Lu 23 d’Aousse 1914, lès armées almandes èt françèses su rascontrint à Bîve èt s’opözint a livrant toute la matinée du dimadje, in combat ossi sanglant pou lès combatants ku dèstructeûr pou lès djans du viadje. Ene situwacion k’avint counu l’sam’di lès djans d’Pwâtchrèsse, Mêssin, Anlè, Otchamps, Luchy, pou lès pus près.
A Bîve, lès civils ont dvu supwârter dèrant deûs grandes djoûrnées èt ène nute lès pîres atrocités dul pôrt d’ anvahicheus ramplis du hin.ne èt d’ mèpris. Fusyâdes, feus d’môjons, tortures è cruwôtés, rin nul z-î è sté spôrni.yî.
A l’eûre d’anute, an 1999, ou moumint èyû k’onz a wèt kékes inks volu ofru dès sous a leûs trêtes ki, 60 ans pus matin, runi.yint leû patrîe èt su batint conte du lîe, c’èst-a nous-ötes du moustrer k’on z-è co in pö d’fièrté èt du r’counichance pou tous lès cîs k’ont soufru èt ki sont mwârts pou leu payis, leu famille, leus afants èt pou lès djèrméyes a vnu.
I m’san.ne k’il èst grand timps d’aprinde a nös djon.nes ki, eûreûs’mint, nu counichat la guêre k’al T.V., èt ramèmorer ås pus vîs lès dèrs moumints passés tins dès deûs guêres pa leus parints, surtout ou moumint dès batayes coume a Bîve èt ôte pôrt an 1914, èt a von Rundschtet, a Bastogne èt dins l’ Ardène an 1944.
Rusondjèz, cand vous traviêrsèz nôs viadjes a ç’k’ils ont soufru an 14.
Il èst fwêt état, pou nosse cwin, dès dèlits chûvants sul passadje des almands.
| Viadje | Civils tuwés | Måjons grèyîes |
|---|---|---|
| Davdisse | 1 | - |
| Pwatchrèsse | 6 | 95 |
| Bîve | 17 | 72 |
| Moncê | 1 | 26 |
| Grêde | 1 | - |
| Bayamont | 1 | - |
| Tchêrîre | 1 | - |
| Yôle | 1 | 37 |
| Mouzêve | - | 1 |
| Patinî | - | 1 |
| Djèdine | 5 | 17 |
| La Grande Luwate | 7 | 38 |
| Hodrémont | 2 | 1 |
| Nafrêtère | - | 2 |
| Orcimont | - | 4 |
Al gare du Grêde, padrî mon Kune (la pus vyîe måjon dul gâre, k’on loumot Borboûze, dins l’timps), å dulon du vî tchmin d’Bîve a Nayömé, on wèt la tombe particuliére d’in södard françès tuyé a Bîve an 14. In pö padrî, an bordure dul sapiniére Meurisse, i d’mère lès rèsses d’ène colone ki date du 1917, al place èyu k’lès Almands avint ramon.né adon tous lès södards francès èt almands k’ont z-avot atèré plic-ploc, èyu k’il avint tumé, dins lès tchamps après la bataye.
Su ç’ colone-la a 8 pans, on wèt toudi deûs gros blocs du pîre gravés dins lès deus lingues : françès èt almand èt ki djat :
| a-n almand | a francès |
|---|---|
| Zur Erinerung an tapfere deutsche und französische Krieger die in des Kampfen Bièvre am 23 u. 24 Aug. 1914 den Heldentod fur ihr Vaterland starben | à la mémoire des braves soldats français et allemands tombés pour leur patrie le 23-24 août 1914 dans le combat de Bièvre |
Deus kèstions vnat a l’èsprit à lîjant ça.
La prèmîre, c’èst : Poukwè k’ lès Almands ont scrît 23 èt 24 d’Aousse ?
La deujime, c’èst : Coumint k’ c’èst’ a Bîve k’on s’èst batu adon ?
Ène dêrine kèstion, c’èst d’sawè poukwè kul Singlé (Gaston Lucy) m’dijot toudi : " Choûte bin, la, valèt, si lès Françès ont gagni la bataye dul Marne, la, c’èst pask’on s’è batu a Bîve.
Sul moumint, dju d’mèros sèptike d’oyu çu rêzoun’mint-la. Mês, a ça, l’Gaston m’ruspondot toudi :
- Choûte çè k’dju t’dis !
I n’falot nin lî a d’mander d’pus. On l’counichot bin. Piké a vif, i n’mu dumèrot pus k’a kèru pa mi-min.me lès trwâs rusponses.
Co asteûre, dju rinds grâce ou Gaston du m’awè oblidjî a m’pantchî su ène istwâre ku dj’astos lon d’couniche èt ki va m’pèrmète anute du v’z-a côzer .
La prèmîre rusponse èst ôjîe.
La bataye du Bîve è ataké lu dimadje t’ô matin èt è dèré toute la matinée. Duvè onze eûres, les almands fusiyint l’ Pôl Arnould, in nèveu du brèsseû, dulé l’Èlan, an face du l’èglîje. Ene crwa su la façade an’è marké la place jusk’a la nin lontimps.
Ça vut dîre k’a ç’moumint-la, ils astint d’abörd mwêsses du viadje, lès Francès dècampint d’tous costés, abandounant l’viadje ås boches. Lu combat d’Bîve éré sansémint fini. Seûlmint, aradjîs d’awè sté strindus p’ås francès, les boches ont continuwé par après, les brûladjes du måjons, les tuwadjes du djins, les sölrîes. Ça è dèré 2 grandes djournées èt la nutîe, èt l’lindi 24, is tuwint toudi des civils a Bîve èt grèyî des måjons.
Dju n’inturrans nin dins lès dètays. On put trouver tout ça dins lu lîve « L’invasion allemande dans les Provinces de Namur et de Luxembourg » , dès rècits d’èpoke, glanés dlé lès curés èt lès mwêsses du scole. Cand on z-è counichance dès 17 civils mwârts èt dès 72 måjons grèyîes a Bîve, on n’s’ètoune pus d’vèy an 17, les Almands catchî leus crimes a markant s’la colone, les « 23-24 Août » ; c’ére pour zès ène maniére du r’dorer in pö leu blason.
On rouvyîe si vite !
Les deûs ötes kestions sont loyîes èt iles dumandat in tûzadje in pö pus fouyî. Èt d’abörd, la bataye dul Marne, c’ére cand ? A ma grande honte, dj’ê bin dvu bin admète ku dj’n’a savos rin. Dju nn’avos bin atindu cåzer a scole, mês dpwis adon, l’êwe avot bramint couru.
I m’falot don cminci a rassan.ner des lîves la dsus, pî a les lire ; dj’ê don trouvé k’la bataye dul Marne avot dèré du 6 å 13 sètambe 1914, don 3 smwin.nes après Bîve. Après 6 smwin.nes du guêre, les boches ruculint pou s’atèrer dins lès tranchées. Ils alint z-î dmèrer 4 ans.
Lu Gaston avot don bin rêzon, cand i m’dijot dul choûter.
L’adjinç’nadje mètodike des Almands a n-avot pris in cöp a tchèke plûzadje avu les Françès èt cèt-cis avint polu, t’a rculant a fwêt, aprèter la rusponse ki conv’not.
La l’çon d’Bîve (èt d’ôte pårt) avot pwârté. C’èst ça ku l’Gaston vlot m’dire. La râclée des almands s’la Marne avot cmincî à djèrmer dins lès prèmîres batayes, lès cîes ku lès istoriyns ont loumé « la bataille des frontières », du Virton à Willerzie, atère lès 20 èt 23 d’aousse 1914.
Pou ç’k’èst d’sawè coumint k’c’èst a Bîve, èt l’23 d’aousse, k’on s’è batu,(coume dins toute nôs provinces), la rusponse mèrite co in pö d’pus d’counichances.
Si vous vlèz a sawè d’pus, dju vons wêtî d’rapwêrer tout ça a rmontant al guêre du 70, coume lès vîs djint. (1870)
La France vunot d’ramasser ène fameûse toutouye. Ile avot piêrdu l’Alsace èt la Lorin.ne, i lî falot payî lès dètes du guêre èt tchèke francès dvot apwârter l’pö d’ör k’il avot pou chaper l’payis. Leû grandeûr a n’avot pris in cöp èt il z-ï è falu l’timps pou dijèrer ça.
Du leû costé, les Almands s’aprètint al ruvintche k’is plint atinde dul France.
Çut-cile duvrot bin sayî, in djoû û l’öte, du ragritchî lès provinces k’ ile vunot d’lêchî aler.
A l’Ètat-Major almand, lu Marèchal von Moltke, lu nèveu d’Bismark, vlot ku ç’k’il avot gangnî su 6 mwès, i falot å mwins l’årder dèrant 50 ans avu lès fuziks, du peû k’on n’l’î r’hape.
Après 70, i s’sintot fwârt assez pou dèfiyî la France èt co la Russie. Il atakrot la Russie èt i s’dusfindrot conte dès Francès. Mês cand cèt-cis on oyu rpris du poye dul biêsse, il è cminci a tûzer. Sa grande pèpète, c’ére du dvu s’bate du deûs costés anssan.ne.
Cand on z-è deûs tchins a bate, on cmince vitmint p’ou pus ptit èt pîs on s’rutoûne su l’öte. C’èst ène luçon d’toudi. Loû, i sondjot l’contrêre ; i vlot börer dins lès Russes k’i mèsèstimot èt après, su r’toûrner su la France, a poussant dins lès trawées atère Epinal èt Toul pou cmincî èt atère Verdun èt Montmèdy après.
Seûl’mint, lès années passint èt von Moltke courot après sès 82 ans. On z-è don sté kê lu Comte Walderzee ki loû, su dmandot l’ ké dès deus ki srot prèt’ lu prèmî, dès Francès û dès Russes. I n’è nin fwêt grand tapadje a l’Etat-Major,
I trouvot sûl’mint ku, si l’timps tchandjot in pö, mon.ner la guêre an Russie pa du mwês timps, plot duv’nu yôk du fwârt azardeu. Du costé francès, i falot compter avu les fortificacions du Verdun, Toul, Nancy, Epinal, èt Belfort.. Il è don dné ås Almands des canons capabes d’a vnu mwêsses.
On nn’astot la cand Waldersee è lêchî sa place a von Schliefen. Su ç’timps-la, lès Francès s’avint ravèyîs èt leu patriotisme cuminçot a inkièter lès Almands ; il årot p’tète suté bon du r’bate lès cåtes èt du r’wêtî tout ça d’èn’ öte ouy.
Coume lès nouvês ramons chouvat toudi vlatî, von Schliefen tchandje su fuzik du spale èt s’arandje pou draner la France an prèmî.
Coume i s’atindot a ç’ku lès Francès su rgoupinjent duvant l’Alsace èt la Lori.ne, il è don fwêt du Metz ène formidabe forteresse k’alot coumander toute la guêre par ci.
Du costé des Vosges, dupwis la Swisse jusk’à Metz, lu payis fwârt montagneu nu s’prètot nin fwârt a mon.ner des gandes ofansives. Avu wêre du södards, i gn’avot moyin d’î tnu l’èn’mi a cugne tins k’on l’ macsådot d’l’öte costé. Lu tout astot du bin s’intègrer ou tèrin èt du s’î atèrer comufôt.
In pö pus yöt, i g’avot lès deus trawées d’Lorin.ne èt c’èst la, ou dèbut, k’i comptot poûssî l’atake. Mès, coume dju l’ans dit pus yôt, les dèfanses francèses lu fjint frûler.
I n’dumèrot pus k’ène solucion, gangnî lès costés. Du costé dul Swisse, nin grand tchöze a fwêre. C’ére intèrdit èt su foute lès Swisses a dos, ça plot amon.ner bin dèbwâres ås Almands.
Poûssî atère Vèrdun èt l’Lucsambour, c’ére in pö strèt. I n’dumèrot pus k’a vèy pus lådje èt passer cârémant s’la Bèljike, èt tant pîs, si lès Anglès s’î mètint. C’ère co dès parints ! Put’ète k’a lès crèssant bin…
Metz alot don duv’nu la plake toûrnante k’alot mon.ner tt’afwêt. Su la gåtche èt jusk’al Swisse, dj’ans vû kwè. S’la drète, ça alot barder. Nosse von Schliefen wèyot grand. I vlot z-rassan.ner sès pus grandes fwâces duvant les frontiéres du Lucsambour èt dul Bèljike, èt dins in grand mouv’mant, a toûrnant su pawène, i fonçot a traviêrs dul Bèljike pou vnu rakwède lès françès pa padrî. Ça n’duvot prinde ku kékes sumwin.nes, surtout si on provokot l’atake francèse an Lorin.ne. Après ça, i srot co timps d’su r’toûrner su lès Russes.
C’èst a tout ça ku von Schliefen tûzot dins lès années 1894-1900. Et jusk’al fin 1905, cand il è pris sa pansion, i n’è nin arèté d’fignoler dès plans, du tûzer a tout ç’ki plot s’passer.
Jusk’a sa r’trête an 1906, la mwêsse-idée d’awè su sa drète, face al Bèljike, lès pus fwâtes du sès armées, nu l’è jamwês kité.
Dès plans si bin fwêts duvint l’amon.ner. su kékes sumwin.nes, a gangnî la guêre conte la France.. Tout avot sté fwêt èt tout adjinsné pou ça.
Su ç’timps-la, lès années passint èt von Schliefen è passé ossi.
Cand von Moltke (lu djon.ne) l’ è ramplacé, an 1906, il è rpris lès plans ku von Schliefen avot fwêt, mês, loû ossi, c’ére in nouvê ramon, èt pou bin marker sa pösicion, il è volu an plus, massî dès troupes an Lorin.ne pou z-ataker lès Francès èt lès prinde coume dins dès tricwâjes.
In pö trop bê pou z-èsse vrê. Dju vons vèy ku ça è fwâré dès deûs costés.
Adon ku von Schliefen, an 1905, avot su sa drète, 35 cörps d’armée, 7 divisions d’caval’rie, 16 brigades du Lansdwehr èt 8 corps du ranförts, von Moltke an 1914, n’avot pu ku 26 corps d’armée, 7 divisions d’cavalrie , 14 brigades de Landwehr èt pupont d’ranförts ; ku du contrêre, i avot falu voyî 2 cörps d’armée èt 1 division d’cavalrie an Russie. Du 66 grandes unités, on passot a 50, in kârt an mwinsse.
Esse la k’i fåt vèy lu ratadje du plan almand ?
Put’ète bin? Mês, i gn’è nin yu k’ça. C’èst k’èst chûr, c’èst ku pou l’Almand , tout dvot z-èsse aprèté, tout sondjî, tout minuté.
Duvant d’özer, l’Almand, i fåt k’i pèse ttafwêt ; c’èst coume ou tèyâte, s’i n’sét nin s’rôle par keûr , s’i n’l’è nin rèpèté çant cöps, il èst piêrdu. Surtout k’on l’î avot sèriné ku dvant loû, i n’troûvrot k’in foutu plastron d’vitrine ki n’tanrot wêre.
Et cè k’il è trouvé ? Des armées beljes èt francèses, dècidées, ki s’batint su l’leûr, putète avu wêre du plans, c’èst vrê, mês ki savint rèsister fâmeus’mint, boudjî cand i falot, su r’toûrner, catoûrner sins fin èt d’norter l’Almand, èn’ assayant pus fwârt ku zèles, mês sin rèyaccion valabe ossitot k’i gn’avot yôk ki clotchot.
Mètèz co avu ça ku l’Etat-Major almand vlot tout mon.ner, du d’bin lon, usk’on n’ plot må, usk’on vicot bin, sins rin lêchî d’iniciative ås jènèrôs dès grandes unités, souvint dès princes du sang ki n’astint la k’pou l’nom èt la gloriole. In virus ki toutche tous lès Etats-Majors.
Vla ç’k’on put dire du mon.nadje dul guêre du costé almand. Du l’ôdace a rvinde, ène dissipline du fiêr, in plan dès mîs adjinçnés, sins cåzer dul propagande formidâbe mon.née conte du nous ötes.
Lu G.Q.G. Francès èt sès fèblèsses
Et du costé francès, ç’cöp ci ?
L’Almagne, après sès victwâres du 1866 su l’Autriche, du 1870 su la France, vicot dins la ritchèsse. L’idée dul grandeûr almande èt l’instint d’dominacion érint mwêsses partout ; lu rassan.nadje du l’Autriche-Hongrie èt d’l’Italie a fjot ène pwissance dès pûs r’doutabes.
I n’dumèrot pus ås Francès, k’a s’toûrner du costé dul Russie èt d’l’Angletère.
La fameuse ruvintche su l’Almagne, ku tchèke Francès atindot dpwis lontins, èt ki dvot laver toutes les brimades du 70, lu ragritchadje du l’Alsace-Lorin.ne èspèré d’tourtous, avint sté pou l’ peupe francès, coume in cöp de scordjîe ki lès poûssot dins ène fîve patriotike sins prècèdant.
Tout l’monde s’atindot al guêre. L’Europe ére coume ène marmite k’alot sôter d’in moumint a l’ôte ; tchèkin s’a rindot bin compte èt tout lu rmuwe-mènadje dès politikîs dins toutes lès capitales nu plint pus rin ratnu, bin’ å contrêre.
Lès francès s’î avint fwêt, a ç’t’idée la du guêre avu l’Almagne. Des plans avint sté fwêt, pis dusfwêts ; lu dêrin datot du 1913 ; i pwârtot lu nimèro XVII èt astot signé Joffre.
Duvant d’a cåzer, rulvans in pö kékes principes du stratéjie ki vnat d’l’Antikité. Tous lès jènèrôs ont toudi sayî du s’bate èyu k’ils avint l’pus d’chances du gangnî. Il falot toudi rûser, börer dins l’flanc d’l’èn’mi, céder a ène place pou mî avanci a ène öte, wêtî d’atoûrner l’öte dins ses filèts, fwêre cranse du r’culer pou voler s’la crèsse de l’öte, sawè cè k’l’öte sondje fwêre èt l’conrer dvant k’i n’atake, toutes maniéres ki plint antrin.ner la dèbâcle du l’advèsêre.
Lu cî ki pörot l’mî mète tout ça an pratike avot in grand avantadje.
Duvant 14, lès francès avint yu counichance des plans almands pa in yôt gradé k’on z-avot dlêchî mês bièsmint, is nn’ont nin tnu compte. Pour zès, la guêre irot vite ; i falot ataker d’toute fwâce, tourtous assan.ne ; les armées srint dispôsées dul Swisse ou Lucsambour. Pou l’rèsse, on warot bin…Môgré k’is n’astint k’ 37 milions conte dès almands k’astint 60 milions, lès francès nu s’subarint wêre. C’ére leu caractêre.
Û bin, von Schliefen û von Moltke vunot du Nôrd-Est èt on l’djondot dins la trawée dul Mûse, pis on l’atakot an fwace jusk’al Rhénanie pou l’fwêre ruculer s’lès costés. Û bin, i dègarnichot nosse frontiére du l’Est èt c’èst la k’on z-alot l’djonde. Du toutes maniéres, on n’plot pus rataker les coneries du 1870 ; il falot foncî dins l’tas , al maniére des afitches èt dès tchansons ki pronint « lu clairon sonnant la charge » èt « les zouaves qui vont chantant. » On moustrot partout dès réjimants francès , avu la musike, in grand drapeau pa dvant, les oficiers avu leus blancs gants èt lu sabre å clêr, animant les sôdards ki tchèrdjint bayonète ou canon des Prussiens ki rculint
Des imådjes parèyes galvanizint lu peupe francès èt la djon.nesse ki ratindot sa rvintche dupwis pus d’trante ans, pou bouter lu Prussien hörs du France. C’ére put’ète in pö rêver du vèy la guêre insi, mês dins lès yöts, on z-a trouvot pou z-î acwâde.
Surtout ku, an 1911, lu colonel de Grandmaison, chef du 3° burô, lu cî dès opèracions , fujot confèrance su confèrance a prônant l’atake a outrance, partout èt tourtous assan.ne. A l’atinde, i gn’avot k’ça ki plot rèyussi. Et coume i cåzot fwârt bin, i s’a n’è trouvé bramint ki l’ont choûté, min.me dins lès yöts.
Coume loû, i n’wèyint ku l’atake a « l’arme blanche », sins s’occuper d’öte tchöse, ni dul stratéjie, ni dès nouvês fuziks, ni dès mitrayeuses, ni dès canons.
Par conte, dès ötes, pus avisés, su rindint compte du tas d’mwârts inutiles ku çu système-la alot amon.ner. Lu hic, c’èst k’is n’özint rin dire, du crinte d’èsse pris pou dès trouyards, des « sins cran èt sins alant ». Ç’ôrot sté assez pou lès rlèguer du l’Etat-Major dins ène putite vile du garnison èt ça, fièrs coume ils astint, is n’î tnint nin.
Lès sôdards francès, zès, alint al guêre coume al dicåce, ils alint ambrotchî l’ Boche coume ène såcisse èt n’a fwêre k’ène boutchîe. Leu moral astot dzeus tt’afwêt ! …Pou coubin d’timps ?
Ké difèrance avu les almands k’avint apris a s’mète a cwète pou z-avancî, a dèborder putot k’d’ataker d’front, a aprèter l’atake avu les canons, a’siêrvu d’leus mitrayeuses pou clawer les ötes al tère, a s’atèrer putot k’du s’duscovru, èt a passer a l’atake cand l’cî d’an face èst dja fwârt afèbli. Leu seûl dèfôt, c’ére putète du s’crwâre invincibes ; a fjant cè k’on lz’î avot apris, i n’plot rin lz’î ariver.
An 1914, ène armée su compösot du 3 grandes armes : l’infantrie, la cavalrie èt l’artiyrîe.
Å rgard dès guêres du dvant les armes avint bramint tchandjî : dès fuziks pus rapides, pus lèdjîrs, des canons a rcul ki n’su dèringlint pus, coume lu 75 francès.
Çu canon-la tirot 5-6 côps al minute, mês a tir tindu , fwârt èficace su des troupes duscovrues, mês inopèrant conte dès oumes dins les tranchées û dès cibes catchîes.
Il årot falu ås francès dès canons pus pèsants, a pus longue pwârtée, mês is djint k’ils alint ralanti la marche dès troupes èt jin.ner leus mouv’mants. Tout l’contrêre des almands ki, zès, avint ç’k’i falot.
La cavalrie, du costé francès, rugroupot bin souvint coume oficiers, dès nobes û dès richards, abituwés a s’fwêre siêrvu, avu cwirasse èt sâbe, coume duvant Napolèyon, ki n’årint nin duschindu du tchfô pou s’mète a cwète èt tirer in côp d’fuzik. Sès chèfs su wèyint co coume su lès vîes pintures, an plin.ne tchèdje, sâbe å clêr, sins s’rinde compte ku tout ça ére pèrimé dpwis bèle lurète. Brâmint du bla-bla, coume toudi !
La cavalrie francèse n’è wêre oyu d’chance avå la.
La cavalrie almande, lîe, ére pus aguèrie ; ile aparèchot putot coume du l’infantrie a tchfô, ki combatot a costé dès tchèsseus èt dès mitrayeurs, donc bramint pus èficace.
Et l’infantrie ? Ill’ è lu fuzik « Lebel » du 1886 èt la grande bayonète al cinture. On cmince a vèy kékes mitrayeuses, mês on s’a dmèfîe, a France ; ça kchère bramint des bales, ça n’èst nin fwârt prècis ; i gn’è co rin d’té ku l’bon vî côp d’fuzik, su èn’ cibe bin lignîe èt k’on n’rate nin.
Coume abiymint, ène tunue pus d’parade ku d’combat, avu la bleuwe vèste èt la roudje culote k’on wèyot d’å pus lon. I gn’avot bin yu kékes inks pou critiker çu tnue-la, mês lès dèputés s’î acrotchint mordicus, dijant k’la roudje culote, c’ére la France.
Lu caske ? Inconu, on pwâte la caskète. Mètèz lz’î co la grosse capote, lu satch ou dos avu ène pwêre du solés a clös, ène pôle, la batrîe d’cwisine, assiète, gourde èt compagnie, ène coviête èt du lindje, lès cartouchiéres avu lès balles, èco, èco èt c’èst insi k’on vut lès voyî a l’atake ! Pratike, hin, pou passer lès fils du pature !
Lès almands, zès, sont grîjes tirant sul vèrt. Ils ont l’caske a pwinte, in pö bizare, mês bin mèyeu k’ène caskète. Is plat s’fåfiler sins z-èsse rupêrés. Is n’s’ambarassat nin dul boufe ; èle chût padri dis lès « cwizines roulantes » å contrêre dès francès ki dvat fwêre leu popote zès min.me (i parèt k’ça dèvlope lu boun’ èsprit dul troupe !…..)
Ké contraste du yink a l’öte !
Pou lès dèplac’mints, on va a pîd û å trin. (Lu 16 d’aousse, la prèmîre machine almande arivot dja a Libråmont, vinant d’Almagne, pa Gouvy èt Bastogne) Lès ôtos sont rares, putot pou lès jènèrôs û lès pwârteus d’mèssadjes atère lès Etats-Majors.
Dins lès êrs, kékes balons èt kékes putits avions pou z-aller vèy cè ki s’passe duri lès ötes, c’èst tout .
Èt l’artiyrîe. Dès ptits canons d’75 a tir rapide, in fèl canon a tir tindu su ène troupe duscovrue dins les tchamps, mês sins èffèts su dès södards atèrés. In pö dès pus gros canons, mês ki tirat s’lès leûrs, coume a Bîve, û ki s’afagnat coume a Luchy.
Vla, an gros, in ptit portrêt dès antagonisses, leus kalités, leûs dèfôts, leu maniére du vèy la guêre. D’in costé, des almands mètodikes, bin stounés su leu mission, imbus d’leu pwissance jèrmanike ; du l’ôte, dès francès vifs, alèrtes mês sins soucis, eûreus du s’bate pou leu payis, malèreus’mint an rtard d’ène guêre, mês mî capabes du s’aleûrer ås situwacions ki s’prèsantint.
Pou lès chèfs, dès almands intransijants, fujant rèspèctant leûs ordes, nu s’ocupant wêre des contrintes du champ d’bataye ; du l’öte, des chèfs francès ki s’cutchin’tat yink l’öte, frin.nés p’ås politikîs, mês in jènèral Joffre capabe, nin sbarant pou in sou, in pô lade, put’ète, nin trop bin vû pa d’ôcuns, mês rêzouné èt ki n’s’a lêche nin conter.
Asteure ku dj’ans dècrit l’avant 1914 èt lès acteûrs ki vont s’trouver ås prîjes, i nous d’meure a cåzer du ç’fâmeu mwès d’aousse 1914 k’è plondjî nosse påjure Ardène dins la tourmante.
Tout l ‘monde su ratindot a ç’ku ça pète d’in costé û d’ l’öte. I n’falot k’ène tchandèye pou mète lu feu a tt’afwêt. C’è sté Sarajevo !
L’Almagne su proclamot an’ état d’dandjî lu 31 julièt. Lu landmwin, la France fujot parèy èt postot sès södars à 10 km. dès frontiéres.
Les Almands massint atère Aix-la-Chapelle èt Thionville 1 million 140 mille oumes , lès armées ki vont passer s’la Bèljike èt l’Lucsambour pou tôurnér l’armée francèse. Pu bas, atère Thionville èt Belfort, 347 mille oumes pou mint’nu lès francès s’la Lorin.ne.
Lès francès su massat su la frontiére almande, lucsambourjwase èt bèlje jusk’al Mûse, sins co sawè l’costé k’i falot prinde.
Lu G.Q.G. francès s’instale a Vitry-le François ; i rgroupe lu l° burô, ki tint à djoû les oumes, les armes èt lès municions ; lu 2° burô, rassan.ne tout ç’k’on put sawè su l’èn’mi, sès pôsicions, sès dèplac’mints, lu 3° burô s’ocupe dul pösicion dès unités francèses, c’èst loû k’intèrprète lès ordes èt lès transmèt. Coume on r’trouve dins l’3° burô bramint dès adèptes du colonel de Grandmaison, il èst êjî d’vèy la maniére d’aji ku lès francès vont chûre dins lès djoûs a vnu.
Lès Almands ocupat toute la frontière du l’ Olande al Swisse avu Metz coume pivot çantral. Pa dzous Metz, on va catiyî in pö les Francès, pa dzeus, on va foncî a traviêrs la Bèljike èt l’Lucsambour pou vnu raclöre lès Francès dud’ pa drî èt lz’ anèyanti.
Lu Lucsambour nul z-î fwêt pont d’mizéres ; d’ayeurs, les trins, ou Lucsambour, apartunint ås Almands. Dulé Visé, al frontiére olandèze, lès canons bèljes sont pwintés pou lêchî 5 kilomètes de libes conte la frontiére...
C’ére jusse la trawée ki falot ås Almands pou passer Mûse èt dèfèrler dins nosse payis.
C’ére justumint la k’lès almands avint dandjî d’aller vite. Å pus lon k’ils astint d’ Metz, å pus vite k’i d’vint avancî. Tout ç ki lès frin.not la, ralantichot tous lès ôtes.
C’èst in pö pou ça k’il è falu atinde 3 smwin.nes pou lès vèy ariver par ci.
In côp lès ostilités atakées, i falot atinde kékes djoûs, surtout du costé francès, ku la mobilisâcion su dèvlope, ku tous lès södards sûjinjent rassan.nés, abiyîs, a.ustiyîs, rèpartis dins lès unités ; i falot mète a place les trins ki dvint lz amon.ner a place, i falot ku tout l’matèrièl chûje.
Çu timps la è sté mètu a profit pal l’ cavalrie du tchèke camp pou r’couniche lu payis dvant lîe, les routes, les ponts, lès trins èt z-aller ou dvant dul cavalrîe advèrse, èvaluwer lès fwâces du l’öte, fwêre kékes prîj’nîs pou lès fwêre cåzer èt couniche leus unités, r’pêrer lès places dandjreuses, chûre lès mouv’mants èn’mis, survèyî lès routes, su ransègner dlé lès djans dès viadjes pou polu transmète tout ça ou GQG èt a l’infantrie ki cminçot a z-ariver.
Prèmîres supines pou les almands : La rèsistance bèlje dès förts du Liége, du Namur, d’Anvers ralantit èt jin.ne fâmeus’mint lu plan da von Moltke. I dot tnu in pakèt d’södards duvant les förts ; i fåt ratinde ku lès gros canons arivinjent pou lès neutraliser ; les grands carfours coume Lîdje èt Nameur nu plat z-èsse aprintés ; i fåt dustoûrner l’trafic partout èt su ç’timps-la, lès ötes ont l’ôdjeu d’ s’aprèter.
Il è falu 15 gros djoûs pou vèy lès almands s’avançi pou du bon dins nös provinces a routant du l’Est a l’Ouest coume pou gangnî la Mûse duvè Dinant. Ils avancint a èscalier ; lès cîs du Nord pa dvant, su la pus yöte dès marches èt lès ôtes, a d’chindant toudi ène marche pus bas èt an ariére, cè ki d’not ène diagonale k’alot du Dinant à Virton.
Lès francès, dju l’ans vu pus yöt, avint l’orde d’ataker partout èt tourtous assan.ne. La dirèccion k’on lz’î avot dné astot l’ Nörd, rin kul Nörd, toudi l’Nôrd, poussî ou Nörd èt ataker l’Almand partout usk’on l’ troûv’rot. Ça lz’î san.not êjî, pisk’is wèyint lès boches dèfiler après la Mûze ; Ils comptint les prinde sul costé èt lès draner.
Cè k’is n’avint nin prèvu, c’èst k’la dispôsicion almande n’avot k’in kârt du toûr a gåtche a fwêre pou s’trouver face a zès.
L’öte afwêre ku lès francès avint rouviyî, û k’is n’avint nin volu crwâre, c’èst ku tchèke rèjimant almand astot doublé du min.me rèjimant d’rèsèrve, ki siyot pa drî. Si l’prèmî capounot, coume c’èst sté l’cas a Mêssin, lu deûjime ére su place pou z-achèver la b’zougne du prèmî. C’èst ça k’è fwêt leu fwâce dins lès prèmîs rascontradjes.
Vla, dins lès grandes lignes, lès pions mètus a place pou z-ataker la partîe. On n’su rindot nin co compte du ç’k’alot ariver d’in djoû a l’öte.
Ku s’passot-i dins nôs viadjes ?
Après lès pèmîres angouches du dèbut : mobilisacion, mwêjes nouvèles, la vîe avot r’pris, piam-piam. On z-ére a l’aousse ; il falot fåtchî èt rinter les grins. Avu lès oumes vöys, i gn’avot pont d’timps a piêde èt cand lès almands ont arivé, les crupètes d’avon.ne astint co campées dins brâmint dès tchamps, cè ki lz î pèrmètot, a courant d’yène a l’öte, du s’mète a cwète dès tireus.
Dins lès viadjes, kék’inks avint gangnî la France ; lès nouvèles n’astint nin rachûrantes ; i passot dès tchèrètes tchèrdjîes du djans ki s’såvint èt ki djint k’lès almands tuwint èt brulint partout. Srot-ce ène tactike almande pou bouchî lès vöyes èt ralantit l’öte armée ? Nin êjî a dire, mês an 40, ça è rataké d’pus bèle.
On wèyot co souvint dins lès viadjes passer dès södards a tchfô, k’alint pus lon, in cöp dès francès, in cöp dès almands, ki rançounint lès djans. Pa dès cöps, ène algarade atère zès fujot kékes mwârts û blèssîs. Lu 15 d’aousse, la cavalrie SORDET , ki patrouyot dins tout l’Lucsambour è passé Mûse pou z-aller aspaler la 5° Armée k’avançot su Charlerwa.Ile è sté ramplacée sul payis p’ås 4° èt 9° divisions. Et ça è trin.né insi jusk’a dvè l’20-21 d’aousse. Adon, la cavalrie wèyant ariver lès Almands s’è rtiré su France .
La place ére libe pou l’infantrîe s’apougnî.: lès almands k’avint vnu d’drète a gåtche, mês ki tournint å Sud, sitot k’lès francès aprotchint ; lès francès ki gangnint l’Nôrd toute fwâce.
Kî k’ils astint, tous cès södards la ? D’èyu vnint-is ?
I va bin falu v’duner in pö dès chifes. Cèt-cis pöront v’siêrvu si, in djoû, vous v’dècidèez a z-aller fwêre in tour dins lès c’mintîres du Mêssin, Anlè, Luchy, etc.
Vous î rtouvrez, su les tombes francèses, lu niméro dès rèjimants. Et insi, vous pörez rcouniche leu provnance èt l’viadje k’is s’sont batus.
Du costé almand, la IV°armée (Duc Albert de Wurtemberg) - avu lès VIII° corps du Coblence (Rhénanie-Westphalie) èt VIII° corps du rèsèrve duvant Bîve èt Djèdine, lès XVIII° corps du Hesse èt XVIII° corps du rèsèrve duvant Mêssin, Anlè, Otchamps èt
L’organisacion militêre dul France ére particuliére. Purdèz la France, avu Paris d’abörd ou mitan ; du Paris, tirèz dès lignes dins toutes le direccions, coume si vous cöpîz ène dorée. Tchèque boukèt du ç’dorée-la ruprèsantot dès cörps d’armée difèrants.
C’èst coume ça k’on sét ku dins la 4° armée francèse (Général de Langle de Cary), lès unités k’ont vnu sul payis astint :
Lu 9° corps (Général Dubois - Tours) – (17° division – Châteauroux (et 18 ° division – Tours) ki s’est batu à Bîve rassan.not lès conscrits du l’Indre-et-Loire, du Maine-et Loire, du l’Indre, dès Deux-Sèvres et dul Vienne.
Lu 11° corps (Général Eydoux - Nantes) – (21° division – Nantes) et (22° division – Vannes.) ki s’èst batu a Mêssin astot breton, èt rassan.not lès conscrits dul Loire-Inférieure- Finistère èt Morbihan
Le 17° corps (Général Poline – Toulouse )- 33° division – Montauban èt 34° division – Toulouse),ki s’è battu a Anlè , Luchy èt Bèrtrix rassan.not lès conscrits dul Haute Garonne, Ariège ; Gers, Lot, Lot-et-Garonne, Tarn-èt- Garonne.
Vouci lu dètay dès passadjes du tout ça ; « <= » = dumi-tour
| Rèdjimant | Vöye dou 8ime cör almand | Rèdjimant | Vöye doul 4ime armée francesse |
|---|---|---|---|
| VIII/25 | Hodrémont-Yôle | 68-90 | Vrigne-ås-Bwès, Suni, Cérivå (Orcimont) (et li rtoûr) <= |
| 65 | Yôle | 77 | Sint-Mindje / Yôle-Bele-fontinne Bîve (vöye Hodrémont-Tôtiène) <= |
| 28 | Stegne, Bîve, Pusmadje | 90 | Cérivå (Orcimont)- Djèdine <= |
| 68 | Bîve, Hodrémont | 135 | Rchêrîre-Wâji-Bayamont-Lu Moncê-Bîve (viadje) <= |
| 29 | Mirwå, Bîve, Djèdine, Orcimont | 52+60 (rèzèrve) | dumèrat a France |
| 69 | Pondrome, Bîve, Orcimont, Yôle, Pusmadje | ||
| 160 | Pwâtchresse, Bîve, Pusmadje | 137-51A 11ime cör | Pwâtchresse- <= Såcère Pouphan, Corbion, Bouyon |
| 161 | Viyé-l'-Boune-Êwe, Morhet, Mirwå, Wèlin, Soyîre, Djimbe, Pwâtchresse | 4ime div. Cavalrîe | Bîve-Hodrémont-Djèdine <= L.S.P. – Djesponsåt-Måjhire |
| 8ime rèzèrve (25-69-17-30-29-65-28-68) | + 5inme Ulans + 15 et 16 A + 2ime grosse cavalrîye ki sîyat l' 8ime Cör | 9ime div. cavalrîe | Nolèvå <== Bayamont <= Hodrémont <== |
Dju n’vons nin intrer dins lès dètays du combat d’Bîve. Dj’ans dja dit ku lu lîve du chanoine Schmitz èt du Dom Nieuwland (6° partie – tome VII) l’è fwêt dpwis lontimps ( 1924) avu lès rapwårts fwêts a tchöd p’ås curés èt p’ås mwêsses du scole d’adon, nin tant su la bataye, mês putôt su lès sévices adèrés p’ås djans.
Gaston LUCY è ossi publiyî kékes artikes dins Presse-Annonces .
Dins lès grandes lignes, les almands vnint d’Hot-Fays pal gare de Djèdine èt Prâjî, Is pårtint dès Buchons, du Pont Mack, dès Môrzîes èt d’ Tôtiène vès la route de Bèlfontin.ne ; lu 77° R.I. francès les ratindot al vöye d’Hodrémont ; lès ôtes atakint la ligne dupwis l’Pont Mack jusk’ou pwint d’arèt, èt sayint d’gangnî la gare pou cöper l’durî ås Francès du 135 ° R.I. ki tnint l’viadje. Si la vöye d’Hodrémont vnot a céder èt si lès almands passint la ligne dulé la Brâjète èt Frouchy, lès francès astint djondus su leus costés ; i nul z-î dmèrot pus k’a sêwer å pus vite. Malèreus’mint, c’èst c’k’è arivé, mês après ène lute acharnée k’è lêchî kékes çantin.nes d’oumes sul cârô.
La rusponse al deujime kèstion : « Coumint k’ça s’fwêt k’c’èst a Bîve k’on s’è batu ? » dècoule du tout ç’k’on vint d’vèy, a sawè :
- Lu timps k’il è falu a tchèke payis pou mon.ner a bin sa mobilisacion ;
- Lu timps k’il è falu pou z-èkiper èt z-amon.ner su place lès 1.000 èt lès 1.000 oumes du tchèke armée.
- Lu plan almand k’avot tout prévu, min.me s’il avot dja sté dusrindjî pal rèsistance bèlje, su pourchûvot èt l’armée almande vunot du fwêre su kart du tour a gåtche pou fwêre face ås Franncès ki vnint du Sud
- Lu fèt’ ku su toute la ligne du Lucsambour, c’èst les Francès k’ont ataké, ça vut dire ku lès Almands lès ratindint sul tèrin k’ils avint tchwâzid’avance. Lès Almands avint bin peû du dvu s’bate su la S’mwas Ardènèze, ène rivîre ki caracolot dins dès gwâdjes profondes èt bwasées.
- Lu combat du Bîve-Djèdine-Wilèrzie ére lu prolondj’mint du tous lès combats du sam’di, du Virton a Mêssin. Lu pus grand tchmin ku tchèkin dvot fwêre pou s’rasconter è justumint sté la cåze du djoû du r’tard. Notans co k’å contrêre dès ôtes places, la gangne dès Almands l’sam’di lès è poussî a ataker l’dimadje å matin. Is n’plint nin s’lêchî prinde sul costé.
- A batant lès Francès ç’djoû-la, lès almands rètablichint leu front ; la progrèssion almande astot gènèrale dins tout l’Lucsambour, jusk’ al Mûse.
On vnot d’viker, su kékes djoûs, les batayes du ranconte, lès prèmîres d’ène guêre ki dvot aler vite.
Les almands l’avint ramporté partout, mês ils avint dvu z-î mète lu pris.
Lès miliers d’mwârts èt d’disparus k’ils avint lêchî partout, duvant d’mète lu prèmî pîd su la France, lès avint mètu dins èn’ état d’ènèrvumint sins parèy.On n’a vut pou preûve ku lès outrances k’ils ont fwêt subi a nosse populacion.lès djoûs èt lès landmwins dès combats.
I gn’è k’a vèy lu rulvé dul prèmîre padje, pou s’a rinde compte.
Lès Francès, d’leu costé, plins d’fougue èt d’ardeûr, sins prèparacion, avint dné dins l’panô èt avint co piêrdu d’pus d’oumes.
Lès bèles tèyorîes du Colonel du Grandmaison vunint d’awè sté mètuwes a l’èpreûve èt l’atake a outrance, tourtous èt partout assan.ne, avot viké.
Lès Francès, dja l’sam’di èt surtout l’dimadje, rufilint å pus vite durî la Mûze, du S’dan a Charleville. Ene rutrête ki mankot d’toûrner al débandade bin souvint, su dès routes sutrètes èt plin.nes du tchèrètes du civils ki stèpint.
Lès cîs k’ont sté s’lès routes an 40 a savat yôk.
Lès almands, mågré leu supèriorité èt les rèjimants frès ki chûvint lès combatants, ont mètu l’timps pou rèyadji, brâmint trop d’timps… La rançon d’leu dissipline èt d’leu caractêre.
C’èst don fwârt mol’mint k’ils ont pourchû lès francès.
On lès r’trouve k’intrat :
- Lu dimadje dul vèsprée ou Moncê èt ou Fayis, duvant dès Francès ki rèsistat a covrant la r’trête.
- Kékes uhlans lu dimadje 23 a 5 eûres dul vèsprée a Bèlfontin.ne èt seul’mint lu gros dul troupe lu landmwin. a 4 eûres å matin.(68° èt 28°).
- A Wâjî, lu dimadje dul vèsprée, pou duslodjî lès francès ki rèsistint èt fwêre ruculer lès cîs du Moncê. Çu djoû-la, is n’ont nin sté pus lon.
- Lu lindi 24, ils ocupat Grös-Fayis, Cwârnimont, Yåle èt Rotchôt.
- Lu 23 a 9½ eûres al nute a Orsimont, a 10 eûres al nute a Nafrêtère
- A Mambe, lu lindi 24 a 6 eûres au matin.
- A L’forèt èt a Vrèsse, lu lindi dvè 9½ eûres du matin
- Lu mårdi 25 a 6 eûres du matin, a Pûss’madje (al frontîére francesse su la vöye du Charleville) ;
Dju nous confortans don dins l’idée ku si la pus ptite buche amon les Almands gripe leu système, c’èst d’bèle après la rac’chûte k’i vnat d’ramasser su tout l’front.
Lu pö d’alant k’ils ont mètu pou couru après lès Francès a-n èst la pus bèle preûve.
Su ç’timps-la, cèt-cis ruculint a fwêt a ratôrdjant les boches l’pus k’is plint. Lès èlèmants duv’nint in pö pus favorabes ås francès :
- Is s’raprotchint d’leus camps d’départ,
- lu payis su prètot mî ås grands mouv’mants du l’armée,
- Alörs ku Metz, k’ére lu neû almand, n’astot k’a 80 km de Vèrdun, les boches n’î ont jamwês mètu lès pîds (a Verdun)
- Lès jènèrôs francès ralantichint èt limitint lu rcul å maximum, mågré lès ordes du G.Q.G.
- L’Ètat-Major analyzot sès prèmîres pluzées èt rèajichot.
- Ène nouvèle imådje dul guêre vunot du s’rèvèler,
- On cminçot a tirer parti dès l’çons k’on vnot d’awè.
I falot in sursôt d’ènèrjîe pou repoûssi lès idées défêtisses, èn’ instint patriotike formidabe duvot vnu mwêsse dul situwacion. Seûles, ène volonté sins fayes èt ène victwâre dèrmint gangnîe plot rinde l’èspwar. Joffre ére l’oume dul situwacion.
Bin ku sa volonté d’arèter lu rcul èt du rpasser a l’atake frîjot lu kite û doube, sa tènacité, la radje èt l’immanse èfôrt du toute l’armée francèse , dès anglès su leu gåtche èt dès bèljes su l’Yzer alint fwêre tchandjî lu cours dès évèn’mants.
Dèbut sètambe, Joffre dècrètot la fin du r’cul. On n’cèdrot pus rin, putot moru su place.Les taxis d’ Paris amon.n’rint lès oumes ; les camps tout protches èt lès trins fournirint lès ranförts , lès armes èt lès municions. C’ére lu moumint d’ toker in grand cöp.
Lu 6 sètambe, lès francès purnint l’ofansive èt atakint su ène fwâte lårdjeur.
Lès almands hodés dès marches èpwizantes k’ils avint fourni dupwis 6 smwin.nes, rèsistint a outrance. Is n’admètint nin d’capouner si près du l’ rèyussite.
Lu 13 sètambe, après 8 djoûs d’atakes furieuses èt sins rèpit, al limite du leûs fwâces, les francès fjint céder lès boches èt lès oblidjint a bate an r’trête. Çu n’ére nin la, lu rôle k’on lz î avot apris èt k’ils avint çant cöps rèpèté . Leu dêrin r’cours, s’atèrer dins lès tranchées..
Ils astint lon d’sondjî ku c’ére pou 4 grandes années.
La guêre rapide ku l’Etat-Major almand avot conçu dpwis d’pus d’40 ans vunot d’s’achèver. Tous lès rêves almands tumint a l’êwe. Paris astot såvé èt la France rupurdot couradje. Nous-ötes, ossi !
Lès francès s’avint anfin rindu compte ku la guêre du 70 ére bin lon, ku leûs vîes tèyorîes astint dèpassées, èt k’i duvnot prèssant pour zès du s’fwêre ås nouvèles pratikes dul guêre.
Lès l’çons d’ Bîve, coume lès cîes de Pwâtchrèsse, Mêssin, Anlè, Otchamps, Luchy èt toutes lès ôtes avint pwârté. La France, êdie pa sès aliés vunot d’ gangnî la bataye dul Marne…èt dja in pö la guêre !
Dupwis Bîve, i n’avot falu k’ trwâs smwin.nes pou nn’ariver la !
Mês kés smwin.nes !
Mi, dju compurdos adon lu rêzoun’mint du Gaston, ossi ènègmatike ku s’pèrsounadje, mês ki djot bin cè k’i vlot dire :
Choûte bin, la, valèt, c’èst pask’on s’ è batu a Bîve, la, ku lès Francès ont gangnî la bataye dul Marne !
Dins l’fond, c’ére bin vrê !
scrît lu 15 du djanvî