Et v’là co ène drole d’istwêre ! Ele ès’ lome Advocaat (du diâle, azârd). Comint èst-i possible di fén confîyance à m’n-ome. Dèdjà qu’divant , il aveut fét s’côp-là à quate èr’prîjes. C’èsteut pou l’preumî côp en 1995 avou li Olande pou d-aler au PSV. Pou chûre, il a quitè l’PSV pou lès Glasgow Rangers. En 2005, il a signè aus-Emirats Arâbes èt deûs mwès pus taurd, i s-è d-aleut diriger l’Coréye du Sud. Et pou fini, i s’ègâdje avou l’Australîye pou r’trouver l’Zénit Sint Pètersboûrg qui lî ofe 2,7 mîyons d’Euros.
Eyèt rocî, lès wautès-instances di l’Unîyon Bèlje ont dècidè d’èl parachuter à l’tièsse di l’èquipe natîyonâle. Dèdjà qu’ça n’toûrneut nén avou l’cén qu’èsteut d’vant lî. Bén-ètindu, ès’ n-arivéye aveut d’djà pôsè dès problèmes.
Eyèt v’là qu’tout d’in côp, qu’èl wolandès done in côp d’fil en dijant qu’i djoqueut s’boutâdje en Bèljique. Mossieû s’è d-aleut en Russîye avou in fameûs paquèt di liârds dins s’potche. On pâle di sèt mîyons d’Euros. L’afêre va fini au tribunâl. I n’faut nén roubliyî qu’i gn-âreut in mîyon d’Euros à payî come dédomâdj’mint di ruptûre di contrat. El gayârd entrin.ne l’AZ Alkmaar. Mins rolà, i s’téjeut dissus s’nouvia contrat. Il èst vré qu’i s’è d-alè d’lauvau èl 2 di mé.
Lès rèyac.sîyons èvont tèrtoutes du min.me costè : c’èst s’foute du peupe bèlje, in manque totâl di rèspèct, vaut myeu r’pârti à zéro, èl manîre di fén èst scandaleûse, … Eyèt dîre qu’èl trwès di sètembe, c’èst dèdjà Bèljique-Al’magne. Advocaat n’a rén trouvè myeu di rèsponde qu’i n’wèyeut nén çu qu’on lî r’procheut èyèt qu’i fèyeut preuve d’onètretè. A l’ètinde, ès’ dèpârt rintère dins l’lojique ! Dès bèlès promèsses èt dès bèlès résolucîyons qui seûl’mint deûs djins d’èl Fèdèrâcîyon, François De Keersmaecker èyèt Philippe Collin ont gobè à r’lâye. Domâdje pou no n’èquipe bèlje qui n’aveut d’djà nén dandji d’ène parèye rèclame.
Rèplaci Advocaat, èvôye après à pwêne chîj mwès, cénq pârtîyes èyèt 300.000 Euros, n’èst nén aujîye.
C’n-èst nén qu’i fèyeut du bon boutâdje, mins pèrsône ni v’leut prinde ès’ place. Faut dîre ètou qu’en wêre di timps, i s’a engueulè avou Stiynen, Kompany, Fellaini, …
Chaque à s’toûr, dès-entrin.neûs confirmès ont stî acrotchis. On a d’mandè à Preud’homme, Gerets, Leekens, … Mins is n’ont nén v’lu ès’ risquer. Faut dîre qu’èl boutâdje èst malaudjî pou s’qualifier pou l’coupe d’Europe 2012. Ca n’lès-arindjeut nén. Faut r’conèche qui no n-èquipe natîyonâle è-st- à l’imâdje di no gouvèrnement. I gn-a pus rén qu’èva come i faut.
I gn-a trop longtimps qui no payîs n’arîve pus à s’qualifier pou ène coupe d’Europe ou min.me du Monde. Nos-avons pourtant dès bons djouweûs qu’on nos d’mande d’ayeûrs dins lès-autes payîs (Arsenâl, Everton, Manchester City, Bayern Munich, Ajax Amsterdam, …). Faureut tout d’abôrd èn-entrin.neû qui sâreut mète di l’orde dins l’boutique. Eyèt on crwèt l’awè trouvè : c’èst « long coutia », Georges Leekens qui r’vént. Il aveut d’djà stî entrin.neû d’l-èquipe di 97 à 99.