Rufrin
Ca ma mére c’èst m’ mariadje;
Dj’ alans touwer la vatche,
Èt pîs ène grosse crausse pouye
Pou fére ène soupe plin d’ bouyes ;
Èt in pèsant couchèt
Du laurd, i 'nn’ aurè spès !
Ây, ma mére, c’èst m’ mariadje ;
Dju vus fére du tapadje.
(û bin)
Ca dumwin, c’èst m’ mariadje ;
Dju va m’ mète à mènadje.
I.
Pou s-aprèter lès nwåces, i faut trwâs grosses sumwin.nes,
A r’chèrer, à brouchter, on gangne bin sa quinzin.ne ;
Et tchaborer au mî
Du l’ cauve jusqu’ou gurnî ;
Rassèrcer lès sokètes,
Et pîs rinde sès mitchètes.
au rfrin
II.
Pou fwére quarante dorêyes, dj’ans scroté lès-ûs d’ tout l’ viadje.
Qué cadau dins la mwaîye ! mon diu qué bê ovradje !
Lu for èst tout roujelant,
Abîye, qu’i n’ sôye brûlant !
Faurot nin pa dès côps
Rosti toute la maujon !
au rfrin
III.
Dj’aî sté tchwâsi ma cote èt fwére dès nouvèles croles ;
Pîs dj’ans houtché l’ curé ; dj’ans louwé éne cariole.
Quand lès fusikes pètront,
On s’rè gaîyes come dès fôs.
Ça f’rèt in bê tapadje
A-z-è sbarer tout l’ viadje.
au rfrin
IV.
Enut′ lu bê Batisse va brûler sa marone
Avu lès vî soçons ; la séne promèt d’èsse bone.
Quand i l’ è abaché,
Ça sintot l’ tchamoussé.
C’èst malèreûs d’ raclôre
Yauk qui vaut d’pus quu d’ l’ôr !
au rfrin
V.
Pou l’ dîner on put dîre quu dj’ans fwaît dins lès rêgues.
Pou ça, il è falu travayer come dès nêgues.
Quand is s’ront bin r’pachés,
Is vont tourtous danser.
Èt s’i gn-è qui sont sôs,
Is tchanterant dès tchansons.
au rfrin
VI.
C’èst pou la nut′ d’après quu dju n’ sis nin trop chûre.
Maîs dès draps d’ lit d’ molton, ça s’rè mî qu’in tas d’fûr.
On wêrè toudi bin.
I parait qu’ ça s'aprind
Pus vite quu l’ catissime.
Èt qu’on troûve vite la rime.
au rfrin
Dumwin c’èst m’ mariadje
Ciste ouve ci egzistêye eto divins ds ôtès ortografeyes : Rifondou walon.Dumwin c’èst m’ mariadje
Crapôdadje (minme tinme)(minme tinme) Nwâces
