Dins l’ timps, les mâtines du Noyé cumincint à mînute èt deurint tote lu nute.
Après sûjint deûs basses messes, one k’astét fète pa l’ dwayin, èt l’ônte pa l’ vikère.
Vès deûs eûres, lès djins ènn’ alint foû d’ l’èglîje èt rintrint à leû maujon, û bin rupassint addé on vèjin.
Totes les familes avint touwè l’ couchèt justumint acrauchi po çu fièsse là, èt il avint fèt lès boudins. Les boudins d’ Noyé su mètint à cûre dins les pêles èt les pêlons.
Lu mougnè au boudin deurét sovint jusca l’ prumîre clêrté. Po fé d’chinde tot çoula, on beuvét do vin û bin, addé les pôves, dins l’ payis d’ Ârlon, on beuvét lu « drëpp », k’astét one sônrte du pèket.
On sondjét ku, durant çu nute là, les biesses avint l’ don du polu cauzè. Mès gn avét nolu ki savét au jusse du cwè k’ les biesses cauzint dins çu sinte nutîe là.
On djét ossu ku, dins ç’ nute là, l’êwe su tchandjét a vin.
Lu djoû du d’vant, les èfants mètint leûs solès au pî d’one crèche u d’vant l’uch du leû tchan.me à coûtchè, afin ku lu Ptit Jézus î mètiche des cayèts.
Si on aurdét dins l’ârmêre do pwin cût du deûs djoûs du d’vant Noyé, èt k’on n’ avét nin tchispaudè, çu pwin là, rastortchè dins do papî, dumeûr’rè bon à mougnè jusca Noyé du l’anêye d’après.
Sorlon des temonaedjes di viyès djins do payis d’ Årlon, ramexhnêyes pa Nicolas Warker e lussimbordjwès et rmetowes e francès pa André Neuberg ki dna å scrijheu l’ åjhmince d’ elzès rmete e walon.