E moes d’ awousse 1914, les årmêyes almandes et francesses si rescontrént el Walonreye. Des monceas d’ civils fourît fuziyîs pa les Almands. Des peclêyes di måjhons fourît broûlêyes.
Metans, civils rén touwés k’ po Bive et 17 måjhons broûlêyes. A Poitchrece(-e-l'-Årdene), 95 måjhons ont stî griyeyes ; dj’ ô bén : cåzu tot l’ viyaedje.
Cwand dji cåzéve del guere di 14 avou l’ Singlé (Spot da Gaston Lucy, on scrijheu e walon, ricwereu sol foclore et l’ istwere do payis), i m’ dijheut todi : « Schoûte bén, la, valet, si les Francès ont wangnî l’ batreye del Måle (do 6 å 13 di setimbe 1914, 3 samwinnes après Bive, dabôrd; après 6 samwinnes di guere, les Boches rescoulént po s’ eterer dins les trintchêyes. Il î alént dmorer 4 ans), la, c’ est pask’ on s’ a batou a Bive. Sol moumint, dji dmoréve septike d’ ôre ci råjhonmint la. Mins l’ Gaston m’ respondeut todi : « Schoûte çou k’ dji t’ di ! »
Li Gaston aveut don bén råjhon, cwand i m’ dijheut del schoûter.
Li tuza metodike des Almands (Divant d’ oizeur, l’ Almand, i fåt k’i peze totafwait ; c’ est come å teyåte : s’ i n’ sait nén s’ role par keur, s’ i n’ l’ a nén repeté cint et cint côps, il est pierdou. Copuvite la k’ on lyi aveut seriné ki, dvant lu, i n’ trovreut k’ èn innmi ki n’ ténreut waire li côp) aveut stî dzôrné a tchaeke plouzaedje avou les Francès. Aprume çou k’ les istoriyns ont lomé « li batreye des frontires », di Vierton a Vierziye, etur les 20 et 23 d’ awousse 1914. Les Francès avént adon rescoulé a fwait, et aprester ene novele tactike ki convneut mî. Li lçon d’ Bive (et d’ ôte pårt) aveut poirté.
Après les prumîrès angoxhes del mobilizåcion, li veye aveut rprins, piyam-piyam. On-z ere a l’ awousse ; il faleut fåtchî et rintrer les grins. Avou les omes evoyes a l’ årmêye, i gn aveut pont d’ tins a piede. Et cwand les Almands ont-st arivé, les croupetes d’ avoenne estént co stampêyes dins bråmint des tchamps. Ça permeteut ås djins, e corant d’ ene a l’ôte, di s’ mete a coete des tireus.
Dins les viyaedjes, sacwants avént wangnî l’ France. Les noveles n’ estént nén rassurantes. I passéve des tcheretes tcherdjeyes di djins ki s’ såvént et ki djhént k’ les Almands touwént et broûlént tocosté. Esteut ç’ ene tactike po-z ehaler les voyes et rastårdjî l’ ôte årmêye ?
Dins nos viyaedjes, on voeyeut co sovint passer des sôdårds a tchvå – on côp des Francès, on côp des Almands – k’ alént pus lon, mins ki rançonént les djins so leu tchmin. Pa des côps, ene algaråde etur kibateus fijheut kékes moirts u blessîs. Adon, li plaece ere libe po l’ infantreye s’ apougnî : les Almands k’ avént vnou d’ droete a gåtche (so ene mape), mins ki tournént a Nonne, do côp k’ les Francès aprotchént ; les Francès ki wangnént l’ Nôr a tote foice.
On vneut d’ viker, so kékes djoûs, les batayes di resconte, les prumires d’ ene guere k’ åreut dvou esse vite roistêye. Po ls Almands, todi, veyanmint k’ il avént wangnî tocosté. Ki : il î avént dvou mete li pris. Des meyes di moirts k’ il avént leyî pattavå l’ Walonreye, divant d’ mete li prumî pî so France. Çoula les aveut fwait araedjî jamwais parey. Did la, leu rvindje so des pôves enocins li londmwin des batreyes.
Les Francès, tot feu tot blame mins nén aprestés ås novelès åres, aprume les mitrayeuses, avént co pierdou dpus d’ omes. Mins leu-z estat-madjor analijhive ses prumirès plouzêyes [défaites]. Et reyadji tot leyant l’ djenerå Joffre moenner les operåcions a si idêye : rataker après 6 samwinnes di rescoulaedje.
Saetchî foû d’ on long papî scrît e walon et ratourné e francès, datant di 1999.