On câbarèt, â mitant â fond li poitte dèl rowe. A gauche ine poitte, à dreute ine finièstre so l'rowe. Li candeliètte à dreute dèl poitte dâ mitant. Des tâvlê èt dès chèire comme divin lès câbarèt.
sinne 1
FIFINE (tote seule, avou breuste èt sèïllai)
Sainte Vierge qui j'sos nâhèïe! mais j'a quasi fini ;
Ji m'va vite disxhombré, ca lès onbâde vont v'ni.
(Elle chante tot frottant)
Tot comme on clâ d'ceûvre
Tot a fait r'lûrèt,
Quand c'èst mi qui xheûve
Fât qu'tot seuïe bin nèt.
Arincrèt, poussîre,
Chinisse et ploumetion
Dèl mohonne ètîre
Po l'joû d'houïe bagueront.
- (Elle s'arrèstèie on moument puis s'mètte à tusé).
Mais portant, quand j'y tuse, ji sos cial bin d'seuleïe!
Noulu n'pense mâïe à mi ; ji n'sos rin mi, c'èst vrèïe,
qu'ine pauvre pitite crapaude qui nou galant n'vorèt!
Si Josèph l'euxhe sèpou… Mais mâïe il n'èl sârèt...
Sur qu'il m'âreut r'bouté, bin qu'cial â fond di m'cour
Ji n'tuserè mâïe qu'à lu; ci sèrèt m'seule amour.
E cachètte di Marêïe ji m' console tot plorant ;
Li bon Diu fereut 'ne bèlle grâce bin sur tot m'rihoukant.
(Elle chante tot plorant).
Tot comme on clâ d'ceûvre
Tot-à-fait r'lûrèt,
Quand c'est mi qui xheûve
Fât qu'tot seuïe bin nèt.
Arincrèt, poussîre,
Chinisse et ploumetion
Dèl mohonne ètire
Po l'jou d'houïe bagueront.
sinne 2
FIFINE — JOJET
- JOJET (tot-z-entrant).
Oho! v's chantéz dèjà, c'èst vrèïe qui c'èst jou d'fièste!
La, qu' j'arawe, vos ploréz! Qu'avéz-ves co ‘ne fèïe èl' tièste?
Jan, jan vola qu' c'èst tot… mi pauvre pitit poïllon!
(Elle li vout rabrèssî).
Ni sos-je nin comme voste mame? qui l'bon Diu lî seuïe bon
Qu'avéz-ves, jan dihéz mèl ; c'èst co sur po 'ne chinterèïe.
Ji m'laireu côpé l'deugt qui c'èst voste soûr Marèïe!
Eïe, mon Diu, quél l’displi! lèïz-le po çou qu'èlle èst.
Jan racontéz-me ine gotte tos vos p'tits secrèt Mawèt.
FIFINE (a pârt).
V's'èstéz trop fènne por mi!
(a Jojet) Qu'èst-ce qui ji v's poreu dire?
Ji n'a rin mi, Jojèt. Voléz-ves on vèrre di bîre ?
JOJET
Ji n'a rin dè monde seu.
FIFINE (a pârt tot-z-allant a l’candeliètte).
Elle aimereut mî l’pèquet,
Dè costé dèl botèïlle gna sès ouïlle qui boirgnèt.
(a Jojèt)
Voléz-ves ine pitite gotte?
JOJET
Aouè; c'est bon po l's ouïlle,
Ca ji n’èl sé odé. Mais lès gins po l'jou d'houïe
Sont pôr si mâ pensant !
(Fifine lî vude li gotte).
(Jojèt trempe si pauce è verre li mette è s'boke et frotte si ouïlle avou 'ne autre deugt).
Ji n'èl dis nin por vos.
Ils m'traitèt d'ragognasse! (jeu) El rowe ji lès hé tos. (jeu)
Mi seul ratrai c'èst cial, (èlle beut on cop so l'costé).
Et vos avéz bin toirt (jeu)
Di voleur mi câchi çou qui v's tourmètte si foirt.
Est-ce voste soûr ? Jan d'héz mèl ! Pah tot l'monde èl sét bin !
Pah, c'èst vos qu'èst s' sièrvante ! Elle vi mônne comme si chin.
Elle n'areut nin bai jeu si j'èsteu st-è voste plèce;
Por sûr qui j'lî rendereu tote li mannoïe di s'pèce.
(Elle beut).
(Souèiement) C'n'èst nin po v's èfoué savéz qui j'dis çoula.
Qui l'bon Diu m'è présèrve, ji n'sos nin d'ciste sôrte là.
FIFINE (entre deux air).
Nènni, nos l'savans bin.
JOJET
Mais çou qui me fait dèl pônne,
C’èst di v's vèïe si d'seulèïe ; loukiz, quand jèsteu jônne.
Edonc (èlle rilèche li vèrre)
FIFINE
Qui gn’aveut-il ?
JOJÈT (tot riant).
Ji m'è sovins todi !
J'aveu co traze galant! Xhoutéz fât s'divèrti.
N'avez 've s mâïe avou nouque ? (Fifine ni respond nin).
Jan donc rèspondéz 'ne gotte!
FIFINE (triste).
Nènni, Jojèt, nènni.
JOJÈT
Alléz, vos èstéz 'ne sotte!
C'est l'plaisir del jônnèsse, mais çoula n'a qu'on temps…
Ossu qui s'ènnè passe, ji v's dis qui c' n'èst nin ‘ne gens !
Les feumme vèïéz-ves, Fifine, ont co trazè piçeure
Po z' adawî lès homme. A galant 'lles vis fait creure
Qui l'poïlle pond so lès sâ. Tot fi pareil qu’â stau
Elle jouèt st avou z’s èlles ; ils sont pôr si bâbaud
(Elle chante)
Quand j'èsteu jônnètte,
Ji m'è sovins bin,
A chaque ine clignètte,
Çoulà n'costéve rin.
So m’ deugt par dozaîne
Ji v's lès féve rimni,
Tos c'èsteut da maîne
Grand, gros, maigre ou p'tit.
- FIFINE (a pârt)
V eiez-ves li vèïlle souèïe ! Jâséz ‘me co dès bigotte !
(Elle va-st-a l' candeliette).
Po ‘nnè savu pus long, ji va lî r’tapé ‘ne gotte
(a Jojèt) Vo ‘nn’ îréz nin so ‘ne jambe ? (Elle lî vude)
JOJÈT
Nènni, v’s avéz raison,
Mais c’èst po mi stoumac (à part) Quand ‘le ne coste rin, c’èst si bon.
(Elle chante)
C'èst ine grosse bièsterèïe
Di s’ mètte on loïen
Lès hommes fèt pâreil
Ils n’ nos aîmèt nin
Vos èstéz jônnètte
Sovenéz-ves è donc bin
A chaque, in clignette
Çoulà n’costèïe rin.
(Elle vude si gotte)
- FIFINE
Mais avou tot çoula, v’s avéz d’manou jônne fèïlle
- JOJÈT (d’ine air dévôt)
N’ a-j’ nin l’Bon Diu por mi ? J’a si bon quand j’èl prèïe.
- FIFINE (à part)
Aouè parce qui fât bin. Quand l’diâle èst dimnou vî…
Tot l’monde kinoxhe li spot !
JOJÈT
Gn’a l’ salut qu’èst k’mencî
Ji m’save dire treux pater.