Ciste ouve ci egzistêye eto divins ds ôtès ortografeyes : Rifondant namurwès.
Vey voltî
Li Rantoele,  99,
Vey voltî

 
Dji vôreu bén
M’ aler pormoenner
Dins mi ptit bwès d’ sapéns…
Paretreut k’ i n a vaila on leu
Ki vos magnreut a rletche-doets.
C’ est des prôtes a n’ nén croere,
Mi, dj’ m’ è fote, c’ est nén m’-n afwaire.

Dji m’ î vôreu bén
Aler pormoenner,
Mins dji n’ a nén l’ tins…
Dabôr ki ça m’ costêye
Di dmorer resseré tote li djournêye
Po des minêyes a n’ nén croere.
Mi, dj’ m’ è fote, c’ est nén m’-n afwaire.

Dji vôreu bén…
Mins, n a todi èn oxhea
Ki m’ tchait a spale a ç’ moumint la :
Mes vîs solés ki schapnut,
Li djoû ki s’ pied dins l’ nute…
Et les tienes î sont skerpous !
Adon, dji tådje come enawaire.

Dji vôreu bén…
Dji sondje ki dj’ danse
Dins mi p’ tit bwès d’ sapéns
Avou m’ comere dins mes bresses
Ki m’ è dinreut po totes mes soes.
Dji sereu co pus binåjhe ki li rwè.
Dj’ el ratind, ça  n’ tådjrè pus waire…