C’ èst l’ prétimps ! Mon djeu todi, li solê a rivenu. Adon, ci n’ èst nin one crake ! On pinséve qu’il èstéve mwârt mês dji l’ a vèyu passè… Èt il a pris tot s’ timps, causu one eûre po fè lès deûs-cints mètes do l’ voye a pîds…
C’ côp-ci, c’ èst vrêmint one bone novèle èt dji va ièsse tote rènondéye an fiant l’ plin d’ vitamines D. « 9 ! Èt vos, nosse dame, vos-èstez an manke savoz ! »… di-st-i l’ docteûr.
C’ èst l’ prétimps èt lès mouchons tchantèt ! Dji n’ va nin cwant min.me mi lèvè asteûre… Dji va fè chonance di dwârmu… chuuut ! Il èst brâmint trop timpe, mês dji mûs'néye dins m’ tchèsse li tchanson dès Beatles « Blackbird singing in the dead of night… »
Milliârd, ci mauvi-la tchante a câssè vos-orèyes, i fêt ostant d’ brut qui les « omes dès poubèles ». Dji n’ dwâme pus qu’ d’ on-ouy, adon dji va m’ lèvè, il èst 5 eûres 30, dji va fè lès chèles do djoû di d’vant… Al fin, c’ è-st-one bèle musike li tchant do mauvi !
Èt do timps qu’ dji fês lès chèles… Nosse prétimps tûse ossi… « Poqwè c’ qui ç-t-ivièr-ci li tchèt da Josline a crotchî l’ pîlau do corti ? I gn-éve qu’onk non di djo ! Quéne afêre, c’èst télmint bè on pîlau… »
C’ èst l’ prétimps èt lès djètons dès-aubes mostrèt li d’bout do nez. Lès cis’ dol haye fwârt avant ! Lès Ligustrum vulgare si foutèt d’ mi avou leûs chichelotadjes èt leûs rizéyes cwand dji r’monte li pazê. « Ayi m’ fèye, nos vikant co… Bin vite, vos alez sofru cwand vos duvrez nos rabinè su 2 côps 50 mètes di long et 2 mètes di hôt, dins on bokèt d’ têre qui distchind a vos fè avère li toûrnis’ èt one chaule qui vos n’ arivèz nin a mète d’ assène ».
C’ èst l’ prétimps, li solê cligne dès-ouys, lès mouchons zoublotèt a deûs èt lès djètons s’ dismoussè… Quéne mérvèye !