Les picaedjes avancèt rade. Mins gn a co todi des djins ki sont mwais. Des cis k’ i gn a ni s’ vlèt nén fé piker. Et pocwè ?
Il ont peur. I n' sont nén dacoird avou les sôres di picaedjes Astra Zeneca, ki amoenne des mwais cayets po nosse coir (des alots d' sonk e cervea).
L’ ahike, c’ est k’ les djins schoûtèt les pretchaedjes di des cis ki n’ î conoxhèt rén. Mins c’ est ki : ces djins la rastårdjèt tot l’ bazår.
Portant, les payis sont dacoird etur zels. Li Beldjike est l’ cénkinme pus avancî payis dins l’ schåle des picaedjes. C’ est bén !
Les 75-ans et dpus, c’ est fwait. Et padzo ossu ! On est dins les cwarantinnîs [quadragénaires] po l’ moumint et on va cmincî les djonnes !
A ! les djonnes ! Elzès fåt piker ossu, ca c’ est les cis ki sôrtixhèt bråmint et ki rispårdèt l’ minêye. Bén åy. I fjhèt l’ fiesse, et c’ est nén rén !
Mins gn a ene boune novele dispu ci samwinne ci : les chifes baxhèt. On disreclôt [déconfine] pitit-z a ptit. Oufti ! Gn a ddja pont d’ må !
Les djins rsôrtixhèt ås tchereyes des cafès. On-z erva dins le botikes (mins nén co po tot). On pout minme raler å resto.
Al måjhon, nén dpus di cwate djins a vosse tåve, hin !
Dins les parks e l’ capitåle, c’ est l’ foleye des rabindlaedjes a n’ è pus fini… Et pu cwè !?
Les policîs ont foit a fé… et s’ vlèt i adji. Oyi, mins c’ est des respondaedjes et des forbataedjes ki tournèt padecô a aiwe di vinaigue. Et ci n’ est nén mî !
I fåt viker d’ espwer et s’ rafiyî k’ ça irè mî dmwin. Et fé avancî l’ cayet e schoûtant ey e-n estant droet dins ses botes.
On rdrovrè les areyopôrts : boune novele po les voyaedjeus !
Les condjîs s’ anoncèt bén. Totafwait divreut rprinde come divant po moes d’ setimbe. Dijhans todi kécfeye !
Li minêye shonne dicweli. On l’ laixhrè ndaler sins bén seur li ratni. Mins ele pout co radårer avou des virûsses rascandjîs ki les picaedjes ni rascovrèt nén. Alôrse, continouwans a shure les waerantixhantès djesses [gestes-barrière] po co prinde si distance avou leye.
L’ Urope vént å scour des pus pôves payis. On evoye des masses e-n Azeye. Des picaedjes ossi.
Mins a costé d’ ca, les Flaminds ont peur : gn a on sôdård k’ a mancî on virolodjisse avou on fizik. On cwirt après lu dins on bwès d’ 12 ectåres. T-i possipe, bén seur !? C’ est a n’ nén croere, dowô ? Les djins divnèt fôs a loyî.
Boun esté, bons condjîs ; purdoz sogne di vozôtes tertos !
avoyî li 22 d’ may 2021 pa E.G. (ki n' vout nén dire si no); rarindjî et recråxhî ene miete po l' eplaidaedje dins l' Rantoele.