Arive abeye, insi; nos frans come a l' barake: les prumîs intrés c' est les mî plaecîs.
Eyet m'-n efant, hon mi ! Ou çki dj’ el va mete, po k' i n' fouxhe nén scwaté dins totes les djins ?
Tén, wai, cåzans è ! Voess bén ! Si ti l' åreus yeu lai e t' måjhon, t' åreus wangnî ene boune djournêye.
Way, mins c' est on laid fotou brocåd ; i n' åreut fwait k' braire, tant k' dj' åreu vnou par ci. On a bén råjhon d' dire : Vive li cavalreye ! å diåle l' infantreye !
Baye lu a tni a ç' pitite feye la, tén ; ti lyi bayrès on sô po ses poennes cwand ça srè houte.
Hê ! ptite feye ! Voloz tni m'-n efant sca ttaleure ? Vos åroz on sô.
Way! tinoz, tinoz ! Vos n' estoz nén biesse, vos! Ki dj' ténreu vo-n efant po on sô; eyet dj' va putete ramasser co pus d' on franc ttaleure. Alez è bouler, feye ! Si vo-n efant vos djinne, metoz l’ e vo potche.
La ene pitite Mareye-Croyon, ça ! Dj' vos fotrè ttaleure on tampon a vo cou.
N' fwai nén tant d' contes ; va-t èzè l' poirter a tni a l' siervante di l' advocåt Bårbî; drola, tén ! Èt-n ome el conoxhe bén.
Tén, wai ! T' as råjhon.
Dispaitche tu, da ! Paski dj' les sint so m' dos : dji so bén seure k' i vont bénrade ariver.
Wayoway ! Dji n' frè k' ene coûsse. (…) Hê, Tejhe ! Vôrîz bén tni m'-n efant on ptit moumint, sca tant k' on årè djeté les liårds ? Hin ? Dj' a peu k' il atrape macsigrogne dins tous ces djins la.
Wayoway, bayîz lu par ci. Avnoz, m' pitit moumouche ! Est ç’ ene feye ?
Non, c' est on fi po l' prumî; i serè poirteu ås satchs avou s' pere.
Avnoz m ' pitit brin d' sori ; avnoz m' pitit brin d' tchet.
Gn a-t i lontins k' il a yeu l' tete ?
Non : dj' lyi a bayî divant d ' vini.
Come i vént bén, hin ! Cobén çk' il a, hon ? I peze come on blok.
Dji croe k' il årè èn an a l' dicåce do Crås-Moncea, eyet il a vnou a set moes, eco.
Ebén, alez ! Come i rshonne Polite, hin ! C' est ddja lu tot raetchî.
Way, il a tot s' nez, la, hin.
Way ; mins po les iys eyet l' minton, i tire pus foirt après vos, po ça.
Tolminme, i tént di s' pere eyet di s' mere. C' est l' principå.
A ttaleure, savoz, Tejhe.
Abeye ! Vén par ci dlé mi. Monsieu Chôze ! djetez par ci, Monsieu Chôze !
Parey, Monsieu Chôze ! Par ci !
Ouxh ! Come il è ploût! Abeye, abeye, Dedefe, ramassans. Ay ! Ti stampes so m' mwin, fotou ropiyeu. Rind on pô ç' dimey franc la abeye, ou dj' ti fote ene marnioufe. Albouneure ! Dj' aveu l' mwin ·dsu dvant ti.
Vouss rinde cisse pîce dijh çanses la, ti, hin, fotou grand låtche !
On est malåde, fi, cwand on rind.
Grand voleu ! Dji l' aveu veu dvant ti, na ! Cwand ti pasrès pa no rowe, t' årès on pavé a t' tiesse, va !
Corans après les carotches, feye, sca leu måjhon. I tapront co, assuré, divant d' rintrer. Kibén çki t' as ddja ramassé ?
On dmey franc, eyet ene pîce di vint-cénk çanses, eyet co des gros sôs. C' est des puyeus, i djetèt del mitraye. Eyet ti, kibén ass dedja ?
Dji n' a nén co conté; corans abeye.
Monsieu Chôze! Hinez co par ci, alez !
Ouxh ! C' est come les gurzeas ; dj’ end a yeu onk so m'-n ouy. Hê, ti ! C’ est on franc. Albouneure, ça. Ay ! mes agaesses ; ti rotes dissu, mannet laid blefåd.
Mete lezès a tes mwins, on n' astamprè nén dsu.
Ouxh ! Vo ndè la co ene nouwêye ! Abeye ! Vouss dimorer trankile, ti, hin ! Va s’ ti rbôrer e-n erî ! Hê ! Ayayay ! Ké puyeus ! C' est des çanses eyet des mastokes. Bon ! i rintrèt ddja. Ralans è ! Dedefe, kibén çki t' as e tote, ti ?
Cénk, shijh, set sôs et dmey e manoye ; eyet co on franc ; eyet co troes pîces dijh çanses ; eyet co on dmey franc ; les lårds sont toplins d' berdouyes. Eyet ti, kibén çki c' est k' t’ as.
Mi, dj' croe k' dj' a bén troes francs et dmey e tote. C' est ene boune camlote, po ça. I nos fåreut ça tous les djoûs po bén fé, hin ?
Way. Cwè çki nos alans fé di tos ces liårds la ?
A ! Laliye ! Ké novele, hon ! Est çki t' as bråmint ramassé ?
Bé oyi, ça va co. A !Mi ? I n a lontins ki dj' n' a nén mindjî do nuk-di-panse. Dji m’ è va rassapiner a blefe di tchén. Dj’ è mindjrè tant ki m' panse srè ossu deure ki m' front.
Modele:Laliye Qué gosse ! End aler mete ses idêyes so l' nuk-di-panse ! Mi, dji n' serè nén si biesse ki ça, mi. Dj' acatrè ene bele cote avou mes liårds, ene å grandès royes.
Bén tén, la rén ! Louke mi, ça, dai, po ene avaricieuse ! Ti n’ direu k' ele ni oize båyî, peu d' aveur soe.
Modele:Laliye Obén ! Dji n' vou nén fé come vozôtes, da, mi ! Rigot, rigot, tot e s' panse eyet rén a s' dos.
Ebén vo les la tote ! Fwai a t' môde. On bådet ki fwait a s’ môde, c’ est l’ mitan di si amagnî. Eyet ti, hon, Dedefe, cwè çki to vas acater ?
Mi ! Èm-n ome m' a dit k' il aveut mindjî des blancs pwins molets fôrés avou do boure, a l' dicåce do Crås-Moncea, et ça po on sô. Bén c' est po rén endon ? On n' si pôreu fé gleter l’ minton meyeumartchî, ti n’ mi forbatrè nén lasdu. Dj' va evoyî m' pitit Djåcot è cweri ene dozinne. Èm-n ome è tchicrè troes eyet mi troes, eyet les efants stronnront l' restant. Eyet nos boerans on pot dsu po les fé dischinde. Ça fwait k' nos soprans a blefe di tchén, …cwand dj' årè yeu rciné avou deus troes vijhenes, å tchocolåt ey ås blancs pwins d' madame.
Vive el bon wangnaedje ! A l' santé do mariaedje ! End irans dju sins boere on côp ? Ç’ serè l’ feye Chôse ki payrè tot. Vive el' mariaedje !
Pî-note