I n’ faut nin dner ça a Tibî Mèyî

Ciste ouve ci egzistêye eto divins ds ôtès ortografeyes : Rifondant Rasgoutadje 1995 — Feller-Léonard — Rifondou.
I n’ faut nin dner ça a Tibî Mèyî

I n’ faut nin dner ça a Tibî Mèyî

Dins l' timps, a Djimbe, i gn avot in vî pôve k'on loumot Tibî Mèyî. Dju n' vous sauro dîre si ç’astot s' vrê nom û in sôbricot. I lodjot l’ diâle al boûsse, sapinse k'on dit; ça vut dîre k'i n'astot nin ritche. I dmèrot dins ène putite cayute mètuwe djondant les ètangs d' Mussi, la k’on djot ku, dins l' timps, i gn avot yu in viadje k'avot sté dustrût pal pesse.

Pou gangnî kékes sous, il aturpurdot sacwantès kerwêyes dins les bwès, pou yink u l'ôte. I ramassot des coches dins les paurts du virêye, i fjot des fagots k'il alot vinde aus djins pour zès ralumer l’ fû, û brûler dins les tchminêyes k'on-z afume les djambons. Avu les rames du bôle, i fjot des ramons, èt cand i nn avot in çant, gn avot in tchèrieû ki passot èt ki les purdot. C’astot pou chouver dins les ûjines, dujot-i.

La, wê, k'in bê djoû, vou l' la tumé su ène anciène êre du faude. I gn avot doul bèle nwâre tère a make. Justumint, Batisse dou Tchesse-mônêyes a dmandot toudi pou ses êrêyes du fleûrs. La nosse Tibî Mèyî k'a raplènit in satch a houpe èt sul va-t-i pwartu ou Batisse ki lî è dné ène putite dringuèle, coume du jusse, don.

Lu Batisse, i frot spès ûçk’i s' piêdrot, la, lou. Il è passé l’ nwâre tère avu in ptit rêdje, èt il è fwêt des potêyes avu in ptit broustion d’ jèraniom. Èt i les è vindu ses djètes bêzè tchîr auzès tourisses.

Nosse pére avot veû l' coup d' temps. C’astot en oume fwârt curieûs su tous les cayets d’ bwès. D'ayeûrs, il astot toudi stiké dins les côpes èt les virêyes. Èt il avot ça d' bê: i vlot toudi êdî les malèreûs a lzî moustrant coumint fwêre pou tirer leû plan tout seûs. « I vaut mî lèzî aprinde a mète ène bricole, k'i djot toudi, ku d’ulzî pwartu in lîve tchôd duspindu.»

Il avot cauzé d’ l'afwêre doul nwâre tère a èn oume d'Anvers ki vnot al tchesse a Bestin èt ki fjot dins les fleûrs. « Dj'a vus bin tant k' vous nn ôz, avot-i ruspondu, mês i mul faut fine rêdjêye: vous n'ôz k'a l’ passer coumifaut èt s' l'aplèni a satchots d' dîj kilos. »

Dj'avins in vî djâle al grègne, ki n'alot pus. Dju m'avo amûzé a z-a dusmonter les twâs rêdjes. Dj'avo ramwintchî in toûr du plantche tautoûr du pus fin, pou fwêre in câré rêdje coume, dinltins, les djins rêdjint leûs dénrêyes avu, pou tirer les payètes èt les nichtés fû des grins. Nosse pére m'è voyî poul pwartu a Tibî Mèyî.

« Wê, di-dj', vous n'auroz k'a l’ pinde après l’ mwêsse-viêne doul cayute, avu ène tchinne, pou-z awèr pus aujî. Adon, vous n'ôz k'a mète doul tère du faude dudins èt kcheûre lu rêdje pou fwêre tumer l’ poûssîre su in satch sul dagne. » « Bin ây ! » avot-i ruspondu.

Dj'avo co bèvu avu lou ène jate du tène cafè, èt l'afwêre avot dmèru la.

Lu vikêrîye a-n alot pyim pyam ou viadje, coume d'aladje. Nosse pére avot rascontré in côp û deûs Tibî Mèyî, èt s' lî dmander cwè poul rêdje. «  I va bin ! » avot-i ruspondu.

C’esst in côp ku dj'avo rpassé pal cayute, pou-z awèr ène banslêye d’astèles d'abatadje. (Dju savos bin k'i les alot ramasser padrî les boukions k'abatint aus hesses ou Miyan Fayis). Duvant d' mousser al cayute, dju tape mes ouy pa padrî, èt kèçku dj' wès ?

Lu bê rêdje du nosse djâle k'astot rabocté avu des trèyis d' fiêr pou fwêre ène cadje a lapin !

Duspus don, on dit toudi : « I n' faut nin dner ça a Tibî Mèyî », cand i gn è yauk k'è co doul valeûr, èt k'on l’ vut dner a kékin pou lî fwêre plêji.

Note Wikisourd

Tecse prezinté po-z esse eplaidî dins li ptite coleccion di l' SLLW, et rcoridjî shuvant les rmarkes des lijheus.

L' accint noté est ddja mitan standårdijhî po l' Årdene nonnrece (sorlon les prumîs decidaedjes po les mwaissès intrêyes do Rasgoutadje des bassårdinrèces).