E 2021, avou « Li Rantoele » et dandjreus eto des ôtès gazetes, va-z esse adjinçnêye ene bate di mots walons ristitchåves e francès d’ Walonreye.
Vos î ploz prinde pårt, tertos yet tertotes, ki ci soeye tote seule u tot seu, ubén avou des soçon·e·s, dins ene binde.
L’ adierça d’ èç bate la, c’ est d’ ristitchî sacwants mots d’ walon e francès d’ Walonreye. Come di djusse, çoula ecoraedjrè les Walons yet Walones a discovri on vî — et todi vicant — lingaedje del Walonreye, ki c’ est l’ lingaedje walon, nosse « divant-prumî » lingaedje, sapinse k’ on dit cobén.
Ces mots la seront des cis k’ egzistêynut dedja dins les motîs do walon, udon k’ ont ddja stî atåvlés dins des bates di noûmots, u dedja eployîs dins des scrijhaedjes e walon ubén e francès avou do walon dvins. ‒ Vos ploz don ratåvler des mots siervous pa ene sakî d’ ôte, et vos ploz mete pa kî mins ci n’ est nén oblidjî. C’ est vosse tchuze et voste esplikêye ki sont djudjeyes.
Les mots seront relîs paski polant rintrer dins ene des categoreyes cial padzo :
- Ene etimolodjeye interessante, nén cnoxhowe, ey a fé cnoxhe.
- Li manke d’ on mot d’ francès corant volant dire parey (mins waitîz ki l’ mot atåvlé n’ åye nén trinte-shijh meyes sinses).
- L’ aidance do mot po comprinde on costé del tuzance walone.
- Li rapoirt possibe avou l’ acsegnmint e l’ Federåcion Walonreye-Brussele.
- Li beaté (oyi, c’ est tchaeconk si gosse, mins sayîz ki ça soune bén dins l’ oraye).
Po pårticiper, i fåt seulmint evoyî les mots ki vos åroz tuzé divant li 30 di setimbe 2021 a 5 eures di l’ après-nonne, a cist emile ci : nicolaspaultilkin@gmail.com (li sicretaire do djuri del bate). Pårticipåcion acceptåve a pårti d’ on seu mot. Ci n’ est nén Mouze et les vås !!!.
Nén rovyî di scrire li categoreye po tchaeke mot.
Po bén fé, les mots (walons) divrént esse metous dins ene fråze (e francès). Li mî, si vos l’ poloz fé, ci sereut di l’ eredjistrer et di nos avoyî l’ fitchî odio. Vosse fråze pout esse d’ on livea sociolinwincieus « sotnou ». Sins obligåcion.
Vos propôzucions seront, adon, préjheyes pås cwate djudjes do djuri, ki dinront les rizultats viè l’ fén d’ l’ anêye ; dj’ ô bén, etur octôbe eyet decimbe 2021.
Les djuris reliront deus mots po tchaeke categoreye ; dj’ ô bén k’ gn årè dijh mots wangnants. I seront riprindous dins puzieurès gazetes. Ces gazetes la dimandront eto a leus lijheu·se·s di les dire cwand i djåznut francès avou des ôtes Walons (et minme des nén-Walons). Houte di çoula, les wangnants vont, azår, riçure des bistocaedjes : des lives e walon ey on gros biyet u l’ ôte. Li ci k’ årè askepyî l’ meyeu mot del bate wangnrè ddja 100€.
Po pus di racsegnes riwaitant l’ bate, gn a on spepieus reglumint, e francès, sol waibe « Berdelaedje ».
Sicrît li 3 d’ måss pa Lucyin Mahin a pårti d’ on prumî djet evoyî pa Samuël Dumont ; sol Rantoele-papî, gn a kékes målåjheys mots ratournés e francès.