— À l' fin du l' djoûrnêye, on n'avot nin t'taleûre lu timps du r'prinde alène, ca il astot d' quèstion du vitemint ramasser toutes lès scwâces èt s' lès-amantcher su lès gades à souwin.ne.
- Comint qu' ç'astot fwaît, ça, ène gade à souwin.ne ?
- Pou c'mècer, i falot trovu deûs bèles froutches dins ène ûrêye du côrîyes. On lès-afiantichot a piquèt, on lès piquot dins tère; pis on mètot deûs djantîyes du quate cinq mètes, yène dussu tchèque froutche, qui s' ruwêtint. Ene djantîye, ç'astot ène grosse drète piêtche qu'on loumot insi. Yink dès d'bouts du l' djantîye, on l'adjokot su la froutche èt on pôsot l'ôte dubout a tère. On mètot toudi lu costé du l' pate sur la froutche èt l' costé du houpî a l' tère. Su ç' timps-là, i gn-avot yink qu'avot sté spèner quéques côrîyes û dès p'tites bôles pou fer dès piêtches. On lès-amantchot atur lès deûs djantîyes. Tu wès bin asteûre lu caisson qu' ça f'jot, don. Ç'astot come ène tante drovûye d'ink dès costés. Adon, on-atasselot lès scwâces dussus; nin trop spès, hin; d'jans: 50 çantimètes du hôt, qwè. I n'è falot nin mète du trop peûr qu'èles nu s'aurint yu astchaufé èt qu'èles aurint tchamoussé. Pou fini, ça f'jot ène vraîe p'tite ca.ute. Et quand i gn-è v'not ène bone drache, on moussot vitemint pa-d'zous pou s' mète à l' cwète. On s'assiot su dès p'tits bancs d' pèlozê. On z-î plot min.me fer mîdi in quârt d'eûre, quand on z-astot in pô trop hode timps d' non.ne. C'èst toudi come toudi, don, tu 'nn' avos dès cés qu' î moussint pou bate leû copine min.me qu' i n'aurot plû qu'ène pitite fine walêye û qu' i n'aurot co fwaît quu d' brouwiner, tins. Dju m' souvins co come d'ènut′ du valèt du Mwin.ne: i 'nnî falot wêre, sés', à ç'tia, pou n' nin dire qu' i 'nnî falot pont. Il astot toudi stiké pad'zous la souwin.ne. Èt s' pére qu' astot qui l' houtchot a bwâlant: «Vinau travayer, ti, pou in fènèyant. T'ès co pus fènèyant qu'in djon.ne d'oûrs, quu t' n'ès nin d' Oûr, pourtant[1]. T'aurès dès peûs, mildiu, dès peûs come dès baloûjes.»
- Dijèz, non.nonke, cubin d' timps qu'on lès lèyot à l' souwin.ne, lès scwâces ?
- Ça, ça dèpandot brâmint du timps qu'i f'jot. I lès-î falot toudi lèyu assez longtimps pou la scwâce su bin sêwer. S'i loûjot l' solê dès quate costés, i n' falot nin d' pus d' trwâs s'mwin.nes. Çu côp-là, si t'atrapos ène tèrmine du plûve, i lès falot laîre souwer in mwès èt d'mi jusqu'à deûs gros mwès.
- On f'jot brâmint d' gades à souwin.ne su ène paurt ?
- On-è f'jot jusqu'à tant qu'i gn-avot dès tchènês à pèler, dès cés qui n'astint nin grifés, bin chûr. Wès′ tu bin, hê, lès gârdes vinint grifer lès tchènês qu'on n' plot nin pèler. Maîs dès côps, lu comis du martchand dijot d' pèler dès tchènês qu' astint marqués. Pace quu pouqwè? Pus′ qu'i gn-avot dès tchènês d' grifés, mwins' quu l' martchand avot du scwâces, don, li. Nu rovîe nin çu quu dj' t'aî dit èrsè: lu martchand, li, il avot acheté toute la virêye à l' commune.
- Quî qu' ç'astot çu comis-là quu vous d'jîz t'taleûre ?
— Ç'astot yink du viadje qui v'not fer lanchturne dé lès pèleûs, èt à l' fin, qui lès payot. Ç'astot souvint in caftî. Ciddé, c'astot Tchan du-d-mon l'Agace qui t'nint cafè aus Miséres. V'là, wê, qu'in côp i s' dispute avu l' gârde; èt s' lu traîter d' tous lès noms; èt s' lî dîre quu sa fame astot ène guimbiche. Çut-anêye-là, lès tchènês ont sté comptés, da, c'èst mi qui vous l' dit. Min.me quu la brigâde è sté v'nûye èsprès du Tchèstê; èt on-è r'toûrné toutes lès piêtches pou vèy s' i gn-avot pont d' côp d' grifèt su lès scwâces qu' astint à l' souwin.ne.
Pî-note