Les paskeyes di ç' live ci kimincèt bén el Walonreye, li prumire eyet l' deujhinme, todi. Mins, do côp, gn a des acteurs ki n' sont nén des Walons di stok ki s' î vnèt stitchî. A pårti del troejhinme, vos seroz pår foû payis. So ene otovoye e l' Andalouzeye, pu e Marok ey e l' Aldjereye.
Dji n' m' a nén sintou l' droet di conter ces spoûles la dins on walon d' viyaedje. Copurade la ki l' accint ki dji m' end a siervou dins "Ene båke so les bwès d’ l’ Årdene" et "Li ptite comere avou l’ blanke camizole", ci accint la est lon des pårlers d' Lidje, et d' Nameur et d' Tchålerwè.
Gn a-t i co dijh djins ki lijhèt li "walon d' Transene" ?
Sicrire avou l' accint d' Nameur a d' Lidje, ki sont ene miete sitandårdijhîs, c' est s' rastrinde otomaticmint å tîce des lijheus d' walon del Walonreye.
Ostant eployî li rfondou walon, ki serè – plait-st a Diu – li walon da tertos, tot s' rafiyant ki, dins sacwantès anêyes, tos les scolîs del Walonreye l' aprindexhe e scole
Pôreut todi vali !