- I n’ faut nin n'ner ça à Tibî Mèyî...
Dins l' timps, i gn-avot, a Viance, in pôve qu'on loumot Tibî Mèyî. Dju n' vous sauros dîre si ç’astot s' vrê nom û in sôbriquèt. I lodjot l’ djâle a l’ boûsse, sapinse qu'on dit; ça vut dîre qu'i n'astot nin ritche. I dmèrot dins ène pitite cayute mètûye djondant lès-ètangs d' Mussi, là qu’on d’jot quu, dins l' timps, i gn-avot yu in viadje qu'avot sté dustrût pa l’ pèsse.
Pou gangner quéques sous, il aturpurnot sakantes kèrwêyes dins lès bwès, pou yink û l'ôte. I ramassot dès coches dins lès paurts du virêye, il è f’jot dès fagots qu'il alot vinde aus djins pour zês ralumer l’ feû, û brûler dins lès tch’minêyes qu'on-z afume lès djambons. Avu lès rames du bôle, i f’jot dès ramons, èt quand i ‘nn’avot in çant, gn-avot in tchèrieûs qui passot èt qui lès purnot. Ç’astot pou chouver dins lès ûjines, dijot-i.
La, wê, qu'in bê djoû, vou l' la tumé su ène anciène êre du faude. I gn-avot du l’ bèle nwâre tère a make. Justumint, Batisse dou Tchesse-mon.nêyes è d’mandot toudi pou sès-êrêyes du fleûrs.
La nosse Tibî Mèyî qu'è rimplit in satch à houpe èt i l’ va pwârtu ou Batisse qui lî è n’né ène pitite dringuèle, come du jusse, don.
Lu Batisse, i f’rot spès û ç’ qu’i s' piêdrot, là, li. Il è passé la nwâre tère avu in p’tit rêdje, èt il è fwêt dès potêyes avu in p’tit broustion d’ jèraniom. Èt i lès-è vindu bê-z-èt tchîr à dès tourisses.
Nosse pére avot veû l' cou d' tan. Ç’astot èn-ome fwârt curieûs su tous lès cayèts d’ bwès. D'ayeûrs, il astot toudi stiké dins lès côpes èt lès virêyes. Èt il avot ça d' bê: i v’lot toudi êder lès malèreûs an l’zî moustrant comint fé pou tirer leû plan tout seûs. « I vaut mî lèzî aprinde à mète ène bricole, qu'i d’jot toudi, quu du l’zî pwârtu in lîve tchôd duspindu.»
Il avot causé du l'afêre du l’ nwâre tère a èn ome d'Anvers’ qui v’not à l’ tchèsse a Bèstin èt qui f’jot dins lès fleûrs.
« Dj'è vus bin tant qu' vous ‘nn’onz, avot-i ruspondu, mês i m’ la faut fine rêdjêye : vous n'onz qu'à la passer come i faut èt s' l'aplèni a satchots d' dîj kilos. »
Dj'avins in vî djâle al grègne, qui n'alot pus. Dju m'avos amûsé à z-è dusmonter lès trwâs rêdjes. Dj'avos ramantché in toûr du plantches tautoû du pus fin, pou fé in câré rêdje come, dins l’ timps, lès djins rêdjint leûs dêrêyes avu, pou tirer lès payètes fû dès grins. Nosse pére m'è voyé pou l’ pwârtu à Tibî Mèyî.
« Wê, di-dj', vous n'aurez qu'à l’ pinde après la mwêsse-viêne du l’ cayute, avu ène tchin.ne, pou z-awèr pus aujî. Adon, vous n'onz qu'à mète du l’ tère du faude dudins èt k’cheûre lu rêdje pou fére tumer a poûssîre su in satch a tère. » « Bin ây ! » avot-i ruspondu.
Dj'avos co bu avu li ène jate du tène cafè, èt l'afêre avot dmèru là.
La vikêrrîe ènn’alot piyime piyame ou viadje, come d'aladje. Nosse pére avot rascontré in côp û deûs Tibî Mèyî, èt s' lî dmander qwè pou l’ rêdje.
« O ! i va bin ! » avot-i ruspondu.
C’è-st-in côp quu dj'avos r’passé pa l’ cayute, pou z-awèr ène banselêye d’èstèles d'abatadje. (Dju savos bin qu'i lès-alot ramasser padrî lès bokions qu'abatint aus hesses ou Miyan Fayis). Duvant d' mousser à l’ cayute, dju tape mès-oûy pa padrî, èt qu’èst-ç’ quu dj' wès ? Lu bê rêdje du djâle qu'astot raboketé avu dès trèyis d' fiêr pou fé ène cadje à lapins !
Dudpîs don, on dit toudi : « I n' faut nin n’ner ça à Tibî Mèyî », quand on-è yauk qu'è co du l’ valeûr, èt qu'on l’ vut n’ner a quéqu’in pou lî fé plêji.
Eplaidî e limero 2.317 del coirnêye « Quand djè n' saîs rin, djè m' tâs » (23 d' fevrî 1993). L' accint noté est l' walon etnike di Transene. Li croejhete est amidrêye, eneviè l' cåzaedje des temoens di ç' tins la.