Li djoû d’ vosse fièsse, ô bone èt sinte Caterine,
Dji m’ pète è gn’gnos
Po-z-implorè l’ protècsiyon dîvine
On côp po tot.
Dji d’vins d’dja vîye, dji n’a pus tant d’ tchaleûr
Po-z-èspérè
Do p’lu trovu on djon.ne ome di valeûr
Po v’lu m’ mariè ;
Do p’lu trovu on djon.ne ome di valeûr
Po v’lu m’ mariè.
Dispôy lontins, dji quîre et dji raquîre
D’dins tos lès cwins
Èt tos lès djoûs, sins r’protche, dji dis m’ priyîre
À tos lès sints.
Dji pinséve bin qu’i m’ dôrint leû faveûr
Èt qu’ ça m’ vinrè
Do p’lu trovu on djon.ne ome di valeûr
Po v’lu m’ mariè ;
Do p’lu trovu on djon.ne ome di valeûr
Po v’lu m’ mariè.
A certaîns djoû, dji r’prins co bin coradje
Èt dji m’ ranime
Dji promèts, dj’ faîs dès pèlèrinadjes
Ô Sinte Caterine
Probableumint qui dj’ lès faîs sins ferveûr
Sin espérè
Do p’lu trovu on djon.ne ome di valeûr
Po v’lu m’ mariè ;
Do p’lu trovu on djon.ne ome di valeûr
Po v’lu m’ mariè.
On n’ dirè nin qui dj’ faîs one grande twèlète
Po l’s-atrapè
Si d’ tins-in tins dji mèts one bèle vwèlète
C’èst po catchè
Tos lès ravadjes qui pôrint l’zî fé peûr
Èt m’aspètchè
Do p’lu trovu on djon.ne ome di valeûr
Po v’lu m’ mariè ;
Do p’lu trovu on djon.ne ome di valeûr
Po v’lu m’ mariè.
Gn-a nin lontin, dji sinteûve qui mès lèpes
Si rastrindint
Dji sins, dji louque, dji veûs, nom di Copète
Gn-a pus dès dints
Dji dis à m’ mame, c’è-st-on novê maleûr
Qui va co fé
Qui dji n’ troûvrès on djon.ne ome di valeûr
Po v’lu m’ mariè ;
qui dji n’ troûvrès on djon.ne ome di valeûr
Po v’lu m’ mariè ;
Atot riyant, l’ mame do lî rèsponde
Ni t’ chagrine nin.
T’îrès bin vite po lès fé corèsponde
Trovu l’ médecin.
Po 36 francs, i t’ rindrè l’ bone umeûr
Èt to pôrès
Trovu bin vite on djon.ne ome di valeûr
Po v’lu t’ mariè ;
Trovu bin vite on djon.ne ome di valeûr
Po v’lu t’ mariè ;
C’èst vraî, di-st-èle maîs voci bin ôte tchôse
Qui dji r’marque co
Mes tch’vès ’nnè vont èt on dîrèt dol tchaus’
Co su tortos.
Dj’aî du racheté po catchè leû coleûr
On noû tchapê
Po p’lu trovu on djon.ne ome di valeûr
Po v’lu m’ mariè ;
Po p’lu trovu on djon.ne ome di valeûr
Po v’lu m’ mariè.
A l’ fin, dj’el veûs, ô bone èt Sinte Caterine
Dj’ sèrê come vos
Dj’ divrê racheté one novèle capline
Po m’ mète dizo.
Dj’ moûrrè d’vant l’ tins, hoûtez, vos m’ polez creûre
C’èst l’ véritè
Pasqu’on djon.ne ome di n’importe quine valeûr
N’ m’a nin mariè
Pasqu’on djon.ne ome di n’importe quine valeûr
N’ m’a nin mariè.
Sorlon l’ accint noté, li scrijheu shonne esse del Fåmene (payis d’ Forire u d’ Måtche-el-Fåmene).
Si pôreut tchanter so on timbe (viye air) di « Gastibelza » (come « Li cotchessî ») : c’ est l’ minme pîtaedje.