Li djoû d’ vosse fiesse, o boune et sinte Catrene,
Dji m’ pete a djnos
Po-z implorer li proteccion divene
On côp po tot.
Dji dvén ddja viye, dji n’ a pus tant d’ tcholeur
Po-z esperer
Do pleur trover on djonne ome di valeur
Po m’ vleur maryî ;
Do pleur trover on djonne ome di valeur
Po m’ vleur maryî.
Dispoy lontins, dji cwir et dji racwir
Ddins tos les cwéns
Et tos les djoûs, sins r’protche, dji di m’ priyire
A tos les sints.
Dji pinséve bén k’ i m’ dinrént leu faveur
Et k’ ça m’ vénreut
Do pleur trover on djonne ome di valeur
Po m’ vleur maryî ;
Do pleur trover on djonne ome di valeur
Po m’ vleur maryî.
Des djoûs k’ i gn a, dji rprind cobén coraedje
Et dji m’ ranime ;
Dji vos promete et fé des perlinaedjes
O Sinte Catrene.
Probablumint ki dj’ les fwai sins ferveur,
Sins esperer
Do pleur trover on djonne ome di valeur
Po m’ vleur maryî ;
Do pleur trover on djonne ome di valeur
Po m’ vleur maryî.
On n’ dirè nén ki dj’ fwai ene grande twelete
Po ls atraper ;
Si d’ tinzintins, dji mete ene bele vwelete
C’ est po catchî
Tos les ravaedjes k’ elzî pôrént fé peu
Et m’ espaitchî
Do pleur trover on djonne ome di valeur
Po m’ vleur maryî ;
Do pleur trover on djonne ome di valeur
Po m’ vleur maryî.
Gn a nén lontins, dji sinteu ki mes lepes
Si rastrindént ;
Dji sint, dji louke, dji voe, nodicopete
Gn a pus des dints ;
Dji di a m’ mame, c’ est on novea måleur
Ki va co fé
Ki dji n’ trouvrè on djonne ome di valeur
Po m’ vleur maryî ;
ki dji n’ troûvres on djonne ome di valeur
Po m’ vleur maryî ;
Etot riyant, èm moman do m’ responde
Ni t’ tchagrene nén.
T’ irès bén vite, po les fé coresponde,
Trover l’ medcén.
Po trinte-shijh francs, i t’ rindrè l’ boune oumeur
Et to pôrès
Trover bén vite on djonne ome di valeur
Po t’ vleur maryî ;
Trover bén vite on djonne ome di valeur
Po t’ vleur maryî ;
C’ est l’ vraiy, dit-st ele mins voci bén ôte tchôze
Ki dji rmarkêye
Mes tchveas ndè vont et on direut del tchåsse
Co so tertos.
Dj’ a dvou ratchter po catchî leu coleur
On noû tchapea
Po pleur trover on djonne ome di valeur
Po m’ vleur maryî ;
Po pleur trover on djonne ome di valeur
Po m’ vleur maryî.
A l’ fén, dj’ el voe, o boune et sinte Catrene
Dj’ serè come vos
Dji dvrè ratchter ene tote novele caplene
Po m’ mete dizo.
Dj’ mourrè dvant l’ tins, schoûtez, vos m’ poloz croere
C’ est l’ verité
Pask’ on djonne ome di tolminme kéne valeur
Ni m’ a maryî
Pask’ on djonne ome di tolminme kéne valeur
Ni m’ a maryî.
Sorlon l’ accint noté, li scrijheu shonne esse del Fåmene (payis d’ Forire u d’ Måtche-el-Fåmene).
Si pôreut tchanter so l’ timbe (viye air) di « Gastibelza » (come « Li cotchessî ») : c’ est l’ minme pîtaedje.
Rimetaedje e rfondou et mintén des rimes
- Li rmetaedje e rfondou fwait piede bråmint des rimes, foiravant les cenes rashiowes so les infinitifs del prumire, deujhinme et troejhinme trokes avou -è dins l’ accint coinrece, ki ça î rime eto avou les cawetes di codjowaedje di l’ indicatif futurrece (to pôrès) et do condicioneu (ça m’ vinrèt). E rfondou : -er pol prumire (atraper), -î pol deujhinme (catchî), -yî pol troejhinme (maryî) ; -ès pol futurrece (to pôrès) ; -reut pol condicioneu (ça m’ vinreut).
- Li betchfessî oe, a môde di Lidje dins l’ mwaisse modêye (creûre) î pout rimer avou l’ cawete -eur (valeur) ; parey avou peûr (ki l’ R å coron fond e rfondou, et l’ mot divni « peu »).
- Les ôtes rimes sont wårdêyes (cwîr / priyire ; Catrene / divene / caplene ; djnos / tot / vos / dizo ; twelete / vwelete ; coraedje / perlinaedje ; nén / medcén) u a pô près (cwéns / sints ; rastrindént / dints).
Tant k’ å rplaeçmint des pronos coplemints divant l’ aidant viebe, ça s’ a polou fé sins må sins rujhe :
- po p’lu m’ mariè → po m’ pleur maryî
- vos polez m’ creûre → vos m’ poloz croere