyerè vosse massale,
Mi brès, pâr abitude, passerè autoû d' vosse taye,
Mins vos n' mi dîroz pus : « Il est grand timps qu' dj'èrvaye ! »
Et a nos vôy ainsi tos les deûs, nos sondjerans:
Est-ce possibe, po des vîs, d' todi s'inmer ostant !
Vos sorîroz doucemint, èt quand nos nos r'wét'rans,
Nosse rigârd sèrè têre, todi come â véngt ans.
Tote ène Vîye (CW1940)/XXIX
Ciste ouve ci egzistêye eto divins ds ôtès ortografeyes : Modêye CW 1937.29
Tote ène Vîye, Les Cahiers Wallons lº 32,
Todi come a véngt ans