In Noyé sins popa
rortografiaedje da Lucyin Mahin
Li Rantoele  101,
Schoûtez Souzane Mahin k’ el dit
(prononçaedje shuvant tecse foirdjî leye cåzu tote seule)
In Noyé sins popa

In Noyé sins popa,
C’ est come in ddjuner sins lacha.[1]

Popa dène in riya foirt bea [2]
A l’ ivier ey a l’ esté.

Dj’ inmreu vos vey ureus tote vosse veye
Ey esse fir di nosse Walonreye.

Les boles do sapén n’ ont pupont d’ coleur
Pask’ ele ni veyèt pus vos markeurs.[3]

Et les djouwets n’ ont pupont d’ egzistince
Paski dji vs ratind come ene sins-pacyince.

Dji n’ voe ki do neur pattavå ;
Dj’ a dandjî d’ ene tchandeye po mete la-hôt
Et l’ esprinde avou l’ feu do solê ;
Adon, dj’ a dandjî d’ ene grande fuzêye[4]
Po vey les stwâyes ki rglatixhèt å lon,
Et magnî on wastê foirt bon.

Dj’ inmro bin k’ vos rivnîche a nosse viyadje
Et m’ dèner ene miyète d’ ovradje.

Come dji ratind k’ i plûche,
Dji ratindrè bin k’ vos rivnîche.

Les wastês del fiesse n’ astint nin beas
Pask’ i n’ oyint pus vos pinsêyes.[5]

I m’ fåt ene miete di vos rwèjins,[6]
Et dji vos frè in bea dessin.

On n’ magnrè pus les åbussons
Tant k’ vos rivnîche ; i sront ça pus bons.[7]

On dwèrè awèr du couradje
Et monter djusk’ ås nuwadjes.

Ciddé, i gn è ki do vude.
Cwand m’ ridjouwrez on boket d’ flûte ?[8]

  1. Dj’ a-st aprins cisse disfondowe carolo la avou l’ CHADWE tins des fiesses ås lingaedjes walons.
  2. prononcî « bê », po fé axhiltance avou « esté »
  3. rapinsaedje ås scoles di walon so blanc tåvlea et scrijhaedjes avou des markeurs, come vaici : Scolaedje do walon : Li fråzlete aloyeye å no.
  4. Dji prononce « fuzée », ça fwait axhiltance avou « solê ».
  5. prononcî « bê » et « pinsées », çou ki fwait axhiltance.
  6. ki nosse pa nos rapoite des deus gripantès vegnes k’ il a e si ovraedje.
  7. I sont-st edjalés dins l’ edjaloe.
  8. Ritche rime, ca « vude » si prononce « vût′ ».

Scrît dabôrd ki l’ pere del sicrijheuse esteut a stok e l’ Walonreye — dabôrd ki leye est e l’ Afrike — a cåze do dierin rispitaedje del minêye di gripe chinwesse e moes d’ decimbe 2021.

Li rortografiaedje respectêye ene pårteye des scrijhas del mwaisse modêye.

Gn a kékes pitits candjmints eneviè li modêye sol Rantoele papî (eplaidî sins rforbataedje avou li scrijheuse), mins li tecse a stî rmetou come cial ådzeu, après ritravayaedje avou li scrijheuse, dins l’ modêye éndjolike d’ egurniyaedje del gazete.