IN R’NAU SAIN QUEUWE.
In R’nau adoèt, futét in coup manque dé iesse prîs !
In chéyant sain l’savoé dain n’trappe,
V’là qui fai tant, d’sés pîds, d’sés moins qui scappe,
Mai in l’liant s’queuwe padri,
I n’l’lien d’meure né l’mitant din pid.
Lés R’naus s’voéye nu échenne, i séva à l’séance,
Et in muchant s’burton, sain rîn dire i s’achî,
— I stierni pu i dit : « j’ai n’roéyâle avisance :
« No queuwe est s’paisse et p’sante, et ça n’no chiéfe à rin,
« Qu’a broucheté les pîcintes, les pavées, et j’soutins,
« Q’toés quarts du tins ça no fai printe !
« L’chesseu vint ! dain les fouyes nô queuwe no faî intinte,
« I no fau foutte ça jû ! c’est s’taugile à comprinte !
— « Recta, disto testous ! mais r’lévet vous m’colau !
« Moustrét vo drî, pou vire in pau !
« Woéte in pau qué tableau,
« Quand i n’ont vu : qué s’trau ! »
— On za cheû tertous d’su ! né dangi d’dire ell’resse !
Il ont wordét leü queuwes, l’aute a joqui ses gesses,
I pette a gaye tout proû, in rastrindant sés fesses.
Brammin d’geins aujourd’hu sont bin cheû comme lé Rnau,
Si feye nu in bia joû, n’biestrie ou n’saquoé d’mau,
Enne flotche, ou enne affaire véreuse,
Pou s’blanchi i cache nu, qu’on feye tertous comme ieuses ;
Quéque foés les geins né biesses, lé r’tourne nu, mousse nu s’trau,
I s’joque nu rade tout proû ! î s’évont tout pénaus.