Volà qui li dj’vå atrape må ses pates et qui s’ vout coûkî… Lèyon mousse è stå :
— Éh-là, valet, qu’èst-ce qui coulà vout dire ?
— Dj’a må mès pates, dji n’tins pus so mès djambes, dji n’sé pus mi r’lèver…
— Dji m’va houkî l’årtisse [vétérinaire] ; nos veûrons bin çou qui dirèt.
Li vètèrinère arive :
— Dji veû qwè ! …Lèyon, volà ine drogue ; si d’vins treûs djoûs, il èst co coûki, i fàret l’abate !
Li pourcê qu’aveût tot oyoû, arive près dè dj’vå :
— T’as bin étindou, ti deûs sayî di t’rilèver…ôtrumint, is t’vont abate…
— Dj’a bin trop må ; dji n’mi såreû r’lèver.
— Is ont dit treûs djoûs ; ti deûs fè n’fwèce !
Li deûzème djoû, li pourcé rivint près dè dj’vå :
— Èh qué novèles, todi coûkî ?
— Dj’a bin trop må ; dji n’mi såreû r’lèver.
— Is ont dit treûs djoûs ; ti deûs fè n’fwèce ; ôtremint, is vont t’touwé !
Li treûzème djoû, li pourcé rivint près dè dj’vå :
— Èh qué novèles, todi coûkî ? Nos èstons li treûzème djou ! Fè ine fwèce, djan !
— Dji vou bin sayî, po t’ fé plêzîr, mais si n’èst nin åhèye…
— Si ti n’ti r’lève nin, is vont v’nu po t’ touwer !!
Anfin, li dj’va s’rilève… ; à c’moumint-là, Lèyon mousse è stå èt i veût qui li dj’va èst so sès pates.
— Miråke ! Miråke ! djoupe-t-i. Marîye, Marîye, vinez abèye, li dj’vå s’a r’lèvé. Nos alons fé fièsse : qu’on touwe li pourcê à galop !