1. Chîj djous d'vant l' Pauque, Jésus arëva à Bèthanie où ç' qu'èsteût Lazare quë Jésus aveût fait ravëkér fou dès mwarts.
2. On li a fait on r'pas èt Marthe li sièrveûve à mougnî. Lazare lë, il èsteût onk' dès cës qu'èstîne à l' tauve avou lë.
3. Mariye përda one lîve dë sinbon, dè për nard, èle winda lès pids d' Jésus avou èt èle lès li r'souwa avou sès tchfias èt l' maujone a sti rimpliye dèl' sinteûr dé sinbon.
4. Judas l' Iscariote, onk' dë ses scolis, lë cë qu'il dëveûve rëvinde, dët:
5. "Poqwè quë ç' sinbon-là n'a-t-ë ni sti r'vindë po trwès cints francs qu'on z-areût doné à dès pauves?"
6. Cë n'est ni paçqu'il aveû këre dès pauves qu'il a dët ça min c'èst paçqu' il èsteût voleûr èt, come c'èst lë qui t'neûve lë caisse, i pougneûve dëdins po prinde ç' qu'on z-i mèteùve.
7. Jésus ossë d'abôrd èl'zis dët: "Lèyiz-l' là, èle l'a wôrdé po l' djou dë m'y-ètèrmint.
8. Dès pauves, vos 'n'aroz todë avou vos-autes; mins më, vos n' m'aroz ni todë".
9. Portant, lë masse dès djins a st-aprins qu'il èsteût là, èt i vénre ni seûlmint à cause dë Jésus, mins ossë po vèûy' Lazare qu'il aveût fait ravëké dès mwarts.
10. Mins lès grands prêtes dècëdère dë fé morë Lazare ossë.
11. Paçquë branmint dès Jwifs ènn' alîne à cause dë d'lë èt crèyîne dins Jésus.
12. Lë lèd'dëmwin, lë masse dë djins qu'èstîne vënës àl' fièsse, ont st-aprins quë Jésus roteuve jësqu'à Jérusalem.
13. Is ont prinds dès cochètes dë palmiérs èt is ont v'në l' rèscontrer èt is djoupîne: "Hosanna! Bènë seûy' të, l' cë qui vént au nom dè Sègneûr', lë rwè d'Israèl!"
14. Jésus a trové on p'tët baudèt èt i monta d'sër, sûvant ç' qu'èst scrit:
15. "N'ôye né peü, fèye dë Sion: vocë të rwè qu'arëve, à tchfau d'sër l' polin d'one an.gnèsse."
16. C'èst ça qu' lès scolis n'ont ni comprindire ni dè prëmî côp, mins quand Jésus a sti glorifiyi, is s'ont sov'në qu' ç'aveût sti scrit dë d'lë èt qu' ç'èsteût bén ça qu'on li aveût fait.
17. Lë masse dès djins qu'èsteût avou lë quand il apèla Lazare à sôrtë dë s' tombe èt qu'il fëja ravëké fou dès mwarts li rindeüve oneûr'.
18. Ossë c'èst po ça qu' lès djins vénre en masse à s'rèsconte paçqu'is avîne aprins qu'il aveût fait ç' mërauke-là.
19. Adon lès farëzyins s'ont dët inte zèls: "Vos vèyoz bén qu'vos n' gangnoz rén: volà quë l' monde èst' èvôye rotér padri lë.
20. Jëstëmint, i n-aveûs saqwants Grècs dins lès cës qu'èstîne montés po z-adorer dè timps dèl' fièsse.
21. Is ont v'në 'dé Flëp', qu'èsteût dë Bèthzaïde èl' Galilée, èt vocë ç'qu'ils li ont d'mandé: "Sègneür, nos volons veûy' Jésus."
22. Flëp' l'ala dire à André, èt André avou l' Flëp' l'a v'në dire à Jésus.
23. Jésus l'zis dët: "L'eûre èst v'nouwe oùçquë l' Fë d' l'ome deût èsse glorifiyî."
24. « C’èst l’ vèrité, Djë vos l’acèrtënéye : së l’ grin d’ frëmint n’ tchaît nin mwârt, ë d’meur’rè tot seû,
25. Mins s’ë tchaît mwârt, lès pautes sèront tchèrdjîyes. Lë cë quë vwèt voltî s’ vëkaîrîye, èl pièdrè. Èt l’ cë quë vwèt èvë s’ vëkaîrîye dë tos lès djoûs së l’ têre, ël è trov’rè one bén mèyeûse po todë.
26. Së one saki m’ vous bén choûter èt vëker come djë vos l’ dët, ë-n-a qu’a m’ sûre, èt vélà èwou quë dj’ sèrè, ë sèrè avou më. Së one saki vëke come djë vos l’ dët, më pa li f’rè oneûr.
27. Asteûre, djë so mouwé jësqu’à m’ pârfond ; qwè a-dj’ co à dîre… Pa, chapoz m’ dë m’ daîrëne eûre. Mins c’èst por lèye quë dj’ so vécë…
28. Pa, fioz oneûr à vosse nom. Lë stwèlî s’a drovë, èt on-a ètindë : « Djë lî a todë faît oneûr, èt djë continouerè à l’ fer. »
29. Lès djins qu’èstîn’ véla èt qu’avîn’ ètindë d’djîn’ : « Cèst l’ tonwêre ! » èt dès-otes ; » On-andje lî a causé ! »
30. Jésus a dët : « Cë n’èst ni por më quë ç'vwè là s’a faît ètinde ; c’èst por vos !
31. C’è-st-asteûre quë nosse monde va yèsse jëjé ; c’è-st-audjourdë quë v’s-aloz m’ taper à l’ëch dë ç’ monde cë.
32. èt më quand djë m’ènn’irè dë ç’ monde cë, djë satcherè tos lès djins avou më.
33. Cë qu’ë d’djéve, c’èstot po mostrer comint qu’ël aléve morë. »
34. Lès djins lî ont rèspondë : « Nos-avans aprins pa nos lwès quë Jésus d’meurerè avous nos po todë : poqwè d’djoz : ë faut quë l’ fë d’ l’ome moûre ? Quî èssse lë fë d’ l’ome ? »
35. Jésus l’zeû rèpète : « Lë lëmîre n’ènn’a pës po lontimps à d’meûrer avou vos-otes. Rotez asteûre quë dj’ vos-a tot aprins, quë vos conèchoz l’ lëmîre, dë peû l’ nwêreû n’ vos-apëce : lë cë quë rote sins soyë në sét ni èwou qu’ë va !
36. Asteûre quë dj’ vos-a mostré l’ lëmîre, crwèyoz l’, po qu’ vos fuchîche dès-èfants dè l’ lëmîre » Jésus à bén dët tot ça, èt adon, tot s’ènn’alant on n’ la pës vèyë.
37. Maugré lès mëraukes ossë grands qu'il aveût fait d'vant zèls, is n' crwèyîne ni dins lë;
38. po quë l' parole dè proféte Isaïe seûye së rèyalëséye: "Sègneûr qui èst-ce qu'a crwèyë ç' quë nos avons intindë? Et l' brès dè Sègneûr, à qui ç' qu'il a sti mostré?"
39. ls n' polîne ni crwère paçqu' Isaïe a co dët:
40. "Il a fait leûs ouy' aveûles èt il a radèrë leus keûrs, po qu'is n' veûynèche ni avou leûs ouy' èt qu'is n' compërdèche ni avou leûs keûrs, èt qu'is n' së convèrtëchnèche ni, nè quë djë lès r'frè d'leûs mëséres."
41. Isaïe a causé insë paçqu'il a vèyë s' glwère èt qu'il a causé dë d'lë.
42. Portant, min.me dins lès rëtches, branmint ont crwèyë dins lë, mins dèl' faute dès farëzyins, is nè l' wasîne dire dë peû d'èsse foutus à l'ëche dèl' Synagogue;
43. is in.mîne mia l' glwère dès omes quë l' cëne dè Bon Dië.
44. Jésus l’a dët à tot l’ monde : « lë cë quë m’ crwèt, në crwèt ni à më, c’è-st- l’ cë quë m’a èvôyî qu'ë dwèt crwêre.
45. èt l’ cë quë m’ vwèt, c’èst m’ père qu’ë vwèt
46. Më, djë so l’ lëmîre qu’a v’në d’ssë l’ têre po qu’ tot quî quë crwèrè à më, në s’ piède dins l’ nwêr.
47. S’ë-n-a one saquî quë crwèt à ç’ quë dj’ dë èt quë n’ choûte ni mès paroles, djë n’a ni à l’ jëjer, djë n’ so ni v'në po l' jëjermins po l’ chaper.
48. Lë cë quë m’ rènîye èt n’ vous ni r’çûre cë quë dj’ vos-a faît ètinde, ça sèrè cès paroles là quë vos jëjeront à l’ fén d’ vosse vëkaîrîye.
49. Pace quë ç’ n’èst ni d’ më qu’ dj’a causé, mins l’ bon Dië lë minme quë m’a èvôyî èt quë m’a comandé ç’ quë dj’avo à vos dîre èt vos l’ fer conèche.
50. Et djë sais bén qu' cë quë l' Père a st-ôrdoné, c'èst l' vîye ètèrnèle. Cë quë dj' dës, djè l' dës come lë Père më l'a fé conèche.