Lu-minme, Pol, qu’aveût-i è s’vère å long pîd ? Onk di cès clapants breuvèdjes vinous d’Ôtriche. On blanc vin sètchî foû dès stwèrdèyes qu’avît mawurî so lès hôtès hèsses dè Danûpe. Portant, tos lès lundis a l’vesprèye, so l’côp d’sîh eûres, i d’hindéve å vièdje, èmon s’cama Gyula. C’èsteût div’nou ine sôr di rite qui Pol n’åreût wèzou måquer sogne dè blèssî l’vi vègnuron qui s’åreût d’mandé qwè. L’ome èsteût sètch èt noukieûs, mågré lès bègnonsd’èctos qu’il avaût d’vou tût’lé tot dè long di s’vicårèye. C’èst vrèy qu’i ‘nn’ aveût sûr souwé treûs côps ot’tant sos lès roukes di sès téres tot l’zès foyant. I d’hindéve è s’cåve, avou s’grand lopo d’veûle so si spale , po poûhî dirèktumint è tonê. I ‘nnè ramontéve ine plinte botèye po Pol s’ènnè raler avou, èt ine grande carafe po vûdî tot dreût, leûs deûs, tot tapant ‘ne copéne, ca Gyula èsteût ine m!yète filosofe. On s’qwitéve on pô macasses, åyant djåsé d’traze a catwaze èt r’mètou l’monde d’adrame.Li vin dè l’ botèye da Pol,i l’fåt bin dîre, chèrvéve a ramouyî l’gosî då djårdinî qwand c’ n’èsteût nin l’pårtchèt d’ rôzîs.Li dièrin côp, Pol aveût trové li vî ome tracassé. I n-aveût , dihéve-t-i, avå l’vinåve, on hopê d’mohones a vinde èt qui n’trovît nol ak’teû. Lès parints morît èt leûs-èfants s’ènn’alît ètasser è l’vèye, divins dès hôtès toûrs di bèton sins-åme,come dès robètes so ‘ne plantche ! A l’plèce dè d’morer la wice qui leûs vîs parints avît todi viké èt fêt frudjî lès téres.Et po qwè ? Po-z-aler tinde a l’ lurcète èt creûre qui lès alowes vos toumront tot rostèyes è vosse boke ? Nonna, mins fêt deûr viker èt i n-a wêre d’ovrèdje Adon, lès pus djonnes s’ènnè vont. Vè lès grossès djoûrnèyes ! N-a pus d’pondeûs, pus d’ sicrinîs, pus d’docteûrs, pus d’infurmières. Turtos èvôye a l’ètrindjîr ! Minme dès cis qu’ont passé cinqwante ans ! « Et dîre,sospiréve-t-i Gyula, qu’lès cis dè l’ ouwès’ pinsèt qu’on l’zî hape leûs-ouhènes !»
Ayîr, ine assoûrdihante muzike amontéve di d’låvå, dè fond dè viyèdje. Dèl muzike ? C’èsteût pus vite in arèdje, on disdut, on bardouhèdje. Come si on maka d’fôdje aveût batou l’fiér sins hatote. C’èst dè l tèkno qui ça s’loume, C’èst çou qu’on fêt d’mî po l’djoû d’oûy, parèt-i. Si ç’ aveût ataké a ût-eûres å matin, c ‘èst qui c’èsteût l’bucsu, parèt Li bucsu, ci n’èst rin d’ôte qui nosse vîye fièsse di porotche come i ‘nn’aveût d’avance d’vins lès crustins payis. Li grand djama, li cråsse eûrèye qui rassonléve åtou dèl tåve dès parints li parintèdje qu’aveût samé tot-avå. C’èsteût « Li » grand djoû d’anèye[1]. Po n’ nin l’aveûr compris, l’impèreûr Djosèf II, pus-« èclèré qui spicologue »si r’trova avou ‘ne rèvolucion so lès rins, lu qu’aveût volou fé toumer totes lès fièsses di porotche li minme djoû d’ l’anèye.
On-aveût sèré li grande roûwe ås-autos po lèyî l’plèce ås toûrnikèts èt ås pormineûs. Dès deûs costés, so lès bwérds, dès martchands avît –st-èmantchî dès balîs. Dès botikês qu’on-î vindéve qui dèl cacaye. On-î trovéve dès tchikes èt dès clicotes, dès sèrèyès plakes èt dès rézeûs… Mins, lès barakîs fît seûre mène ca leûs boûses dimanît plates.
-« Nincen penzem » « pont d’caurs ! » « Nole çans ! »
Lès carousèls toûrnît a mitan vûdes ; pindowes a leû fî d’arka, lès pîpes di plåsse ni corît cåzî nou risse, èt lès grandès popes dè l’ lot’rèye dimanît bin påhûles so leû plantche. Mins, tot l’minme, c’èsteût l’bucsu. Lès-èfants pîlît èt on n’poléve nin tofér dîre nènni. Et li p’tit trin qu’èsteût si assètchant ! Minme a treûs toûrs po l’pris d’ine eûre d’ovrî.
So l’côp d’ cinq eûres, Pol s’aveût rindou so l’fôre. C’èsteût l’moumint qu’i n-aveût l’pus di djins. C’èsteût l’moumint,qu’ après-aveûr bèvou l’cafè, li flouhe si rispårdéve è l’ roûwe. Qu’on r’trovéve dès kinohances èt taper ‘ne copène. Qu’on féve veûy si novèle cote. Qu’on mostréve si novê galant… Et i ‘nn’aveût dèl djin ! Bråmint d’pus’ qui d’ djôye ! C’èst-st-adon qu’ Pol aporçûva Gyula. Li vî-ome èsteût astampé so l’bwérd dèl vôye. Sérieûs, li front règrignî, li tièsse clintchèye èt l’boke lèdjîremint å lådje, i wêtîve ine saqwè inte deûs botikês. Pol s’aprépiha po l’aler saluwer èt l’ priyî a v’ni prinde on vère å ståminèt. Cou qu’i loukîve insi, l’vî Magyar,c’èsteût-st-on neûr nêgue èt c’èsteût, dandjereûs, li prumî côp qu’i ‘nnè vèyéve onk di tot près. L’ome di coleûr èsteût –st-acropiou d’vant on vî cofteû ståré a l’ tére. Il î aveût mètou quéquès posteûres di neûr bwès, dès cingues di pê d’chèrpint èt co dès-ôtès tchin’trèyes. Lès djins passît d’vant sins fé ‘n’ ahote ni minme taper on côp d’oûy so l’pôve martchandèye.
Colme a r’grèt, Gyula s’ lèya èminer disqu’a l’candj’lète dè café, mins, i d’moréve li tièsse avå lès cwåres, pièrdou d’vins sès pinsèyes. Nos-&vans choqué nos pintes. Pwis, après-aveûr passé s’mwin so s’ mustache po ‘nnè horbi l’same, i d’ha come onk qu’åreût djåsé tot seû :
-« Et dîre qu’ènn’ arive tos lès djoûs so dès poûrris batês ! Po v’ni tinre a l’lurcète ‘mon lès capitalisses ! C’côp-chal, li monde è va cou d’zeûr, cou d’zos ! Vormint ! »
Cou d’zeûr, cou d’zos, tûzéve Pol. Mutwèt, mins n’aveût surtoût dès pådjes qu’on toûrnèt èt dès-ôtes qui s’drovèt.