1. Tot passant, il a vèyë st-on' ome aveûle dë naissance.
2. Sès scolis li ont d'mandé: "Rabbi (maisse), qui ç' qu'a pètchî, lë ou sès parints po qu'i seûy' vënë au monde aveûle?"
3. Jésus responda: "Nè lë, nè sès parints n'ont pètchî, mins c'est po qu' lès djèsses dè Bon Dië seûynèche mostrées avou lë.
4. I faut qu' nos fënëchions lès ovradjes dèl' Cë qui m'a st-avôyi, dè timps qu'i fait co djou; quand l' nêt vént, nëk' në pout pës travayî.
5. Tant quë dj' sos dins l' monde, djë sos l' lëmîre de monde."
6. Quand il a st-oyë dët çola, i ratcha à l' tère èt i f'ja dè brou avou s' rètchon èt i plaqua lès ouy' avou ç' brou-là .
7. Adon, i li dët: "Va t' lavér èl vëvî d' Siloé" - Siloé ça vout dire: Avôyi-. D'abôrd, il èn'ala èt s' lava, èt, vèyant clér', i r-èn'ala.
8 Adon lès vwèséns èt lès cës qu'avîne l'abëtëde dè l' veuy' dëvant tot ça, paçquë c'èsteut on brëbeu, dëjîne: "N'èst-ce ni l'cë qu'èsteût achid' èt qui brëbeûve?"
9. Dès autres dëjîne: "C'èst lë", co d'z'autes dëjîne: "Non, mins i li r'chone." Lë min.me dëjeûve: "C'èst më."
10. Is li dj'îne adon: "Comint ç' quë tès ouy' s' ont drovë?"
11. I rèsponda: "L'ome qu'on loume Jésus a fait dè brou èt i 'n'a plaqué d'sër mès ouy' èt i m'a dët: "Va 'squ'à Siloé èt lave-të. Insë, dj'i a sti, èt dj' m'a lavé èt dj'a r'trové l' vouwe.
12. Et is li d'mandnèt: "Où èst' ë?" I dët: "Djë nè l' sés ni."
13. On amëna aus Farëzyins ç' t' ome-là qu'aveût sti aveûle.
14. Jëstëmint, c'èsteût on djoû d' sabbat qu' Jésus aveût fait l' brou èt qu'il li aveût drovë lès ouy'.
15. A leû tour' lès Farëzyins li d'mandîre comint ç' qu'il aveût r'trové l' vouwe. Il z'is dët: Il a metë dè brou d'sër mès ouy' èt djë m'a lavé, èt dj' veûs clér'."
16. Là-d'sër, saqwants dès Farëzyins dëjnèt: "Cët' ome-là n'èst ni avou l' Bon Dië, paçqu'i n' rèspèctèye ni l' sabbat." Dès autes dëjîne: "Comint ç' qu'on-ome qu'a pètchî poureût-ë fé dès parèy' mëraukes?"
17. Et i n'èstîne ni d'acôr inte zèls. Is dîrine d'abôrd cor'on côp à l'aveûle: "Et twè, qwè dës' dë d'lë, asteûre qu'i t'a drovë lès ouy'?" I rèsponda: "C'èst' on proféte."
18. Portant lès Jwifs n'ont ni crwèyë qu'il aveût sti aveûle èt qu'il aveût r'trové l' vouwe.
19. Is ont d'mandé aus parints: "Est-ce cët' là vosse fë, quë vos d'joz dë d'lë qu'il a v'në au monde aveûle? Comint s' fait-ë qu'asteûre i veût clér'?"
20. Sès parints rèspondîre: "Nos savons bén qu' c'èst nosse fë èt qu'il a v'në au monde aveûle.
21. Comint ç' qu'i veût clér' asteûre, nos nè l' savons ni. Et qui ç'qui li a drovë lès ouy'? Nos nè l'savons ni non pës. Quèstionéz 'l': il a l'adje; i caus'rè po lë-min.me.
22. Sès parints causîne insë paçqu'is âvîne peû dès Jwifs. Ca lès Jwifs s'avîne mètë d'acôrd po qu' n'émpôrte qui qui r'conëchreût Jésus come èstant l' Mèssie, seûy' tchèssi fou dèl' Synagogue.
23. Volà poqwè lès parints djîne: "Il a l'adje, quèstionéz-l'."
24 Il ont rapèlé on deûzième côp l'ome qu'aveût sti aveûle èt is li ont dët: "Rinds glwère au Bon Dië! Nos savons, nos-autes, quë ç't'ome-là a pètchî."
25. I rèsponda: "S'ël a pètchî, djë nè l' sés ni. Djë sés seûlmint qu' dj'èsteûs aveûle èt qu'asteûre djë veûs clér'."
26. Là d'sër, is li ont dët: "Qu'èst-ce qu'i t'a fait? Comint èst-ce qu'i t'a drovë lès ouy'? "
27. I l'zi rèsponda: "Djë vos l'a d'djà dët èt vos n'avoz ni chouté. Poqwè l' voloz co intinde? Est-ce qu'asârd, quë vos-autes ossë vos vourîz dëv'në sès scolis?"
28. Et is l'ont maltraité èt is li ont dët: " Twè, fais-të së scoli; mins nos-autes, c'èst d' Moyësse quë nos èstons lès scolis.
29. Nos savons quë l' Bon Dië a causé à Moyësse; mins cët-cë, nos n' savons ni d'où ç' qu'il èst."
30. L'ome èl'zis rèsponda: "C'èst vraiymint drole çolà: quë vos n' soyoche ni d'où ç' qu'il èst, èt qu'i m'a drovë lès ouy'.
31. Nos savons quë l' Bon Dië n' choute ni lès cës qui faiynèt dès pètchîs, mins së one saquë crwèt èt faît s' volonté, i li acôrdèye.
33. Au pës grand jamais on n'a st-intindë dîre qu'one saqui ôye drovë lès ouy' d'onk' qu'a v'në au monde aveûle. Së cët-cë n' sèreût ni onk' dè Bon Dië, i n'areût rén polë fé. "
34. Is li rèspondîre: "T'as v'në au monde tot intîre dins lès pètchîs èt të vins nos r'prinde po nos fé l' lèçon." Et is l'ont foutë fou.
35. Jésus a st-apris qu'is l'avîne tchèssi fou, èt, quand i l'a st-oyë trové, i li dët: " Crwès' au Fë d' l'ome?"
36. I rèsponda: "Qui èst-ce, Sègneûr, po quë dj' crwèye dins lë? "
37. Jésus li dët: "Tè l' veûs èt c'èst lë qui t' cause."
38. I dët: "Djë crwès, Sègneûr'." Et i s'abache d'vant lë.
39. Et Jésus dët: Djë sos v'në dins ç' monde-cë po qu'i-n'ôye one dëfèrince; po qu' lès cës qui n' veûynèt ni veûynèche; èt qu' lès cës qui veûynèt dëvën.nèche aveûles."
40. Saqwants dès Farëzyins qu'èstîne avou lë ont intindë cès paroles-là: èt ël ont co dët : èstans n’ dès-aveûles nos èto ?
41. Et Jésus l'zis a dët: "Së vos sèrîz aveûles, vos n'ariz pont d' pètchî. Mins asteûre quë vos djoz: "Nos vèyons clér', vosse pètchî d'meûre avou vos-autes."