- Bonswâr, non.nonke.
- Hâ !
- Dj'ai v'nu d' bone eûre ènut', pou qu' la chîje nu sôye nin vitement oûte.
- Dj'ai r'trovu pèloû, là, ènut' dul vèsprêye. Dj'aî randaché quausu dins toute la cassine. Et i gn-è n-è, sés', dès nanches, du l' cauve ou gurnî. Il astot stiké dins la p'tite vîye drèsse du tchin.ne qu' èst à l' tchambe durî.
- Dju l' pus bin vèy ?
- Tais' qu' ây, don, taîs' qu' ây. Wête : c'èst deûs côps rin. Poutant, dju t' garantis qu'on n-unn' abatot, sés', du l'ovradje su ène djoûrnêye avu ça.
- Lu mantche, il èst fwaît avu qwè ?
- Avu dul côrîye. Adon t'î amantchos d'in costé in p'tit grifoû. Ç'astot pou z-adaumer la scwâce qu'on r'findot du d'zeûs ou d'zous. Du l'ôte costé, t'avos la lame, avu èn-arondi d'bout qu'on stikot pa‑d'zous la scwâce pou la duscaler. Quu, dins timps, on 'nn' è fwaît avu ftafwaît, dès pèloûs, min.me avu dès-ochês.
— Est-ç' qu'on pèlot su l'aube drèssé ûdonbin qu'on l' foutot djus duvant du c'mècer ?
- Â nèni hin m' fi. Ç'astot bramint pus aujî d' l' apougner du-d-drèssé. On supatot à hôteûr d'ome. Pîs ç' côp-là, on l' foutot djus à l' hatche, a bin wêtant du n' nin l' fer tumer pour li s'acramier dins in toupèt d' côrîyes. Ca adon, i l' falot dusdjoker a l' hatchant fû èt a l'aflachant dins ène trawêye. Adon, on z-apougnot la tiêsse, èt on pèlot lu d'zeûs du l' tronce jusqu'aus grosses brantches. Dès côps, pou z-awèr pus aujî, on gadelot, ça vut dîre qu'on n'abatot nin tchènê à pate, maîs on l' rucèpot à in mète û deûs. Maîs on nu l' soyot nin tout-oûte. Adon, l'aube dumèrot pindu pa in chèrbê après l' broustion du l' pate; ça fjot come ène gade. Come ça, la tiêsse du l' tronce astot à hôteûr èt on n'avot qu' fer d' s'abacher pou pèler (wèyèz l' imaudje). Pou in bê-z-èt drèt tchènê, ça f'jot trwâs quate mètes du longueûr du scwâce. Maîs in côp qu' tu tumos su in laîd crawieûs aube, yink qu' avot créchu d' misére d'awèr poûssé l' long d' l'êwe, û co à dès places qu' i gn-è qui n'adèrèt nin tchin.ne, adon tu n'avos qu' deûs mètes du scwâce, èt co dul sâkée. Timps du l' guère, quand lès djins lodjint l' djâle a leû boûsse, is passint min.me leû timps à tirer la scwâce dès grosses coches (imaudje ciddé). Is mètint la brantche su in blokê, èt s' bouchint d'ssus avu come ène makète.
— Et ça alot vite pou pèler ?
— Ça alot vite pou l' cé qui n' roviot nin d' bouter su l' pèloû, là. In côp qu' t'avos findu ène crauye tout du long avu l' grifoû, i l' falot r'mouwer, sés', lu pougn, du d'zeûs ou d'zous èt du gautche à drète avu la lame tchonkêye atur lu blanc bwès èt la scwâce (imaudje). I gn-avot dès côps qu' ça s' duscolot come pou rire. Ça s' dusmantchot come ène pê d' robète èt l' tchènê astot dusmoussé su pont d' timps. Mais pa dès côps, i gn-avot dès mantches à mète èt à l' nut', valèt, on s'è r'ssintot aus djontères dès pougnèts, sés'.
— Et les scwâces, ç'astot pou qui ?
- Â ça, ç'astot in martchand qui v'not acheter toute la côpe à l' commune. Et li, i payot l'ovradje des djins ou kilo du scwâce. Mais atincion, hin, toute l'ovradje n'astot nin fwaîte pace quu t'avos tiré la scwâce fû dès-aubes, là. I la falot co fer souwer. Mais ça c'èst co èn ôte cayèt quu dj'aurans tout l' timps pou z-è plaider d'mwin.