Wikisourd:Depot/Lucyin/Mareye

Racsegnes sol tecse metou dvins l’ depot

Tite	Mareye
Oteur	François Bailleux
Date do scrijhaedje (do ratournaedje, do rortografiaedje, evnd.)	28 di fevrî 2021
Date d’ eplaidaedje (so Wikisourd)	28 di fevrî 2021
Depôzitaire	Lucyin
Info	rortografiaedje da Lucyin Mahin, e rfondou walon

Mareye

Vinoz, Mareye, i lût l’ beaté ;
Oyoz vs les råskignoûs tchanter
Avå totes les praireyes ?
On ode les rôzes ki sont floreyes ;
I fwait påjhûle patocosté ;
Vinoz, Mareye !
Vinoz, Mareye !

Vinoz, Mareye, e cråmignon ;
Dji sai des si belès tchansons
K’ i n’ a nén des pareyes.
Djans don ! vinoz, pusk’ on vs è preye ;
Hay ! Ni fjhoz nén tant des façons ;
Vinoz, Mareye !
Vinoz, Mareye !

Vinoz, Mareye ! mi sour Aili,
Ida, Dadite et m’ fré Hinri
Vont co fé d’ leus sotreyes :
Schoûtez dedja kéne vicåreye
I moennèt totavå l’ corti !
Vinoz, Mareye !
Vinoz, Mareye !

Vinoz, Mareye, on bea valet
Vos vôreut gruziner ene sacwè^[1]
Tot bas, cial e l’ oraye.
Loukîz ! vola dedja k’ ele reye !^[2]
Ele radjustêye si bouniket :
Vocial, Mareye !
Vocial, Mareye !

1. Mwaisse modêye : vôreut bén v’ grûziner ; ribodjaedje do prono coplemint divant l’ aidant viebe.
2. Mwaisse modêye : ritche rimaedje « orèye » / « rèye ».