Qué n-istwêre, qué pléjî di wétî ça ! No p’tit payîs aveut quasimint disparu d’èl sin.ne mondiâle en tènis. Dins lès grands tournwès, gn-aveut in grand trô. Tout d’in côp, Kim èst r’vènûwe. Eyèt asteûre, c’è-st-au toûr da Justine. Sins roubliyî Yanina. Oyî, nos nos r’trouvons avou trwès bounès djouweûses di tènis. Asto dès-amèricaines, dès chinwèsses èyèt dès grandès russes, in p’tit payîs come èl nosse èr’lève èl tièsse. C’èst tout bon’mint magnifique !
El 9 di janviè, à Brisbane en Australîye, Justine a batu Kim en finâle du tournwè. Si èl rèyalitè a dispassè l’ficsîyon, il èsteut malaudjî di crwêre à in tél sénarîyo. Bén seûr, nos-autes nos-avis l’èspwêr, mins di d’là à z-assister à in tél combat, gn-aveut d’èl mârche.
- Vos vos rindèz compte di l’afêre ! Comint imajiner di vîr ène téle pârtîye, pou l’preumî tournwè di l’anéye ! Dji d’è seû co foufoûye ! C’èsteut deûs r’vènantes qu’avit pris leû r’trète !
Tèrtous rêveut d’ène téle finâle intrè lès deûs mèyeûsès djouweûses d’amon nos-autes … come au bon vî timps !
El tènis di no payîs èyèt min.me di pus lon, d’a sôrti gâgnant. Divant l’pârtîye, Carlos Rodriguez, l’entrin.neû da Justine, èsteut binauje qui pou s’èr’toûr, èle djouwe conte Kim. C’èsteut, d’après lî, in boun-èc.samint. Il a stî rèyussi puce qu’au d’d-bout di deûs-eûres èyèt 23 munutes, lès 5500 spèctateûs d’èl « Pat Rafter Arena » ès’ sont l’vès pou aplaudi nos deûs mèyeûses djouweûses. Mi ètou, come tous lès djins calès pa-d’vant leû bwêsse à imâjes, dj’é chû ène lute achârnéye. Lès deûs feumes ès’ sont batûwes pou in spèctaque d’è valant lès pwênes.
D’ayeûrs, lès deûs mèritît di gâgnî, avou n’préfèrîynce à Justine qu’è-st-ène walone bén-ètindu!
El préparâcîyon, dins lès spôrts, come dins tout, a bran.mint d’impôrtance.
I faut bran.mint di travay’, dès-entrin.n’mints èyèt dès massâdjes. D’après çu qu’dj’é lu dins n’ gazète, i parètreut qui pou tuwer ène pârtîye d’ès’ timps libe, Justine èr’wéteut in r’pôrtâdje dissus l’deuzième guère mondîyale. C’èst vrémint qui lèye, èle a èn-èsprît di batâye ! I gn-a qu’à l’vîr djouwer pou l’è r’mârquer. C’èst dès pârtîyes fôrt impôrtantes woù-ç’qui Justine s’èpwuise pou trouver èl bon ryt.me. Etou, faut nén roubliyî qu’èle a in bon sèrvice. C’èst tout çoulà qui lî a pèrmis di d’meurer à in bon nivau. Ene mîyète après, èle a stî batûwe en finâle di l’Australien Open pa yène dès deûs cheûrs Williams.
Dins l’fouléye, ène trwèsième djouweûse bèlje fét myeû qu’ès’ disfinde. Si Justine èyèt Kim sont st-au somèt, i gn-a ètou Yanina Wickmayer qui s’acrotche. Ele n’a qui vint ans. Ele a d’ayeûrs rèyussi in bia tournwè à Auckland pou s’è r’trouver èyèt gâgnî l’finâle face à l’Italiène Pannetta.
- Grâce à trwès djon.nès coumères, dji pass’ré co dès-eûres pa-d’vant m’bwêsse à imâdjes. Vos p’lèz m’crwêre !